Thì-mô-thai Chhièn-sû 6 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

¹ Fàm chhai ak-hâ cho nù-phu̍k ke, yin-tông chhin chûn-chhung chhṳ-kâ ke chú-ngìn, miên-tet Song-ti ke miàng lâu ngài-têu ke kau-hiun pûn-ngìn fí-pong.

² Nù-phu̍k na yû sin Kî-tuk ke chú-ngìn, m̀-hó yîn-vi kì-têu he Chú nui ke hiûng-thi chhiu khon-khiâng kì-têu; fán-chón oi kien-kâ sat-mâng fu̍k-sṳ, yîn-vi su fu̍k-sṳ lòi tet-tó li-yit ke ngìn chhiu-he chhîn-oi ke sin-thù. Ngì yit-thin oi kau-thô pin khien-va liá-têu sṳ-chhìn.

Ká Kau-hiun lâu Chṳ̂n Li-yit

³ Na yû-ngìn chhòn phe̍t-yong ke kau-hiun, m̀ thâng-chhiùng ngài-têu Chú Yâ-sû Kî-tuk khien-chhiòn ke tho-lî lâu ngài-têu só chhòn kin-khièn ke kau-hiun,

⁴ chhiu-he chhṳ-kô chhṳ-thai, khi̍t mò chṳ-sṳt. Liá-chúng ngìn hau phien-lun, yu hau khang sṳ-ngién; kiet-kó chhiu sâng-chhut chhit-tu, siông-châng, fí-pong, lâu ngì-fù,

⁵ hoi ke-têu fái sîm-su̍t, sóng-sṳt chṳ̂n-lî ke ngìn yên-kâ mò-thìn. Chhai kì-têu ke sîm-ngién chûng, kin-khièn put-ko he fat-chhòi ke mùn-lu thin-thin!

⁶ Mò m̀-chho̍k, ngìn na tî-chiuk, kin-khièn tit-khok voi pûn kì tet-tó thai li-yit.

⁷ Ngài-têu lòi liá sṳ-kiên, sûng-sú khûng-khûng; ngài-têu ya tai-m̀-chéu má-ke!

⁸ Ngài-têu na yû hó sṳ̍t, yû hó chok, chhiu oi tî-chiuk.

⁹ Ke-têu sióng-oi fat-chhòi ke ngìn ham-ngi̍p yú-fe̍t ke tî-poi, pûn tô-tô vù-tî lâu voi hoi-ngìn ke yu̍k-mong chhàn-tén, chui-heu chhiu chhṳ̀m-lùn me̍t-mòng thet-hi.

¹⁰ Thâm-chhòi he van-ok ke kîn-ngièn. Yû-têu ngìn yîn-vi thâm-oi chhièn-chhòi chhiu lì-khôi sin-ngióng ke tho-lu, chhṳ-kâ su-chhin thung-khú, sông-hoi sîm-lìn.

Pûn Thì-mô-thai ke Chṳ́-sṳ

¹¹ Lun-tó ngì liá su̍k Song-ti ke ngìn, ngì oi sám-phit liá-têu sṳ. Oi chûi-khiù chṳn-ngi, kin-khièn, sin-sîm, oi-sîm, ngiûn-nai, lâu vûn-yù.

¹² Chhai sin-ngióng ke pí-soi táng-kô, ngì oi chhin-miang-é chéu, vi chhṳ-kâ yàng-tó yún-yén ke sâng-miang; vi-tó liá-ke yún-sên, ngì pûn Song-ti fû-seu, ya chhai tô-tô chṳn-ngìn ke mien-chhièn, yí-kîn kûng-khôi siên-ko liá mî-hó ke sin-ngióng.

¹³ Khì-sṳ̍t, Kî-tuk Yâ-sû chhai Phàng-siû-Pí-lâ-tô mien-chhièn cho-chṳn ke sṳ̀, sṳt cho mî-hó ke siên-ko. Chhai su sâng-miang pûn van-vu̍t ke Song-ti lâu liá-vi Yâ-sû mien-chhièn, ngài fûn-fu ngì:

¹⁴ Oi mò khiet-tiám, mò hó-hiàm chûn-sú ngì só chiap-su ke min-lin, chhṳ̍t-to ngài-têu ke Chú Yâ-sû Kî-tuk hién-hien ke-ngit.

¹⁵ Sṳ̀-kî sṳ̀n-su̍k ke sṳ̀, Song-ti voi ham kì hién-hien; Song-ti he khâm-tet chhṳ̂n-siung, thu̍k-yit vù-ngi ke Chú-chái, van-vòng ke Vòng, van-chú ke Chú.

¹⁶ Vì-yû Kì he m̀-voi sí ke. Kì he̍t chhai ngìn mò phan-fap chiap-khiun ke kông tî-poi; mò ngìn sṳt kien-ko Kì, ya mò ngìn khon-tet-tó Kì. Ngien chûn-kui lâu yún-yén ke khièn-piang kûi-pûn Kì! Â-mén.

¹⁷ Ke-têu chhai kîm-sên fu-chiuk ke ngìn, ngì oi kín-kie kì-têu: M̀-hó kiêu-ngau; m̀-hó chiông hî-mong piong chhai mò thin-chho̍k ke chhièn-chhòi táng-kô; fán-chón oi yí-kho chiông van-vu̍t fûng-fûng fu-fu su pûn ngài-têu hióng-su ke Song-ti.

¹⁸ Oi fûn-fu kì-têu hàng-san, chhai hó-sṳ-song fu-chiuk, kâm-sîm kiu-chi, lo̍k-yi fûn-hióng.

¹⁹ Án-ngiòng cho, chhiu-he vi chhṳ-kâ chit-chhùn chhòi-pó, vi chiông-lòi kien-li̍p kiên-ku ke thi-kî, lòi pá-ak chṳ̂n ke sâng-miang.

²⁰ Thì-mô-thai â, ngì oi hó-hó pó-sú só thok-fu ngì ke. Oi phit-miên ke-têu mò kin-khièn ke khûng-thàm, lâu só-vi “chṳ-sṳt” ke chên-lun.

²¹ Yû-têu ngìn láu-tó chhṳ-kâ yí-kîn yû liá chṳ-sṳt, kiet-kó sa mì-sṳt sin-ngióng ke fông-hiong. Ngien Song-ti su ên-tién pûn ngì-têu!

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan