Chṳ̂m-ngièn 6 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Kien-tô ke Khien-va

¹ Lai-é â, ngì na tap-yin thoi lìn-sa cho tâm-pó, ya-he thoi m̀-sṳt ke ngìn ak-sú chhiâm-yok vàn-chai,

² ngì chhiu pûn chhṳ-kâ kóng-ko ke fa chhàn-tó, pûn chhṳ-kâ tap-yin ke fa lap-tó.

³ Lai-é, ngì ki-yèn lo̍k chhai lìn-sa ke sú-chûng, oi án-ngiòng lòi-kiu chhṳ-kâ: Oi kiak-kiak khiâm-pî hâ-lòi, khiù tui-fông kié-chhù khie-yok.

⁴ Ngì cho-m̀-tet soi-muk, ya m̀-hó tuk-muk-soi.

⁵ Oi kiu chhṳ-kâ, chhiong lu̍k-é sám-khôi tá-lia̍p ngìn ke sú, chhiong tiâu-é thot-lì chok tiâu-é ke sú.

⁶ Lân-sṳ̂ ngìn â, oi hi chhìm ngie-kûng; chhà-khon kì-têu ngióng-pân sên-fa̍t, hó sàng-cho yû chṳ-fi ke ngìn.

⁷ Ngie-kûng mò liâng-chhiu, mò kôn-chóng, mò thúng-chhṳ-chá;

⁸ chúng-he, kì-têu chhai ngie̍t-thiên yi-phi sṳ̍t-vu̍t, chhai sû-kot ke sṳ̀-chiet tún-chit liòng-sṳ̍t.

⁹ Lân-sṳ̂ ngìn â, ngì oi soi-to kí-sṳ̀? Ngì kí-tô tiám-chûng chang oi hong-chhòng nè?

¹⁰ Ngì kóng: “Pûn ngài tuk-kû hiû-sit yit-ha, soi kâ yit-ha-é, nám-tén sú hiet-khun yit-ha.”

¹¹ Chúng-he, phìn-khiùng voi fut-yèn-kiên chhiong khiòng-tho lòi chhióng ngì; khiet-fa̍t voi chhiong thú-fî lòi kûng-tá ngì.

¹² Ke-têu m̀ cho chṳn-tông sṳ-ngia̍p ke fái-ngìn, hàng-lòi hàng-hi kóng fâ-liâu-fa khî-phien ngìn.

¹³ Kì-têu yung muk-chû, sú-kiok, tá am-ho lòi khî-phien ngì.

¹⁴ Kì-têu ke fái sîm-su̍t sṳ̀-sṳ̀ sat-kie, chṳ-chho fûn-chên.

¹⁵ Só-yî, châi-nan voi kiak-kiak lìm-to kì-têu; kì-têu voi fut-yèn phai-fái, mò-fap hó-kiu.

¹⁶ Song-chú só yen-hen ke yû liuk-hong, lièn Kì só-nâu ke khiung-yû chhit-hong,

¹⁷ chhiu-he: kiêu-ngau ke muk-chû, kóng phong-fûng ke sa̍t-mà, sat-hoi vù-kû ke sú,

¹⁸ kúi-kie tô-tôn ke sîm, pûn-chéu sià-lu ke kiok,

¹⁹ phong-fûng kóng yèu-ngièn cho ká kien-chṳn, chhai phèn-yû chûng-kiên kâu-sô sṳ-fî.

Kín-kie Yìm-lon

²⁰ Lai-é â, oi kiún-sú ngiâ-pâ ke kie-min, m̀-hó lì-khôi ngiâ-mê ke kau-sṳ;

²¹ oi yit-chhṳ̍t khat chhai sîm-tú, koa chhai ngì ke kiáng-kîn hong.

²² Kì-têu ke kau-hiun voi tai-liâng ngì só-hàng ke lu, am-pû-sṳ̀ pó-sú ngì, ngit-sṳ̀-thèu kâu-tai ngì.

²³ Yîn-vi kie-min he tên, kau-sṳ he kông, kau-hiun lâu chit-phi voi chṳ́-sṳ ngì ngìn-sên ke tho-lu,

²⁴ voi pó-sú ngì yén-lì fái fu-ngìn-kâ, lâu choi-thiàm sa̍t-va̍t ke yìm-fu.

²⁵ Ngì sîm-chûng m̀-hó pûn kì ke mî-set mì-tó, ya m̀-hó pûn kì ke ngién-koái chok-hi;

²⁶ yîn-vi kî-ńg voi hoi ngì to chṳ́-chhûn yit-te piáng, phe̍t-ngìn ke pû-ngiòng ya voi chiông ngì ke ló-miang sû-thet.

²⁷ Ngìn na-he chiông fó khong chhai fài-chûng, kám m̀-voi sêu-thet chhṳ-kâ ke sâm?

²⁸ Ngìn chhai sêu-tén ke fó-than chûng hàng, kiok kám yû khó-nèn m̀-voi sêu-sông?

²⁹ Thùng lìn-sa ke pû-ngiòng khiung-ha soi ke, ya chhiong án-ngiòng; chhîn-khiun phe̍t-ngìn ke pû-ngiòng ke, yit-thin voi su chit-fa̍t.

³⁰ Chhe̍t-é yîn-vi tú-kî thêu-nâ sṳ̍t-vu̍t chhûng-kî, ngìn kha m̀-voi méu-sṳ kì;

³¹ chúng-he pûn-ngìn chok-tó, chhiu oi phòi-ngìn chhit-phi, chiông kì kâ-chûng só-yû ke, chhiòn-phu phòi chhut-lòi.

³² Thùng phe̍t-ngìn ke pû-ngiòng thûng-kiên sṳ̍t-chhai tông-ngong; án-ngiòng cho ke ngìn thin-chho̍k voi hoi-sí chhṳ-kâ.

³³ Kì yit-thin voi su siû-yu̍k pûn-ngìn tá; kì ke kien-seu yún-yén ya sé m̀-chhiang;

³⁴ yîn-vi chhit-tu voi sṳ́ ló-kûng thai fat-khién, po-sù ke sṳ̀, kì yit-thin m̀-voi liù-chhìn.

³⁵ Kì mò-oi chiap-su châ-siû-fi, kha-tô lî-vu̍t kì ya m̀-sû.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan