Bìoball air-loidhne

Â-mô-sṳ̂ Sû 7 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Chhó-máng ke Yi-siong

¹ Chṳ-kô ke Song-chú pûn ngài khon-tó yit-ke kông-kín: Kì chho yit-khiùn chhó-máng. Ke-sṳ̀, thi-yit khì na̍p pûn vòng ke nùng-chok-vu̍t yí-kîn sû-kot, thi-ngi khì ke sîn-sún tông chhû-ngà.

² Ngài khon-tó chhó-máng pî-lòi, chiông thi-song ke nùng-chok-vu̍t chhiòn-phu sṳ̍t chhiang-chhiang. Só-yî ngài kóng: “Chṳ-kô ke Song-chú â, khiù Ngì sa-miên ngì ke chṳ́-mìn! Ngâ-kok ke heu-thoi yu mì-se yu ngiôn-ngio̍k, ngióng-pân su tet-he̍t nè?”

³ Song-chú ke sîm chhiu ngiôn hâ-lòi. Song-chú kóng: “Án-ngiòng, ngì só khon-tó ke sṳ m̀-voi fat-sên lé!”

Fó ke Yi-siong

⁴ Chṳ-kô ke Song-chú pûn ngài khon-tó yit-ke kông-kín: Kì oi yung fó lòi chit-fa̍t Kì ke chṳ́-mìn. Fó chiông thi-nài tái-hâ ke súi-ngièn chhiòn-phu sêu-châu yî-heu, yu khôi-sṳ́ sêu thi-mien-song só-yû ke tûng-sî.

⁵ Só-yî ngài kóng: “Chṳ-kô ke Song-chú â, chhiáng thìn hâ-lòi! Ngì ke chṳ́-mìn — Ngâ-kok ke heu-thoi yu mì-se yu ngiôn-ngio̍k, ngióng-pân su tet-he̍t nè?”

⁶ Song-chú ke sîm chhiu ngiôn hâ-lòi. Chṳ-kô ke Song-chú kóng: “Án-ngiòng, ngì só khon-tó ke sṳ m̀-voi fat-sên lé!”

Sien-thò ke Yi-siong

⁷ Chú pûn ngài khon-tó yit-ke kông-kín: Ngài khon-tó Chú khî chhai yit-san hí-hó ke chhiòng-thèu sùn, sú-hong nâ-tén sien-thò.

⁸ Song-chú mun ngài: “Â-mô-sṳ̂, ngì khon-tó má-ke?” Ngài en-kóng: “Sien-thò!” Só-yî Chú kóng: “Ngài oi chiông sien-thò tiau hí-lòi, pûn Ngài ke chṳ́-mìn Yî-set-lie̍t tî kì-têu chhiu-chhiong yit-san voi vang ke chhiòng. Liá-pái Ngài chhie̍t-tui m̀-voi sa-miên kì-têu lé!

⁹ Yî-sat heu-thoi lî-pai ke só-chhai yit-thin voi pûn-ngìn chhak-thet; Yî-set-lie̍t-ngìn ke sṳn-só chhiòn-phu voi su-tó pho-fái. Ngài oi yung chan-chên sṳ́ Yâ-lò-pô-ôn ke vòng-chhèu me̍t-mòng.”

Â-mô-sṳ̂ lâu Â-mâ-chhia

¹⁰ Pak-thi̍t-li-sàng ke chi-sṳ̂ Â-mâ-chhia phai-ngìn hi hiong Yî-set-lie̍t-vòng Yâ-lò-pô-ôn po-ko, kóng: “Â-mô-sṳ̂ chhai san-thung ngì ke ngìn-mìn, oi kì-têu phoi-ngia̍k ngì; kì ke ngièn-lun tui koet-kâ sông-hoi siông-tông thai.

¹¹ Kì kóng: ‘Yâ-lò-pô-ôn voi chhai chan-chhòng pûn-ngìn chhṳ̀-sí; Yî-set-lie̍t-ngìn yit-thin voi pûn-ngìn kiuk-chhut pún-thi, chok-to ngoi-koet hi.’ ”

¹² Â-mâ-chhia hiong Â-mô-sṳ̂ kóng: “Siên-kien â, hó chéu lé! Chón Yù-thai hi kóng yi-ngièn, chhai ke-vi chhon héu fan sṳ̍t!

¹³ Pak-thi̍t-li he kiûng-thìn ke sṳn-thien, he koet-kâ lî-pai ke chûng-sîm, m̀-chún ngì ki-siu̍k chhai liá-vi kóng yi-ngièn.”

¹⁴ Â-mô-sṳ̂ en Â-mâ-chhia kóng: “Ngài ngièn-lòi m̀-he siên-tî, ngài ya m̀-he siên-tî ke ho̍k-sâng. Ngài he mu̍k-yòng-ngìn, ya he kón-lî vù-fâ-kó-su lâu sông-su ke nùng-mìn.

¹⁵ Chúng-he, chhai ngài chóng-yòng ke sṳ̀, Song-chú chhîn-sṳ̂n fû-seu ngài, tui ngài kóng: ‘Oi hi hiong Ngài ke chṳ́-mìn Yî-set-lie̍t kóng yi-ngièn.’

¹⁶ Só-yî, Â-mâ-chhia â, ngì oi thâng Song-chú tui ngài kóng ke fa. Ngì m̀-chún ngài hiong Yî-set-lie̍t-ngìn kóng yi-ngièn, ya m̀-chún ngài hiong Yî-sat ke heu-thoi kóng kûng-kit ke fa.

¹⁷ Só-yî Song-chú án-ngiòng kóng: ‘Ngiâ pû-ngiòng voi chhai sàng-tú cho chhông-kî; ngì ke chṳ́-ńg chhiòn-phu voi chhai chan-chhòng sí-thet. Ngì ke thièn-thi voi pûn-ngìn chhong-liòng pûn-thet; ngì pún-ngìn voi sí chhai ngoi-pâng. Yî-set-lie̍t-ngìn yit-thin voi pûn-ngìn kiuk-chhut pún-thi, chok-to ngoi-koet hi.’ ”

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan