Bìoball air-loidhne

Chṳ̂m-ngièn 29 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

¹ Ye̍t su chit-fa̍t chhiu ye̍t ngang-kiáng ke ngìn, voi chit-sṳ̀ phai-fai, mò fap-thu hó-yî.

² Chṳn-chhṳ̍t ngìn chen-kâ, ngìn-mìn fôn-hí khoai-lo̍k; sià-ok ngìn chṳp-chṳn, ngìn-mìn pî-sông tho-than.

³ Oi-mu chṳ-fi ke, sṳ́ â-pâ fôn-hí; kiet-kâu kî-ńg ke, chhòi-sán liáu chhiang-chhiang.

⁴ Kiûn-vòng hàng-sṳ kûng-ngi, koet-kâ chhiu kiên-thin; na-he thâm-vû fú-phai, koet-kâ chhiu me̍t-mòng.

⁵ Fàm he ô-mì fung-sṳ̀n lìn-sa ke, chhiu-he sat lò-mióng pan kì ke kiok.

⁶ Sià-ok ngìn fam-chhui, ham-ngi̍p lò-mióng; chṳn-chhṳ̍t ngìn chhong-kô, fôn-hí khoai-lo̍k.

⁷ Chṳn-chhṳ̍t ngìn chûn-chhung khiùng-khú ngìn ke khièn-li; sià-ok ngìn chhiu mò án-ngiòng ke thùng-chhìn-sîm.

⁸ Ngau-man ngìn chhai sàng-tú chṳ-chho fun-lon; chṳ-fi ngìn phìn-sit pak-siang ke fun-nu.

⁹ Chṳ-fi ngìn khúng-ko ngong-ngìn vàn-chhiòn mò-háu; ngong-ngìn m̀-he fat-khién chhiu thai-seu thai-nau.

¹⁰ Hau chhṳ̀-ngìn ke chhin-hen vàn-chhiòn ngìn, me sióng-oi hoi chṳn-chhṳ̍t ngìn ke miang.

¹¹ Ngong-tong ngìn at-tó chhiu piang chhut-lòi; chṳ-fi ngìn hiáu-tet khúng-chṳ phì-hi.

¹² Chṳp-chṳn-chá na fôn-hí thâng phong-fûng ke fa, kì ke phu-ha yit-thin voi pien-cho kiên-sṳ̀n.

¹³ Khiùng-khú ngìn lâu khî-fu ngìn ke chhai sṳ-kiên tù-tó, Song-chú pûn lióng-sà ke muk-chû phiàng-phiàng khon-tet-tó.

¹⁴ Kiûn-vòng yung kûng-chṳn phan-ton khiùng-khú ngìn, kì ke vòng-vi chhiu voi yit-chhṳ̍t kiên-thin.

¹⁵ Yung chuk-siû kón-kau nèn kâ-thiâm chṳ-fi; fong-thong ke chṳ́-ńg sṳ́ â-mê kien-seu.

¹⁶ Sià-ok ngìn kín tô, chhui-ok kín chen-kâ; chṳn-chhṳ̍t ngìn voi khon-tén kì-têu sôi-phai.

¹⁷ Oi kón-kau ngì ke lai-é, kì chhiu sṳ́ ngì yû phìn-ôn, ya pûn ngì ke sîm khoai-lo̍k.

¹⁸ Na mò Song-ti ke yi-siong, ngìn-mìn chhiu lám-sám lòi; chûn-sú Song-ti kau-sṳ ke, sṳ̍t-chhai yû fuk-hi ô!

¹⁹ Tân-tân yung kóng-fa, kón-kau phu̍k-ngìn mò-háu; sûi-yèn kì liáu-kié, hàn-he mò-oi chhap ngì.

²⁰ Ngì khon-tó kóng-fa sùi-phien ke ngìn mò? Ngong-tong ngìn pí kì hàn-kha yû hî-mong.

²¹ Ngìn chiông phu̍k-ngìn chhiùng-se chiúng-to thai, liá phu̍k-ngìn to-mî chhiu voi pa-cham kì ke chhòi-sán.

²² Yùng-yi fat-khién ke voi ngiâ-hí siông-châng, chhin-kiak fat phì-hi ke tô-tô fam-chhui.

²³ Ngìn ke kiêu-ngau sṳ́ kì kong-pî; sîm chhùn khiâm-pî su-ngìn chûn-chhung.

²⁴ Ngìn lâu chhe̍t-é kiet-tóng, chhiu-he hoi chhṳ-kâ; kì chhai fap-thìn fat-sṳ, m̀-kám kóng sṳ̍t-fa.

²⁵ Ngìn só-kiâng ke, voi sàng-cho kì ke ham-chiáng; sin-kho Song-chú, kì chhiu tet ôn-yèn chhṳ-chhai.

²⁶ Ngìn-ngìn sióng khiù thúng-chhṳ-chá ke ên-fi; khì-sṳ̍t chṳ́-yû Song-chú sṳ̂n-chông chṳn-ngi.

²⁷ Ngi-ngìn nâu put-ngi ke ngìn; ok-ngìn hen chṳn-chhṳ̍t ke ngìn.

Lean sinn:

Ceanglaichean taic

Sanasan