Chhòn-tho Sû 3 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Song-ti sṳ́ Van-sṳ yû Thin-khì

¹ Thiên-ha van-sṳ lûng-chúng yû thin-khì, chhiòn yû Song-ti thi̍t-phe̍t ke sṳ̀-kiên:

² Chhut-se yû-sṳ̀, sí-mòng yû-sṳ̀; châi-chung yû-sṳ̀, pâng-thet yû-sṳ̀;

³ sat-hoi yû-sṳ̀, yî-chhṳ yû-sṳ̀; chhak-thet yû-sṳ̀, hí-chho yû-sṳ̀;

⁴ kieu-chṳ̂ yû-sṳ̀, fôn-seu yû-sṳ̀; ôi-sông yû-sṳ̀, thiau-vú yû-sṳ̀;

⁵ thùng-fòng yû-sṳ̀, fûn-fòng yû-sṳ̀; chhîn-me̍t yû-sṳ̀, lâng-lo̍k yû-sṳ̀;

⁶ chhìm-khiù yû-sṳ̀, sṳt-lo̍k yû-sṳ̀; pó-chhùn yû-sṳ̀, vok-thet yû-sṳ̀;

⁷ chhá-lan yû-sṳ̀, liòn-pú yû-sṳ̀; tiâm-chhin yû-sṳ̀, kóng-fa yû-sṳ̀;

⁸ thung-siak yû-sṳ̀, yen-hen yû-sṳ̀; chan-chên yû-sṳ̀, fò-phìn yû-sṳ̀.

⁹ Án-ngiòng, cho-se ke ngìn só-yû ke lò-luk yû má-ke ka-chhṳ̍t nè?

¹⁰ Ngài khon-chhut Song-ti sṳ́ sṳ-kiên ngìn pà tông-chhûng ke tâm-thèu.

¹¹ Song-ti chho ke van-vu̍t lûng-chúng yû sṳt-tông ke sṳ̀-kiên, lòi hién-chhut van-vu̍t ke khì-meu. Kì ya sṳ́ sṳ-kiên ngìn yû yún-sên ke kôn-ngiam, chúng-he Kì tui-thèu to-mî só-cho ke, ngìn mò phan-fap vàn-chhiòn mìn-pha̍k.

¹² Só-yî ngài tî, yit-sên-ngìn fôn-hí khoai-lo̍k, yu cho hó-sṳ, sṳ-kiên mò pí liá kha hen-fuk ke.

¹³ Ngài-têu thai-kâ yû-hó sṳ̍t yû-hó lîm, hióng-su lò-luk ke sṳ̀n-kó, liá ya he Song-ti ke ên-su.

¹⁴ Ngài tî, Song-ti só-cho ke yit-chhiet yún-yén chhòng-chhùn; ngìn mò-fap tui Song-ti ke chok-vì chen-kâ ya-he kám-séu. Song-ti án-ngiòng cho, he oi ngìn kin-vi Kì.

¹⁵ Liá-ha ke sṳ ya-he chiông-lòi voi fat-sên ke sṳ, thèu-pái chó chhiu yû lé; yîn-vi Song-ti sṳ́ khiung-yong ke sṳ chhùng-fu̍k chhut-hien.

Sṳ-kie Mò Kûng-phìn

¹⁶ Nang-ngoi, chhai ngit-thèu hâ, yin-kôi oi yû kûng-tho lâu chṳn-ngi ke só-chhai, ngài khon-tó ke fán-chón he sià-ok.

¹⁷ Ngài sîm-tú sióng: “Hó-ngìn, fái-ngìn, Song-ti chhiòn-phu oi sṳ́m-phan; yîn-vi tak-khien sṳ-chhìn, kok-chúng hàng-vì ke sṳ̀-kiên chhiòn-phu thin-hó lé.”

¹⁸ Ngài sîm-tú ya sióng: Song-ti kháu-ngiam sṳ-kiên ngìn, he oi pûn ngài-têu tî, ngài-têu mò pí khìm-chhu kha kô-mìn.

¹⁹ Ngìn lâu khìm-chhu ke miang-yun kiet-khiu̍k khiung-yong: Chhiòn-phu oi théu-hi, khiung-yong ya voi sí. Ngìn pin mò pí khìm-chhu kha-khiòng; yîn-vi chhiòn-phu he khûng-hî.

²⁰ Chhiòn-phu oi chón-to khiung yit-ke só-chhai; kì-têu tui nài-thú lòi, ya oi kûi-chón nài-thú hi.

²¹ Má-ngìn tî ngìn ke lìn voi sông-thiên, khìm-chhu ke fùn voi lo̍k thi tái-hâ nè?

²² Só-yî ngài khon, ngìn hióng-su kì lò-luk ke sṳ̀n-kó, sṳ-kiên mò pí liá kha hen-fuk ke; liá chhiu-he kì ke miang-yun. Má-ngìn nèn sṳ́ kì khon-tó sṳ̂n-heu ke sṳ nè?

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan