Chṳ̂m-ngièn 14 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

¹ Chṳ-fi ke fu-ńg kien-li̍p kâ-thìn; ngong-tong ke fu-ngìn chhîn-sú chhak-san.

² Hàng-vì chṳn-chhṳ̍t ke ngìn kin-vi Song-chú; hàng-sṳ kúi-cha ke ngìn chhiu méu-sṳ Kì.

³ Ngong-ngìn yîn-vi kiêu-ngau tô-choi su piên-tá; chṳ-fi ngìn ke ngièn-ngî voi pó-fu chhṳ-kâ.

⁴ Mò ngiù hó kâng-chung, ńg-kuk khiam-sû; yû ngiù then chhut-li̍t, ńg-kuk fûng-tên.

⁵ Sṳ̀n-sṳ̍t ke chṳn-ngìn m̀-voi kóng fâ-liâu; cho ká kien-chṳn ke chôn-mùn kóng pha̍k-chhe̍t.

⁶ Ngau-man ngìn chhìm chṳ-fi chúng-he chhìm m̀-tó; mìn-lî ke ngìn kha yùng-yi tet-tó chṳ-sṳt.

⁷ Ngì oi yén-lì ngong-tong ngìn, yîn-vi tui kì ke choi tet m̀-tó chṳ-sṳt.

⁸ Chhûng-mìn ngìn ke chṳ-fi pûn kì tî tông-hàng ke lu; ngong-tong ngìn ngong-to chhṳ-kâ phien chhṳ-kâ.

⁹ Ngong-tong ngìn chiông vàn chhui-chai khon-cho hó-seu; chṳn-chhṳ̍t ngìn hiáu-tet fu-siông sṳ̂-ên.

¹⁰ Sîm-kôn-tú ke sèu-khú chhṳ-kâ chang tî; sîm-kôn-tú ke hí-lo̍k phe̍t-ngìn mò-fun.

¹¹ Sià-ok ngìn ke fòng-vuk yit-thin vang-thet; chṳn-chhṳ̍t ngìn ke vuk-hâ thin-chho̍k hîn-vong.

¹² Yû yit-thiàu lu khon-lòi chhin-chhṳ̍t, chúng-he chui-mî theu-to sí-mòng.

¹³ Fôn-seu tông-chûng, sîm ya voi sông-thung; fôn-lo̍k ko-hi, hàn-he voi yù-sèu.

¹⁴ Ok yû ok-po; san yû san-po.

¹⁵ Ngong-chhṳ̍t ngìn sṳ-sṳ siông-sin; chîn-mìn ngìn phu-phu séu-sîm.

¹⁶ Chṳ-fi ngìn hàng-sṳ séu-sîm, yén-lì fo-tôn; ngong-tong ngìn lû-fû yu ngang-kiáng.

¹⁷ Tông-kiak pot-at ke ngìn cho-sṳ fù-thù; sîm-fài kúi-kie ke ngìn chhin tet-ngìn-nâu.

¹⁸ Ngong-chhṳ̍t ke ngìn chhṳ-kâ sṳ̀n-su ngong-tong ke kiet-kó; thûng-tha̍t ke ngìn tet-tó chṳ-sṳt cho kì ke miên-liù.

¹⁹ Fái-ngìn chhai hó-ngìn mien-chhièn tâi-thèu; sià-ok ngìn hòng-fu̍k chhai chṳn-chhṳ̍t ngìn mùn-héu.

²⁰ Khiùng-khú ngìn lièn lìn-sa tû nâu kì; hó-ngiak ngìn phèn-yû kín-lòi kín-tô.

²¹ Méu-sṳ lìn-sa ke yû-chhui; lìn-mén khiùng-khú ke yû-fuk.

²² Sióng-cho fái-sṳ ke, kám m̀-voi ham-ngi̍p mì-thù? Sióng-oi hàng-san ke, tet-tó yìn-chhṳ̀ lâu chûng-sṳ̀n.

²³ Sat-mâng kûng-chok, tai-lòi chhòi-fu, kûi-ngit khûng-thàm, chṳ-to khiùng-khú.

²⁴ Chṳ-fi ngìn ke chhòi-fu cho kì-têu ke miên-liù; ngong-tong ngìn ke ngì-ngong kiet-khiu̍k hàn-he ngì-ngong.

²⁵ Sṳ̀n-sṳ̍t ke kien-chṳn kiu ngìn sâng-miang; hî-ká ke kien-chṳn voi sông-hoi ngìn.

²⁶ Kin-vi Song-chú ke chhiu yû yí-kho; kì ke chṳ́-ńg ya yû phit-nan-só.

²⁷ Kin-vi Song-chú he sâng-miang ke chhièn-ngièn, voi sṳ́-ngìn lì-khôi sí-mòng ke lò-mióng.

²⁸ Ngìn-mìn tô he kiûn-vòng ke kông-yùng; ngìn-mìn séu siong-chṳ̂n vòng-sṳt sôi-phai.

²⁹ Mò sùi-phien fat-khién, thai-yû chhûng-mìn; thet yùng-yi pot-at, kâ-thiâm ngong-tong.

³⁰ Sîm-phìn hi-fò sṳ̂n-thí không-khien; chhit-tu hoi-ngìn sṳ̂n-sîm phai-fái.

³¹ Khî-fu khiùng-khú ngìn he vú-yu̍k chhóng-chho Chú; lìn-mén kân-khú ke ngìn chhiu-he chûn-kin Chú.

³² Sià-ok ngìn chhai fam-nan chûng thin-chho̍k voi kang-tó; chṳn-chhṳ̍t ngìn lìm-chûng ke sṳ̀ hàn yû-hó yí-kho.

³³ Chṳ-fi chhai chhûng-mìn ngìn ke sîm-chûng ôn-kî, chhai ngong-tong ngìn sîm-chûng mò hién-mìn chhut-lòi.

³⁴ Chṳn-ngi sṳ́ koet-kâ khiòng-sṳn; chhui-ok sṳ́ mìn-chhu̍k mùng-siû.

³⁵ Mìn-lî ke phu̍k-ngìn mùng kiûn-vòng pô-chióng; hàng-sṳ kien-seu ke thin-chho̍k su chit-fa̍t.

Lean sinn:

Ceanglaichean taic

Sanasan