Chṳ̂m-ngièn 4 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Oi Chhìm-khiù Chṳ-fi

¹ Lai-é â, oi thâng â-pâ ke kau-hiun; ngì-têu oi chôn-sîm lòi tet-tó chhûng-mìn.

² Ngài pûn ngì-têu ke kau-hiun lûng-chúng he hó ke, só-yî, ngì-têu m̀-hó phiên-lì ngài ke kau-sṳ.

³ Ngài chhai â-pâ mien-chhièn he hau-chṳ́, chhai â-mê ngién-chûng he tet-ngìn-siak ke tân-tên-chṳ́;

⁴ ke-sṳ̀, ngâ-pâ chhiu kâu ngài kóng: “Ngì ke sîm oi ki-tet ngài ke fa; oi chûn-sú ngài ke kie-min, ngì chhiu voi yû fûng-fu ke sâng-miang.

⁵ Oi chhìm-khiù chṳ-fi, oi chûi-khiù chhûng-mìn; mo̍k m̀ ki-tet ya-he vì-poi ngài ke fa.

⁶ Mo̍k lì-khôi chṳ-fi, kì voi pó-fu ngì; ngì siak kì, kì yit-thin voi pó-sú ngì.

⁷ Chṳ-fi he chui chhung-yeu ke, só-yî oi chhìm-khiù chṳ-fi; ngì oi yung ngì só-yû ke yit-chhiet lòi tet-tó chhûng-mìn.

⁸ Ngì khon-chhung chṳ-fi, chṳ-fi chhiu voi pûn ngì kô-sṳ̂n; ngì nám-tén chṳ-fi, kì chhiu voi pûn ngì yû chûn-yùng.

⁹ Chṳ-fi voi chiông chiâng mo-é tai chhai ngì thèu-nà-táng, chiông kông-yùng ke miên-liù sung-pûn ngì.”

Oi Hàng Chṳ-fi ke Tho

¹⁰ Lai-é â, thâng ngài kóng, chiap-su ngài ke fa, ngì chhiu voi hióng-su chhòng-su.

¹¹ Ngài yí-kîn kâu ngì hàng chṳ-fi ke tho, yí-kîn tai-liâng ngì hàng chṳn-chhṳ̍t ke lu.

¹² Ngì hàng ke sṳ̀, phu-phu sun-li; ngì chéu ke sṳ̀, m̀-voi tiet-tó.

¹³ Oi vún-vún chok-he̍t kau-hiun, m̀-hó piong-thet kì; oi kiún-sú kì, yîn-vi kì he ngì ke sâng-miang.

¹⁴ M̀-hó hàng sià-ok ngìn ke tho; ya m̀-hó tha̍p fái-ngìn ke lu.

¹⁵ Oi sám-khôi, cho-m̀-tet kîn-ko! Oi chón-sṳ̂n lì-khôi, sám ko-hi!

¹⁶ Fái-ngìn mò cho-têu fái-sṳ, chhiu soi m̀-lo̍k kau; kì-têu na mò hoi-ngìn tiet-tó, chhiu soi m̀-tet;

¹⁷ yîn-vi sià-ok he kì-têu sṳ̍t ke fan, chhàn-phau he kì-têu lîm ke chiú.

¹⁸ Ngi-ngìn ke lu chhiong tá-chó ke kông, kín-lòi kín kông, chhṳ̍t-to tông-chu-thèu.

¹⁹ Sià-ok ngìn ke tho chhiong am-pû-thèu ke vû-am; kì-têu tiet-tó, hàn m̀-tî pûn má-ke kang-tó.

²⁰ Lai-é â, oi chu-yi thâng ngài ke fa, oi chet-ngí thâng ngài ke kau-hiun.

²¹ Mo̍k pûn kì-têu tui ngiâ mien-chhièn sám-chéu, oi yit-chhṳ̍t ki chhai ngì ke sîm-kôn tú;

²² yîn-vi chhìm-tó kì-têu ke, chhiu-he tet-tó sâng-miang, chhiòn-sṳ̂n ya voi tet-tó yî-chhṳ.

²³ Ngì oi kiún-sṳ́m ngì ke sîm-sṳ̂ chhêu-ko yit-chhiet; yîn-vi sâng-miang ke chhièn-ngièn he tui sîm yúng-chhut.

²⁴ Oi chhù-thet vân-khiuk ke fa, oi yén-lì fâ-liâu ke choi.

²⁵ Ngì ke muk-chû oi tân-tân hiong-chhièn khon; ngì ke muk-chû oi chhṳ̍t-chhṳ̍t khon thèu-chhièn.

²⁶ Oi siû-phiàng ngì ke kiok só-hàng ke lu, ngì só-cho ke yit-chhiet chhiu voi vún-tong.

²⁷ M̀-hó hiong-chó fe̍t hiong-yu phiên-chéu; oi sṳ́ ngì ke kiok yén-lì sià-ok.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan