Bìoball air-loidhne

Ha̍p-pâ-kuk Sû 3 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Ha̍p-pâ-kuk ke Khì-tó

¹ Liá he siên-tî Ha̍p-pâ-kuk ke khì-tó, thiau yung Liù-lì-kô:

² Song-chú â, ngài thâng-tó Ngì ke miàng-sâng, sîm-chûng chhiu chhûng-mân kin-vi. Khiù Ngì chhai ngài-têu ke sṳ̀-thoi chhùng-sîn cho Ngì cho-ko ke thai-sṳ, chhai liá-têu ngièn-kiên hién-mìn chhut-lòi; khiù Ngì chhai thai fat-khién ke sṳ̀ hàn ki-tet lìn-mén.

³ Song-ti oi chai tui Yî-tûng lòi; sṳ̀n-sṳn ke Song-ti oi tui Pâ-làn-sân lòi. Kì ke yùng-kông châ-koi thiên; thai-thi chhûng-mân siung-chan Kì ke sâng-yîm.

⁴ Kì chhan-lan chhîn-chhiong ngit-thèu. Kì ke sú-chûng khong-tén thai nèn-li̍t; kông-sien tui Kì sú-chûng sa chhut-lòi.

⁵ Chhai Kì thèu-chhièn yû pot-vûn; chhai Kì heu-poi yû chṳ-sí ke phiang.

⁶ Kì yit thìn hâ-lòi, thai-thi chhiu thîn-thûng; Kì yit chu-muk khon, van-koet chhiu kín-chûn. Chhòng-kiú chhùn-liù ke khiùn-sân voi pên-thet; yit-chhṳ̍t chhùn-chhai ke sân-kông voi chhṳ̀m-thet; liá-têu he Kì kú-sṳ̀ hàng-ko ke só-chhai.

⁷ Ngài khon-tó Kú-sân-ngìn chhai chong-phùng tú yû châi-nan, Mí-thien-ngìn chhai chong-mok chûng pi̍t-pi̍t-chhat.

⁸ Song-chú â, he m̀-he hò-pa ngiâ Ngì fat-khién? He m̀-he thai-hói kit Ngì su-hi? Ngì khì-tén yùn chhiong khì-mâ lòi, sṳ́-tén vû-yùn ke chan-chhâ, oi tai sṳn-li pûn Ngì ke chṳ́-mìn.

⁹ Ngì chhû-chhut kiûng, chún-phi sa-chien; Ngì yung hò-pa sṳ́ thai-thi lie̍t-khôi.

¹⁰ Khiùn-sân yit khon-tó Ngì, chhiu kín-chûn; thai-súi tui thiên-táng tó-tén hâ-lòi. Chhṳ̂m-yên ho-ho-kún, pô-long chhung-sông thiên.

¹¹ Ngì ke khoai-chien yit-sa, ngiap-lang ke chhiông yit-thûng, ngit-thèu lâu ngie̍t-kông chhiòn-phu thìn hâ-lòi.

¹² Ngì chhai fat-khién chṳ̂-ha khiam-ko thai-thi; Ngì chhai fun-nu tông-chûng chien-tha̍p van-koet.

¹³ Ngì chhut-hi chṳ́n-kiu Ngì ke chṳ́-mìn, hi chṳ́n-kiu Ngì sién-li̍p ke kiûn-vòng. Ngì tá-vang fái-ngìn ke liâng-chhiu, chha̍t-tái sêu-me̍t kì ke phu-ha.

¹⁴ Kì ke kiûn-chhui chhiong thai fûng-chhâi chhôi-san ngài-têu, chhiong ok-pa fôn-hí thûn-sṳ̍t khong-tén ke khiùng-ngìn; chúng-he Ngì yung kì ke chhiông chhiuk-chhôn kì ke chiông-kiûn.

¹⁵ Ngì khì-mâ chien-tha̍p thai-hói, hói-súi chhiu fân-kún.

¹⁶ Ngài yit thâng-tó chhiu chhiòn-sṳ̂n kín-chûn, choi-sùn ya pi̍t-pi̍t-chhat. Ngài ke kut-thèu sûng-thet, kiok-phu hàng m̀-chhai. Ngài chṳ́-yû tiâm-tiâm tén châi-nan ke ngit-è lòi-to, ke-sṳ̀ Song-ti oi chit-fa̍t kûng-kit ngài-têu ke ngìn-mìn.

¹⁷ Chhiu-son vù-fâ-kó-su mò kiet kó-chṳ́, phù-thò-su ya mò tá phù-thò; chhiu-son kám-lám-su mò tá kám-lám, thièn-thi mò chhut-sán ńg-kuk; chhiu-son yòng-khiùn sí chhiang-chhiang, ngiù-làn tú mò pan-chak ngiù;

¹⁸ ngài hàn-he oi yîn-vi Song-chú fôn-hí, yîn-vi Song-ti — ngài ke kiu-chú khoai-lo̍k.

¹⁹ Chṳ-kô ke Song-chú su-pûn ngài li̍t-liong. Kì sṳ́ ngài chhiong lu̍k-mà kiok-phu ôn-vún; Kì sṳ́ ngài chhai kô-sân táng chhṳ-yù chhṳ-chhai. Liá-kô kâu-pûn sṳn-kô chhui-chóng, yung sṳ̂-hièn ke ngo̍k-hi phan-cheu.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan