Chṳ̂m-ngièn 30 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Â-kú-ngí ke Chṳ̂m-ngièn

¹ Hâ-poi he Ngâ-kî ke lai-é Â-kú-ngí ke chṳ̂m-ngièn; liá-ngìn tui Yî-thiet lâu Vû-kap kóng:

² Ngài chhiong thèu-sâng, mò phe̍t-ngìn án chhûng-mìn; sṳ-kiên-ngìn ke chṳ-fi, ngài lûng-chúng mò.

³ Ngài m̀-sṳt ho̍k-ko chṳ-fi, ya m̀ ngin-sṳt Chṳ-sṳn-chá.

⁴ Má-ngìn sông-ko thiên-táng yu hâ-lòi? Má-ngìn nèn yung sú pâ-chóng chok-fûng? Má-ngìn yû phan-fap yung-sâm pâu-súi? Yû má-ngìn thin-ko thi ke kie-han? Kì he má-ngìn, miàng ôn-to má-ke? Kiâ lai-é ke miàng ôn-to má-ke? Ká-sṳ́ ngì tî, pai-thok lâu ngài kóng!

⁵ Song-ti ke fa tak-ki chhiòn-phu he sùn-kiet ke; Kì chhiong tún-phài pó-fu só-yû thèu-kho Kì ke.

⁶ Kì só-kóng ke fa-ngî, ngì cho-m̀-tet kâ-thiâm má-ke, kiâng-pha Kì voi chit-phi ngì, chṳ́-chhut ngì he fâ-liâu-kú.

⁷ Song-ti â, yû lióng-hong sṳ-chhìn, khiù Ngì chhai ngài màng-sí yî-chhièn tap-yin ngài:

⁸ Khiù Ngì sṳ́ hî-ká lâu fâ-liâu yén-lì ngài; sṳ́ ngài m̀-voi thet-khú ya m̀-voi thet-pot; su-pûn ngài só sî-yeu ke yím-sṳ̍t chhiu hó,

⁹ kiâng-pha ngài thet hó-ngiak, voi m̀-ngin Ngì, chhiu kóng: “Song-chú he má-ngìn nè?” yu kiâng-pha ngài thet-khú, voi hi thêu-nâ, chhiu siû-yu̍k ngài Song-ti ke miàng.

¹⁰ M̀-hó tui cho chú-ngìn ke phî-phìn kì ke phu̍k-ngìn, kiâng-pha phu̍k-ngìn chu-ma ngì, ngì ya oi su chit-fa̍t.

¹¹ Yû-têu ngìn chu-ma yà-è, ya m̀-hén chuk-fuk â-mê.

¹² Yû-têu ngìn láu-tó chhṳ-kâ chhin chhiang-li; khì-sṳ̍t mân-sṳ̂n mò sé-chhiang chhin ô-chô.

¹³ Yû-têu ngìn láu-tó chhṳ-kâ chhin vàn-mî, chúng-he kì ke muk-chû hién-chhut kiêu-ngau.

¹⁴ Yû-têu ngìn chiâm-ngà li-chhṳ́, oi thûn-sṳ̍t thi-song ke khun-khú ngìn lâu sṳ-kiên ke phìn-khiùng ngìn.

¹⁵ Fù-khì yû lióng-ke moi-é, kín-kóng: “Pûn ngài! Pûn ngài!” M̀-voi mân-chiuk ke yû sâm-hong, lièn m̀-kóng “La” ke khiung-yû si-hong,

¹⁶ chhiu-he: Yîm-kiên, m̀-voi kiung ke fu-ngìn-kâ, thiên-hôn mò-súi ke thú-thi, m̀-voi kóng “La lé!” ke fó.

¹⁷ Sâu-nat â-pâ, méu-sṳ yu m̀ thâng-chhiùng â-mê ke, kiâ muk-chû voi pûn sân-lak ke vû-â tuk chhut-lòi, pûn se ên-tiâu sṳ̍t-thet.

¹⁸ Ngài sióng m̀-kié khì-meu ke sṳ yû sâm-hong, lièn ngài só m̀ liáu-kié ke khiung-yû si-hong,

¹⁹ chhiu-he: Ên-tiâu chhai khûng-chûng pî ke lu, sà-kô chhai thai-sa̍k-táng phà ke lu, sòn-è chhai hói-song hàng ke lu, nàm-ńg kâu-vông ke lu.

²⁰ Yìm-fu ke lu he án-ngiòng: Kì sṳ̍t-liáu, chiông choi yit-chhu̍t chhiu kóng: “Ngài mò cho fái-sṳ!”

²¹ Sṳ́ thai-thi yèu-thung ke yû sâm-hong, lièn thi khâi m̀-yàng ke khiung-yû si-hong,

²² chhiu-he: Nù-chhòi cho-vòng, ngong-tong ngìn tet-tó páu,

²³ tông tet-ngìn-nâu ke se-moi-é chhut-ka, sṳ́-ńg châng-to thèu-kâ-ngiòng ke thi-vi.

²⁴ Thi-song yû si-chúng se ke thung-vu̍t, chúng-he fî-sòng chhûng-mìn:

²⁵ Ngie-kûng m̀-he yû li̍t ke thung-vu̍t, chúng-he kì tî ha-thiên yi-phi sṳ̍t-vu̍t;

²⁶ sa̍k-fôn m̀-he khiòng-chong ke thung-vu̍t, chúng-he kì voi chhai ngàm-sa̍k chûng cho-teu;

²⁷ chhó-máng mò vòng, chúng-he kì-têu voi pài-chhṳn chhièn-chin;

²⁸ piak-sà, ngìn yung sú chok tet-tó kì, chúng-he kì voi he̍t chhai vòng-kiûng tú.

²⁹ Kiok-phu vî-fûng ke yû sâm-hong, lièn hàng-thung vî-fûng ke khiung-yû si-hong,

³⁰ chhiu-he: Chhu-lui chûng chui khiòng-chong, mò kiâng má-ke ke sṳ̂-é;

³¹ chhin fûng-sṳ̀n ke kiê-kûng; sân-yòng-kú; lâu thúng-liâng thai-kiûn ke kiûn-vòng.

³² Ká-sṳ́ ngì cho ngong-tong ke sṳ, chhṳ-kô chhṳ-thai, ya-he yîm-mèu fái-sṳ, chhiu oi yung sú êm-choi!

³³ Luk ngiù-nen, voi tet-tó nen-yù; tá phi-kûng, phi-kûng voi chhut-hiet; liàu ngìn fat-khién, voi ngiâ-hí chên-tôn.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan