Bìoball air-loidhne

Â-mô-sṳ̂ Sû 5 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Fû-ham Yî-set-lie̍t-ngìn Fí-kói

¹ Thâng â, Yî-set-lie̍t-ngìn, Ngài oi vi ngì-têu chhong yit-sú ôi-kô:

² Ngìn-kâ-ńg Yî-set-lie̍t yí-kîn tiet-tó, hong m̀ hí-lòi lé. Kì pûn-ngìn fit chhai thi-song, mò-ngìn chiông kì fù hí-lòi.

³ Chṳ-kô ke Song-chú án-ngiòng kóng: “Yî-set-lie̍t ke sàng, phai-chhut yit-chhiên ke pîn-é, chhûn yit-pak ke chón-lòi; phai-chhut yit-pak sà, chhûn sṳ̍p sà chón-lòi.”

⁴ Song-chú hiong Yî-set-lie̍t-ngìn kóng: “Oi chhìm Ngài chang yû sâng-lu.

⁵ M̀-hó to Phe̍t-sṳ-pâ hi lî-pai. M̀-hó to Pak-thi̍t-li hi chhìm Ngài; yîn-vi Pak-thi̍t-li voi mò-thet. M̀-hó hi Kit-kap; yîn-vi Kit-kap ke ngìn voi pûn-ngìn chok-hi.”

⁶ Oi chhìm Song-chú, ngì-têu chang yû sâng-lu. Na-he ngì-têu m̀ hi chhìm Kì, Kì voi chhiong yit-chhṳn fó chiông Yok-sit ke heu-thoi sêu-thet. Liá-chhṳn fó voi chiông Pak-thi̍t-li ke ngìn-mìn sêu-thet, mò-ngìn voi tá-vû.

⁷ Ngì-têu voi tù-tó châi-nan lé! Yîn-vi ngì-têu vâi-khiuk chṳn-ngi, châu-tha̍p ngìn-mìn ke khièn-li!

⁸ Song-chú chhóng-chho sên-sṳ̀n, chho Méu-sên lâu Chhâm-sên. Kì ham ngit-sṳ̀-thèu pien-cho am-pû-thèu, chiông vû-am pien-cho kông-mìn. Kì chiông hói-yòng ke súi tó chhai thi-song. Kì ke miàng he Song-chú.

⁹ Kì sṳ́ sṳ-li̍t khiòng-thai ke me̍t-mòng, sṳ́ sàng-pó pûn-ngìn tá vang-thet.

¹⁰ Ngì-têu tông-nâu phe̍t-ngìn chhai fap-thìn chú-chhṳ̀ kûng-tho, kûng-chṳn vù-sṳ̂.

¹¹ Ngì-têu khî-fu khiùng-khú ngìn, chhióng kì-têu ke liòng-sṳ̍t; ngì-têu yung sa̍k-thèu hí chhin-chiâng ke thai-vuk, chúng-he chhie̍t-tui mò fap-thu he̍t; ngì-têu kâng-chung chhin-chiâng ke phù-thò-yèn, chúng-he chhie̍t-tui mò fap-thu lîm só-chhut ke chiú.

¹² Ngài tî ngì-têu ke chhui-ko tông-tô, chhui-ok tông-thai. Ngì-têu khî-fu hó-ngìn, pûn-ngìn sû-mâi, chhai fap-thìn yên-vóng khiùng-khú ngìn.

¹³ Liá he sià-ok ke sṳ̀-thoi; mo̍k koai chhûng-mìn-ngìn chhiòn-phu m̀ kóng-fa lé.

¹⁴ Oi chûi-khiù liòng-san, thot-lì sià-ok, ngì-têu chang yû sâng-lu. Án-ngiòng, chhiu cheu ngì-têu kóng ke, Song-chú — Van-kiûn ke Ngièn-soi Song-ti chang voi chṳn-kîn lâu ngì-têu khiung-ha.

¹⁵ Nâu sià-ok, oi liòng-san, chhai fap-thìn sṳ̂n-chông chṳn-ngi. Án-ngiòng, khó-nèn Song-chú — Van-kiûn ke Ngièn-soi Song-ti chhiu voi hiong Yok-sit heu-thoi chhûn-tó ke ngìn sṳ̂-ên.

¹⁶ Só-yî, Chṳ-kô ke Song-chú — Van-kiûn ke Ngièn-soi Song-ti án-ngiòng kóng: “Kiê-lu tak só-chhai voi yû pî-sông thai-kieu ke sâng, kóng: ‘Âi-châi! Âi-châi!’ Chhong ôi-kô ke ngìn chhiòn-phu pûn-ngìn chhiáng-thet lé, chṳ́-yû hi lâi kâng-chung-ngìn lòi then-sú thoi-kieu.

¹⁷ Phù-thò-yèn tú chṳ́-yû thâng-tó pî-sông ke kieu-sâng. Liá-têu sṳ yit-thin voi fat-sên, yîn-vi Ngài oi lòi chit-fa̍t ngì-têu.” Song-chú án-ngiòng siên-pu lé.

¹⁸ Tén Song-chú ke ngit-è lòi-to ke ngìn â, ngì-têu chhám lé! Song-chú ke ngit-è tui ngì-têu yû má-ke hó-chhu nè? Song-chú ke ngit-è tui ngì-têu he vû-am, m̀-he kông-mìn.

¹⁹ Ke ngit-è to ke sṳ̀, ngì-têu mò só-chhai hó chéu-sám, chhiong yit-ke ngìn sám-ko sṳ̂-é, yu tù-tó yùng! Yu chhiong yit-ke ngìn chón-to vuk-hâ, tông-thiám ke sṳ̀, yung sú fù-piak, yu pûn sà ngâu-tó.

²⁰ Song-chú ke ngit-è voi tai-lòi vû-am, m̀-he kông-mìn; ke he sông-sîm ke ngit-è, mò yit-si̍t-é hî-mong.

²¹ Song-chú án-ngiòng kóng: “Ngài chhin-nâu ngì-têu ke chiet-khì, ngiûn m̀-hâ ngì-têu ke thai-fi!

²² Ngì-têu hien ke sêu-fa-chi lâu su-chi, Ngài m̀ chiap-su; hien tông-phì ke thèu-sâng cho phìn-ôn-chi, Ngài ya mò-oi khon.

²³ Ngài mò fôn-hí ngì-têu chhàu-nau ke kô-sâng, ya mò-oi thâng ngì-têu thàn-cheu ke khìm-sâng.

²⁴ Fán-chón, oi pûn kûng-phìn chhiong thai-súi kún-kún chhûng-tén hâ! Oi pûn kûng-ngi chhiong hâi-súi chhṳ̍t-chhṳ̍t liù-tén hi!

²⁵ “Yî-set-lie̍t-ngìn â, chhai khóng-yâ ke si-sṳ̍p ngièn, ngì-têu pin-mò hien má-ke sên-ngì ya-he lî-vu̍t pûn Ngài!

²⁶ Liá-ha ngì-têu pà-hí chhṳ-kâ tiâu-khiet ke ngiéu-siong — Sat-ku vòng-sṳ̀n lâu Kâ-vûn sên-sṳ̀n.

²⁷ Só-yî Ngài oi chiông ngì-têu kiuk-to Thai-mâ-sṳ-kiet ngoi-poi yén-yén ke só-chhai hi.” Song-chú án-ngiòng siên-pu lé; Kì ke miàng he Van-kiûn ke Ngièn-soi Song-ti.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan