Bìoball air-loidhne

Chhòn-tho Sû 7 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Chṳ-fi lâu Ngong-tong

¹ Hó miàng-sâng yàng-ko kui-chhung ke hiông-súi; sí-ngit pí sâng-ngit kha chhung-yeu.

² Hi sông-kâ yàng-ko hi phan hí-sṳ ke kâ-thìn; yîn-vi sí he tak-ke ngìn ke kiet-khiu̍k, sâng-ngìn oi chiông liá-sṳ piong chhai sîm-tú.

³ Yù-sông yàng-ko fôn-seu; mien-hong sûi-yèn tai-tén sèu-yùng, chúng-he ngìn-sîm voi tet-tó hó-chhu.

⁴ Chṳ-fi ngìn kha oi hi sông-kâ; ngong-ngìn chṳ́-sióng hi khoai-lo̍k ke kâ.

⁵ Thâng chṳ-fi ngìn ke chit-phi, yàng-ko thâng ngong-ngìn ke chan-mî.

⁶ Ngong-ngìn ke seu-sâng, chhiu-chhiong net-è chhai vo̍k-thèu hâ sêu ke pi̍t-po̍k sâng. Liá ya he khûng-hî.

⁷ Chṳ-fi ngìn cha-khî phe̍t-ngìn ke sṳ̀, kì chhiu pien-cho ngong-ngìn. Sû-mâi ngìn voi phai-fái ngìn-sîm.

⁸ Hó-thèu put-yì hó-mî. Ngiûn-nai yàng-ko kiêu-ngau.

⁹ Ngì ke sîm m̀-hó chho̍k-kip to fat-khién; su-hi liù chhai ngong-ngìn ke sîm-hiûng.

¹⁰ M̀-hó kóng: “Cho má-ke thèu-pái ke ngit-è pí liá-ha kha hó ko?” Án-ngiòng mun he mò chṳ-fi ke.

¹¹ Chṳ-fi lâu chú-sán khiung-yong chhin hó, tui sâng-ngìn chhin yû ka-chhṳ̍t.

¹² Chṳ-fi lâu kîm-chhièn khiung-yong voi pí-yim ngìn. Chúng-he chṳ-fi voi pó-chhiòn chṳ-fi ngìn ke sâng-miang; liá chhiu-he yû chṳ-sṳt ke hó-chhu.

¹³ Oi sṳ̂-sióng Song-ti ke chok-vì. Kì áu-vân ke, má-ngìn cho-tet sṳ́ kì pien-chhṳ̍t nè?

¹⁴ Sṳ-sṳ sun-li ke sṳ̀, ngì oi fôn-hí khoai-lo̍k; fam-nan ke sṳ̀, m̀-hó m̀ ki-tet: Hí-lo̍k lâu fam-nan lûng-chúng yû Song-ti ke chṳ́-yi. Mò ngìn tî chiông-lòi ke sṳ voi pien-cho ngióng-pân.

¹⁵ Chhai khûng-hî ke ngìn-sên ngài khon-ko chhin-tô ke sṳ. Hó-ngìn hàng-san, fán-chón chó-sí; fái-ngìn chok-ok, tiên-to chhòng-su.

¹⁶ Hàng-san m̀-hó ko-thèu, ya m̀-hó chhûng-mìn ko-thèu, hoi-tó chhṳ-kâ yû má-ke hó-chhu nè?

¹⁷ M̀-hó kín-cho fái-sṳ, ya m̀-hó cho ngong-ngìn, án-chó sí cho-má-ke nè?

¹⁸ Kin-vi Song-ti ke ngìn liá lióng-hong ngièn-chet lûng-chúng oi chûn-sú, m̀-hó tân-tân sú yit-hong.

¹⁹ Chṳ-fi pûn ngìn ke nèn-li̍t yàng-ko sàng-tú sṳ̍p-ke kôn-yèn ke nèn-li̍t.

²⁰ Sṳ-song mò hó-ngìn yit-chhṳ̍t hàng-san yu m̀-sṳt fam-ko chhui.

²¹ M̀-hó chiông phe̍t-ngìn ke fa chhiòn-phu piong chhai sîm-tú; kiâng-pha ngì voi thâng-tó phu̍k-ngìn chu-ma ngì.

²² Yîn-vi ngì sîm-tú tî, ngì ya sṳt chia̍p-chia̍p chu-ma phe̍t-ngìn.

²³ Ngài sṳt yung ngài ke chṳ-fi chhṳ-ko liá só-yû ke sṳ. Ngài kiet-sîm chhìm-khiù chṳ-fi, chúng-he chṳ-fi hàn-he lì ngài tông-yén.

²⁴ Má-ngìn cho-tet chhìm-chhut sâng-miang ke yi-ngi nè? Liá he thet-chhṳ̂m, tông-nàn liáu-kié.

²⁵ Ngài yit-sîm yit-yi oi tî, oi ngiên-kiu, oi chhìm chṳ-fi lâu van-sṳ ke lî-yù; ngài yu oi liáu-kié sià-ok, vù-tî, ngong-tong lâu tiên-khòng.

²⁶ Ngài fat-hien ke fu-ngìn-kâ pí sí hàn-kha tet-ngìn-kiâng: Kì ke oi-chhìn chhiong ham-chiáng, chhiong lò-mióng; kì ke sú chhiong só-lien án-ngiòng nám-tén ngì. Song-ti só fôn-hí ke ngìn chhiu voi thot-lì kì ke sú, chúng-he yû-chhui ke ngìn voi pûn kì chhàn-tó.

²⁷ Chhòn-tho-chá kóng: Liá he ngài chhìm tap-on ke sṳ̀, yit-si̍t yit-si̍t-é fat-hien chhut-lòi ke.

²⁸ Ngài sióng-oi chhìm-chhut khì-thâ ke tap-on, chúng-he chhìm m̀-tó. Yû-ngìn kóng: “Chhai yit-chhiên ke nàm-ngìn chûng, ngài chhìm-tó yit-ke chṳn-chhṳ̍t ke ngìn, chúng-he chhai ńg-ngìn chûng, yit-ke ya chhìm m̀-tó.”

²⁹ Chúng-he, ngài só ho̍k-tó ke chṳ́-yû yit-khien sṳ: Song-ti só chho ke ngìn pún-lòi he chṳn-chhṳ̍t ke, chúng-he kì-têu sióng-chhut chhin-tô kúi-kie.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan