Thiap-sat-lò-nì-kâ Heu-sû 2 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Ke Put-fap-chá

¹ Hiûng-thi chí-moi â, koân-he ngài-têu ke Chú Yâ-sû Kî-tuk ke chai-lòi, pin kì oi chhi-si̍p ngài-têu thùng kì siông-fi ke sṳ, ngài-têu khiù ngì-têu,

² m̀-hó án kiak chhiu pûn “Chú chai-lòi ke ngit-è yí-kîn to lé” liá-chúng kóng-fap lòi yèu-thung, lòi chhâu-fàn. Khó-nèn yû ngìn kóng, liá kóng-fap he ngài-têu só chhòn, só kóng, ya-he siá chhai sin-é tî-poi ke.

³ Mò-lun má-ngìn yung má-ke fông-fap, ngì-têu m̀-hó pûn kì-têu phien-tó. Yîn-vi, ke ngit-è lòi-to yî-chhièn, thin-chho̍k voi yû thai phoi-ngia̍k; ke chu-thin oi me̍t-mòng ke Put-fap-chá voi chhut-hien.

⁴ Ke Put-fap-chá voi fán-tui yit-chhiet pûn-ngìn chhṳ̂n-cho sṳ̀n-mìn ya-he kin-pai ke tui-siong, kô-sṳ̂n chhṳ-kâ to yit-chhiet ke táng-kô; kì sṳm-chṳ voi hi chhô chhai Song-ti ke sṳn-thien-tú, chhṳ-chhṳ̂n he Song-ti.

⁵ Ngì-têu m̀ ki-tet he-mò? Ngài thùng ngì-têu khiung-ha ke sṳ̀, yí-kîn chiông liá-ke sṳ lâu ngì-têu kóng-ko lé.

⁶ Chú-tóng liá-khien sṳ, m̀ pûn kì liá-ha chhiu fat-sên ke he má-ke, ngì-têu tî. Sṳ̀-kî yit to, ke Put-fap-chá chhiu voi chhut-hien.

⁷ Ke sṳ̀n-pi put-fap ke li̍t-liong yí-kîn khôi-sṳ́ chin-hàng; chúng-he, oi tén-to chú-tóng liá-khien sṳ ke sú sái-khôi yî-heu, liá-khien sṳ chang voi fat-sên.

⁸ Ke-sṳ̀, Put-fap-chá voi chhut-hien; chúng-he Chú Yâ-sû chai-lòi ke sṳ̀ oi yung khiéu-chûng ke hi lòi chhù-me̍t kì, yung chhṳ-kâ kong-lìm ke yùng-kông chiông kì sêu-me̍t.

⁹ Ke Put-fap-chá voi kho Sat-tan ke khièn-sṳ lòi-to, hàng kok-chúng ke khì-sṳ lâu sṳ̀n-chiak, hién-chhut ká ke seu-thèu,

¹⁰ kì ya voi yung kok-chúng ke kúi-kie lòi tui-thai ke-têu me̍t-mòng ke ngìn; kì-têu me̍t-mòng, yîn-vi kì-têu m̀ chiap-su, ya m̀ oi-siak ke voi pûn kì-têu tet-kiu ke chṳ̂n-lî.

¹¹ Yîn-vi án-ngiòng, Song-ti chhiu sṳ́ kì-têu mì-mì chhṳ̂-chhṳ̂, pûn kì-têu sin-chhiùng fâ-liâu.

¹² Kiet-mî, yit-chhiet m̀ sin chṳ̂n-lî, fôn-hí put-ngi ke ngìn, voi su thin-chhui.

Su Kién-sién, Tet Kiu-ên

¹³ Chú só-siak ke hiûng-thi chí-moi â, ngài-têu yin-kôi sòng-sòng vi ngì-têu kám-chhia Song-ti; yîn-vi Song-ti kién-sién ngì-têu, thûng-ko Sṳn-Lìn sṳ̀n-sṳn ke kûng-chok lâu ngì-têu tui chṳ̂n-lî ke sin-ngióng, pûn ngì-têu siên tet-kiu.

¹⁴ Thûng-ko ngài-têu só-chhòn pûn ngì-têu ke fuk-yîm, Song-ti fû-seu ngì-têu lòi fûn-hióng ngài-têu ke Chú Yâ-sû Kî-tuk ke yùng-kông.

¹⁵ Só-yî, hiûng-thi chí-moi â, ngì-têu oi khî-chhai! Tui ngài-têu só kâu ke chṳ̂n-lî, mò-lun he yung kóng ke ya-he yung sin-é siá ke, ngì-têu yit-thin oi hó-hó chûn-sú.

¹⁶ Song-ti siak ngài-têu, sṳ̂-ên chiông yún-chhùn ke ôn-ví lâu mî-hó ke phan-mong su-pûn ngài-têu. Ngien liá-ke Â-pâ Song-ti lâu ngài-têu ke Chú Yâ-sû Kî-tuk,

¹⁷ kit-li ngì-têu, pûn ngì-têu yû yúng-hi lòi chhòn-kóng pin sṳ̍t-hàng yit-chhiet mî-hó ke sṳ.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan