Bìoball air-loidhne

Chhòn-tho Sû 2 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

¹ Ngài sîm-tú sióng: “Lòi hióng-lo̍k chhṳ-khon â! Lòi hióng-fuk ô!” Chúng-he liá ya he khûng-hî.

² Ngài fat-hien tú-káu chhiu-chhiong tiên-khòng, hióng-lo̍k yu yû má-ke li-yit nè?

³ Ngài sîm-tú sióng: “Vi-tó chûi-khiù chṳ-fi ke sîm-ngien, ngài oi yung chiú chhìm-khiù khoai-lo̍k, lîm-to chui miâ-miâ-é.” Ngài sióng, fe̍t-chá liá he ngìn-sên chhai sṳ-kiên tón-tón ke ngièn-ngit chûng chui-hó ke sên-fa̍t fông-sṳt.

⁴ Ngài chhiu cho thai kûng-chhàng, vi chhṳ-kâ hí-vuk, chung phù-thò.

⁵ Ngài siû-kien thìn-yen kó-yèn, chung kok-chúng kó-su.

⁶ Ngài yet súi-chhṳ̀, hó pûn su-é yim-súi.

⁷ Ngài yû chhin-tô nù-phu̍k lâu nù-pî, yû-têu he mâi-lòi ke, yû-têu he chhai ngâ vuk-hâ chhut-se ke. Ngài pí só-yû yî-chhièn chhai Yâ-lu-sat-lâng he̍t-ko ke ngìn yû hàn-kha tô ke ngiù-yòng.

⁸ Ngài vi chhṳ-kâ chit-chhùn kîm-ngiùn, yu sû-si̍p kiûn-vòng ke chhòi-pó lâu tak-sén ke chhòi-pó. Ngài yû chhin-tô chhong-kô ke nàm-ńg lâu se-chiá, ngài sióng-oi má-ke, chhiu yû má-ke.

⁹ Mò m̀-chho̍k, ngài chhin khiòng-thai, yàng-ko só-yû yî-chhièn chhai Yâ-lu-sat-lâng he̍t-ko ke ngìn; m̀ tân-chhiang án-ngiòng, ngài yit-chhṳ̍t tông yû chṳ-fi.

¹⁰ Ngài ke muk-chû sióng-oi khon ke, ngài ke sîm sióng-oi hióng-su ke khoai-lo̍k, chhiu chhin-miang hióng-su, mò su yok-suk. Ngài hióng-su chhṳ-kâ lò-luk tet-tó ke khoai-lo̍k; liá he ngài yin-kôi tet-tó ke fuk-fun.

¹¹ Chúng-he, tông ngài fì-sióng chhṳ-kâ ke sṳ̀n-chhiu, sióng-tó só fu-chhut ke lò-luk, ngài chhiu tî liá yit-chhiet he khûng-hî, chhiòn-phu he chok-fûng; chhai ngit-thèu hâ lûng-chúng mò má-ke ka-chhṳ̍t.

¹² Chúng-kóng, yit-ke kiûn-vòng só-nèn cho ke, chhiòn-phu he thèu-pái ke kiûn-vòng cho-ko ke. Só-yî, ngài yu chhùng-sîn sṳ̂-sióng chṳ-fi, tiên-khòng, ngong-tong yû má-ke fûn-phe̍t.

¹³ Án-ngiòng, ngài chang khon-chhut chṳ-fi yàng-ko ngong-tong, chhiu-chhiong kông-mìn yàng-ko vû-am.

¹⁴ Chhûng-mìn ngìn khon chhîn-chhú thèu-chhièn ke tho-lu; ngong-tong ngìn chhai vû-am chûng miâ mò lu. Chúng-he, ngài ya tî kì-têu ke miang-yun to-mî chhiòn-phu khiung-yong.

¹⁵ Ngài sîm-tú sióng: “Ngong-tong ngìn tù-tó ke, ngài ya yit-thin voi tù-tó. Ngài chhin chhûng-mìn yu yû má-ke hó-chhu nè?” Ngài sîm-tú kóng: “Mò pan-ti̍t, chhiòn-phu he khûng-hî!”

¹⁶ Chhûng-mìn ngìn lâu ngong-tong ngìn khiung-yong, mò ngìn voi kiú-kiú ki-ngiam kì-têu; yîn-vi chhai chiông-lòi ke ngit-è, kì-têu chhiòn-phu voi pûn-ngìn m̀ ki-tet. Mò-lun he chîn he ngong, chhiòn-phu voi sí-thet.

¹⁷ Só-yî, ngài chhin nâu ngìn-sên; ngit-thèu hâ só-cho ke sṳ chṳ́-yû sṳ́ ngài chhâu-fàn thin-thin. Chhiòn-phu he khûng-hî, chhiòn-phu he chok-fûng.

¹⁸ Ngit-thèu hâ lò-luk tet-lòi ke yit-chhiet ngài ya chhin nâu; yîn-vi ngài thin-chho̍k oi chiông tet-tó ke liù-pûn heu-lòi ke ngìn,

¹⁹ ke-ngìn he chîn he ngong, má-ngìn tî? Chúng-he, kì voi chóng-kón ngài chhai ngit-thèu hâ yung lò-luk, chṳ-fi tet-tó ke yit-chhiet sṳ̀n-kó. Liá ya he khûng-hî.

²⁰ Só-yî, ngài tui thèu-pái chhai ngit-thèu hâ ke lò-luk fî-sòng sṳt-mong.

²¹ Ngìn yung kì ke chṳ-fi, chṳ-sṳt, pún-sṳ só-tet lòi ke, chhiòn-phu oi liù hâ-lòi, pûn m̀-sṳt lò-luk ke ngìn sṳ̀n-chiap. Liá ya he khûng-hî, chhin mò kûng-phìn!

²² Ngìn chhai ngit-thèu hâ ke chhâu-sîm, sîn-khú, lò-luk, to-tái yû má-ke ka-chhṳ̍t nè?

²³ Ngìn yit-sên só-cho ke lûng-chúng he lò-khú sèu-fàn, lièn am-pû-sṳ̀ ya mò phìn-ôn. Liá ya he khûng-hî.

²⁴ Ngìn voi sṳ̍t voi lîm, hióng-su chhṳ-kâ lò-luk ke sṳ̀n-kó, chhiu son hen-fuk lé. Ngài khon liá ya he Song-ti sóng-su ke.

²⁵ Na m̀-he Song-ti sóng-su ke, má-ngìn voi yû hó-sṳ̍t? Má-ngìn hióng-su tet-tó nè?

²⁶ Song-ti su chṳ-fi, chṳ-sṳt lâu hí-lo̍k pûn ke-têu tet Kì fôn-hí ke ngìn; chúng-he Kì sṳ́ chhui-ngìn chhâu-lò, chiông kì-têu só chit-chhùn ke chhiòn-phu liù-pûn ke-têu tet Kì fôn-hí ke ngìn. Liá ya he khûng-hî, ya he chok-fûng.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan