Bìoball air-loidhne

Â-mô-sṳ̂ Sû 6 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Yî-set-lie̍t ke Me̍t-mòng

¹ He̍t chhai Siak-ôn hióng-su ôn-lo̍k ke ngìn, lâu chhai Sat-mâ-li-â sân-táng láu-tó ôn-chhiòn ke ngìn â, ngì-têu chhám lé! Ngì liá-têu thai Yî-set-lie̍t koet-nui ke miàng-ngìn, su-ngìn chûn-kin ke ngìn â, ngì-têu chhám lé!

² Ngì-têu to Kap-nì-sàng hi khon, ya to Thai Ha̍p-mâ-sṳ, yèn-heu to Fî-li-sṳ-ngìn ke Kâ-thi̍t-sàng hi khon nâ! Liá-têu koet-kâ tông-chûng, yû nai-ke mò pí Yù-thai lâu Yî-set-lie̍t kha-khiòng? Kì-têu ke thú-thi, nai-ke mò pí ngì-têu ke kha-fat?

³ Ngì-têu láu-tó thai-nan lìm-thèu ke ngit-è hàn chhin-yén; sṳ-sṳ̍t-song, ngì-têu sṳ́ chhàn-phau ke thúng-chhṳ kín-lòi kín-khiûn.

⁴ Ngì liá-têu ngìn chhám lé! Ngì-têu chṳ́-yû tî vang chhai siong-ngà ke mìn-chhòng táng, ya-he chhô chhai ôn-lo̍k-yí, sṳ̍t-tén se-ngiù lâu phì-yòng ke ngiuk;

⁵ chhong-tén sîn-phiên ke kô, chhiong Thai-ví án-ngiòng yung su-khìm phan-cheu;

⁶ yit-vón yu yit-vón ke hó-chiú kín-lîm, hàn kò song-tén ke hiông-súi. Ngì-têu án-ngiòng hióng-fuk, chúng-he mò vi Yok-sit heu-thoi ke sôi-mì lòi pî-sông.

⁷ Só-yî, ngì-têu voi chui-siên pûn-ngìn kiuk-chhut koet-ngoi hi; ngì-têu fong-thong yen-lo̍k ke sên-fa̍t chhiu án-ngiòng kiet-suk lé.

⁸ Chṳ-kô ke Song-chú — Van-kiûn ke Ngièn-soi Song-ti chṳ́-tén chhṳ-kâ fat-sṳ, kóng: “Ngài chhin-nâu Yî-set-lie̍t-ngìn ke kiêu-ngau; Ngài chhin-hen kì-têu he̍t ke chhiong kiûng-thien ke vuk. Ngài oi chiông kì-têu ke kîn-sàng lâu tî-poi só-yû ke kâu-pûn thi̍t-ngìn.”

⁹ Na-he yit-kiên vuk hàn chhûn sṳ̍p-ke ngìn, liá sṳ̍p-ke ngìn to-mî ya voi mò-miang.

¹⁰ Sí-ngìn ke chhîn-chhu̍k lòi thô sṳ̂n-sṳ̂ hi sêu ke sṳ̀, kì voi tui vuk-tú chui mî-kiên ke ngìn kóng: “Yû ngìn lâu ngì khiung-ha mò?” Ke-ngìn voi en-kóng: “Mò lé.” Chhîn-chhu̍k kóng: “M̀-hó chhut-sâng, ngài-têu cho-m̀-tet kóng-hí Song-chú ke miàng.”

¹¹ Khon nâ! Song-chú yit min-lin, thai-kiên, se-kiên ke vuk-è chhiòn-phu voi vang chhiang-chhiang, sàng-cho lá-sap-tôi.

¹² Mâ voi chhai ngàm-sa̍k táng chéu mò? Ngìn voi chhai hói-tú sṳ́-ngiù kâng-chung mò? Chúng-he, ngì-têu chiông kûng-phìn pien-cho thu̍k-yo̍k, chiông chṳn-ngi pien-cho fú-yo̍k.

¹³ Ngì-têu chhṳ-khoâ tá-vang Lò-Tí-pâ. Ngì-têu kóng: “Ngài-têu kám m̀-he kho chhṳ-kâ ke li̍t-liong cham-liâng Kâ-nèn!”

¹⁴ Song-chú — Van-kiûn ke Ngièn-soi Song-ti án-ngiòng kóng: “Yî-set-lie̍t-ngìn â, Ngài oi sṳ́ ngoi-koet ke kiûn-chhui cham-liâng ngì-têu ke koet-kâ; pet tui Ha̍p-mâ ai-héu, nàm to Â-lâ-pâ hói-sùn, kì-têu oi lòi chien-tha̍p ngì-têu.”

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan