Chṳ̂m-ngièn 1 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Chṳ̂m-ngièn ke Ka-chhṳ̍t

¹ Thai-ví ke lai-é, Yî-set-lie̍t-vòng Só-lò-mùn ke chṳ̂m-ngièn:

² Liá-têu chṳ̂m-ngièn voi pûn ngìn ngin-sṳt chṳ-fi, tet-tó kau-hiun, lî-kié kiet-ngièn ke yi-sṳ.

³ Kì-têu voi kâu ngìn ngióng-pân ko mìn-chṳ ke sên-fa̍t, ngióng-pân cho kûng-ngi, kûng-phìn lâu chṳn-chhṳ̍t ke ngìn.

⁴ Kì-têu voi pûn ngong-chhṳ̍t ke ngìn pien-cho chîn-mìn, sṳ́ heu-sâng-ngìn yû chṳ-sṳt, hiáu-tet fûn-phe̍t sṳ-fî.

⁵ Yû chṳ-fi ke thâng-tó, chhiu kien-kâ yû ho̍k-mun, mìn-lî ke ngìn thâng-tó, chhiu tet-tó yîn-thô,

⁶ lòi liáu-kié chṳ̂m-ngièn lâu pí-yi, lòi mìn-pha̍k chṳ-fi ngìn ke fa lâu liang-é.

⁷ Kin-vi Song-chú he chṳ-sṳt ke khôi-thèu. Ngong-tong ngìn khon-khiâng chṳ-fi lâu kau-hiun.

Khien-va Heu-sâng-ngìn

⁸ Lai-é â, oi thâng ngiâ-pâ ke kau-hiun, m̀-hó lì-khôi ngiâ-mê ke kau-sṳ;

⁹ yîn-vi kì-têu chhiong-he ngì só-tai chhin-chiâng ke mo-é, chhiong-he ngì kiáng-hong pó-pi ke pha̍t-lien.

¹⁰ Lai-é â, na-he yû fái-ngìn lòi yín-yu ngì, chhiên-van m̀-hó thèn kì-têu.

¹¹ Na-he kì-têu kóng: “Khiung-ha lòi-hi, mài-fu̍k chhṳ̀ ko-lu-ngìn, mò-lun kì he má-ngìn, m̀-sṳ́ lî-yù, cheu tá!

¹² Ngài-têu oi chhiong yîm-kiên chiông kì-têu sâng-sâng thûn lo̍k-hi, vàn-chhiòn sṳ̍t-thet, chhiu-chhiong ngìn tiet-lo̍k chhṳ̂m-hâng tú!

¹³ Ngài-têu voi tet-tó kok-chúng ke chhòi-pó, vuk-tú voi chông-mân chhióng-lòi ke tûng-sî!

¹⁴ Lòi teu-kú ô, thai-kâ khiung-ha yung yit-chak chhièn-thoi!”

¹⁵ Lai-é â, m̀-hó lâu kì-têu khiung-ha hàng, oi kim-chṳ́ ngì ke kiok hàng kì-têu ke lu;

¹⁶ kì-têu ke kiok chéu-tén hi hàng sià-lu, kì-têu kiak-kiak sióng-oi hoi-ngìn liù-hiet.

¹⁷ Tiâu-é khon-tén ke sṳ̀, lòi-sat lò-mióng, liá he mò-chhái kûng ke;

¹⁸ chúng-he liá-têu fái-ngìn só-sat ke lò-mióng, he liù chhṳ-kâ ke hiet, hoi chhṳ-kâ ke miang.

¹⁹ Yit-chhiet thâm-chhòi ke ngìn só tù-tó ke chhiu-he án-ngiòng; thâm-chhòi ke sîm chhióng-chéu ke he kì-têu ke miang.

Chṳ-fi ke Fû-sâng

²⁰ Chṳ-fi chhai kiê-hong fû-ham, chhai thai-chung chhòng-só kín-hêm,

²¹ chhai nau-ngie̍t ke kiê-thèu thai-sâng sê, chhai sàng-mùn phòng-piên kín chhut-sâng kóng:

²² “Ngong-chhṳ̍t ke ngìn â, ngì-têu fôn-hí ngong-chhṳ̍t oi to kí-sṳ̀? Ngau-man ngìn fôn-hí ngau-man, ngong-tong ngìn nâu chṳ-sṳt oi to kí-kiú?

²³ Ngì-têu oi thâng ngài ke khien-va; ngài oi chiông ngài ke sîm-sṳ̂ tui ngì-têu hién-mìn, chiông ngài ke fa kâu ngì-têu mìn-pha̍k.

²⁴ Ngài ham ngì-têu, ngì-têu m̀-thâng; ngài ya̍k ngì-têu, ngì-têu m̀-tap;

²⁵ fán-chón khon-khiâng ngài yit-chhiet ke khien-va, m̀ ngien-yi chiap-su ngài ke chit-phi.

²⁶ Yîn-vi án-ngiòng, ngì-têu tù-tó châi-nan ke sṳ̀, ngài chhiu oi seu ngì-têu; ngì-têu kiâng-to pi̍t-pi̍t-chhat, ngài ya oi sâu-nat ngì-têu.

²⁷ Chho̍k-kiâng chhiong thai-fûng lìm-to ngì-têu, châi-nan chhiong khòng-fûng lòi-to, kip-nan thung-khú kong-hâ ke sṳ̀, ngài hàn-he oi sâu-nat ngì-têu.

²⁸ “Ke-sṳ̀, kì-têu voi khiù-ham ngài, chúng-he ngài mò-oi en; kì-têu voi chhìm ngài, chúng-he chhìm m̀-tó.

²⁹ Kì-têu nâu chṳ-sṳt, ya m̀-sṳt kiet-sîm kin-vi Song-chú;

³⁰ kì-têu chhiùng-lòi m̀-thâng ngài ke khien-va, fán-chón khon-khiâng ngài yit-chhiet ke chit-phi.

³¹ Só-yî, kì-têu oi sṳ̍t chhṳ-kâ só-kiet ke kó-chṳ́, pûn chhṳ-kâ só-sat ke kie-mèu chhang-to páu-páu.

³² Ngong-chhṳ̍t ke ngìn yîn-vi hàng vâi-lu sóng-sṳt sâng-miang; ngong-tong ngìn yîn-vi sùi-phien ko-ngit hoi-sí chhṳ-kâ.

³³ Chúng-he thâng-chhiùng ngài ke, voi ôn-chhiòn ko-ngit; kì-têu voi hióng-su phìn-ôn, m̀-kiâng châi-fo.”

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan