Bìoball air-loidhne

Â-mô-sṳ̂ Sû 4 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

¹ He̍t chhai Sat-mâ-li-â ke fu-ngìn-kâ â, oi thâng ngài ke fa! Ngì-têu phì-to chhiong Pâ-sân ke ngiù-mà. Ngì-têu khî-fu kân-khú ngìn, ap-pet khiùng-khú ngìn, ham ló-kûng chṳ̂m-chiú pûn ngì-têu lîm!

² Chṳ-kô ke Song-chú chṳ́-tén chhṳ-kâ ke sṳn-miàng fat-sṳ, kóng: “Ke-ngit yit-thin voi lòi, yû-ngìn voi yung kiêu-é chiông ngì-têu kiêu chhut-hi, chhiu-chhiong ǹg-è pûn kiêu-é kiêu-tó.

³ Ngì-têu voi yit-ke yit-ke pûn-ngìn thô-to chui-khiûn ke sàng-chhiòng khiet-héu, vok-chhut sàng-ngoi.” Song-chú án-ngiòng siên-pu lé.

Yî-set-lie̍t Hàn-he M̀ Fì-thèu

⁴ Chṳ-kô ke Song-chú án-ngiòng kóng: “Yî-set-lie̍t-ngìn â, cho ngì-têu to Pak-thi̍t-li hi fam-chhui â! Cho ngì-têu to Kit-kap hi chhin-liong fam-chhui â! Cho ngì-têu tak chêu-sṳ̀n hien sên-ngì, sâm-ngit fung-hien yit-pái só-tet ke sṳ̍p-fûn-chṳ̂-yit â!

⁵ Cho ngì-têu hi hien yû-kau ke piáng cho kám-ên ke chi â! Cho ngì-têu khoâ-khiéu án thai-fông ke kâm-sîm-chi â! Fán-chṳn liá-têu sṳ he ngì-têu chhṳ-kâ chhin-hau cho ke!

⁶ “He Ngài — Song-chú chiông kî-fông kong-to ngì-têu tak-chak sàng-tú, sṳ́ ngì-têu ke liòng-sṳ̍t thôn-chhie̍t. Chúng-he ngì-têu hàn m̀ kûi-hiong Ngài.

⁷ Ngì-têu ke nùng-chok-vu̍t sû-kot chhièn sâm-chak ngie̍t chui sî-yeu yí-súi ke sṳ̀-chiet, Ngài m̀ lo̍k-yí. Ngài chhai liá-sàng lo̍k-yí, chhai ke-sàng m̀ lo̍k-yí; Ngài sṳ́ liá-kâ thièn-thi yû-yí, sṳ́ ke-kâ thièn-thi khû-châu.

⁸ Yû lióng-sâm sàng ke ngìn-mìn choi-châu to ngiôn thái-thái, to fu-khiun ke sàng-sṳ chhìm súi ya mò fap-thu kié-hot! Chúng-he ngì-têu hàn-he m̀ kûi-hiong Ngài.

⁹ “Ngài — Song-chú sṳ́ ngì-têu ke ńg-kuk pot-phiang, pot-chhùng; Ngài phai chhó-máng sṳ̍t-chhiang ngì-têu ke chhiâng-chhoi, phù-thò, kám-lám, lâu vù-fâ-kó. Chúng-he ngì-têu hàn-he m̀ kûi-hiong Ngài.

¹⁰ “Ngài — Song-chú sṳ́ ngì-têu pot-vûn, chhiong yî-chhièn kong-pûn Âi-khi̍p-ngìn khiung-yong. Ngài chhai chan-chhòng chiông ngì-têu ke chhiâng-ngièn chhṳ̀ chhiang-chhiang, chhióng-chéu ngì-têu ke chan-mâ. Ngài sṳ́ ngì-têu phi-khûng pûn yàng-chûng sí-sṳ̂ ke chhu-mi chhung-to voi sí. Chúng-he ngì-têu hàn-he m̀ kûi-hiong Ngài.”

¹¹ Song-chú án-ngiòng kóng: “Ngài yí-kîn sêu-me̍t ngì-têu tông-chûng ke ngìn, chhiu-chhiong Ngài fí-me̍t Só-tô-mâ lâu Ngò-mô-lâ khiung-yong. Ngì liá-têu chhûn-tó mò-sí ke ngìn chhiu-chhiong tui fó-tôi tú chhû chhut-lòi ke yit-kî chhèu. Chúng-he ngì-têu hàn-he m̀ kûi-hiong Ngài.

¹² Só-yî, Yî-set-lie̍t-ngìn â, Ngài oi chit-fa̍t ngì-têu. Yîn-vi Ngài oi tui-fu ngì-têu, ngì-têu oi chún-phi hó-se lòi-kien Ngài — ngì-têu ke Song-ti!”

¹³ Khon â, Song-ti chho-sân, ya chho-fûng, chiông chhṳ-kâ ke chṳ́-yi lâu ngìn kóng; Kì chiông ngit-sṳ̀-thèu pien-cho am-pû-thèu, Kì kiok-tha̍p kô-thi, thúng-chhṳ phû-thiên-ha. Kì ke miàng ôn-to Song-chú — Van-kiûn ke Ngièn-soi Song-ti.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan