Thì-mô-thai Chhièn-sû 3 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Kau-fi ke Liâng-chhiu

¹ Yû ngìn kóng: “Má-ngìn sióng-oi cho kam-tuk, kì chhiu-he hiûn-mu yit-khien hó ke sṳ-kûng.” Liá-ki fa he khó-kho ke!

² Kam-tuk thin-chho̍k oi he yit-ke mò hó hiàm ke ngìn. Kì chṳ́-yû cho-tet thó yit-ke pû-ngiòng; cho-ngìn oi ngiàm-siu̍k, voi yok-suk chhṳ-kâ, sên-fa̍t yû kûi-li̍t, lo̍k-yi khoán-thai ngoi-hiông-ngìn. Kì yit-thin oi hiáu-tet kau-thô ngìn;

³ m̀-voi hiûng-chiú, m̀-voi tá-ngìn, sin-chhìn vûn-fò, ya mò thâm-chhòi.

⁴ Kì yit-thin oi hó-hó chhṳ-lî chhṳ-kâ ke kâ-thìn, kón-kau chṳ́-ńg, ham kì-têu yung sṳt-tông ke chûn-kin lòi sun-fu̍k kì.

⁵ Yit-ke ngìn m̀ hiáu-tet chhú-lî chhṳ-kâ ke kâ-thìn, ngióng-voi khon-ku Song-ti ke kau-fi nè?

⁶ Kam-tuk ya m̀ yin-kôi he chang ngi̍p kau-fi ke ngìn, miên-tet kì chhṳ-kô chhṳ-thai, ham chhai Mô-kúi só-su ke sṳ́m-phan chûng.

⁷ Kì chhai kau-fi-ngoi ya oi yû hó miàng-sâng, miên-tet kì su fí-pong, ham-lo̍k Mô-kúi ke lò-mióng tî-poi.

Chṳp-sṳ ke Phín-kiet

⁸ Chṳp-sṳ ya tit-khok oi yû hó tet-hen. Kì-têu kóng-fa oi sṳ̀n-sṳ̍t, cho-m̀-tet chiú-chui lâu thâm-chhòi;

⁹ oi yung chhîn-pha̍k ke thiên-liòng kiên-chhṳ̀ sin-ngióng ke o-pi.

¹⁰ Kì-têu yin-kôi siên su kháu-ngiam, mò má-ke hó hiàm chang cho-tet pûn kì tâm-ngim chṳt-vu.

¹¹ Ńg chṳp-sṳ ya oi yû hó tet-hen, m̀-voi kóng hàn-fa, vún-chhung, fàm-sṳ sṳ̀n-sṳ̍t khó-kho.

¹² Mî-yit-ke chṳp-sṳ chṳ́-yû cho-tet thó yit-ke pû-ngiòng, kì ya oi hó-hó kón-kau chṳ́-ńg lâu chhṳ-lî kâ-thìn.

¹³ Ke-têu chhai sṳ-fung ke táng-kô yû hó péu-hien ke chṳp-sṳ chhiu tet-tó hó miàng-sâng, ya voi chhin hó-tám kóng-lun kì-têu tui Kî-tuk Yâ-sû ke sin-ngióng.

Khi̍t-thai ke O-pi

¹⁴ Ngài yit-phién siá liá-fûng sin-é, yit-phién hî-mong kiak-kiak lòi-khon ngì;

¹⁵ na-he thìn-thò, liá-fûng sin-é he lâu ngì kóng, ngài-têu chhai Song-ti ke kâ-thìn chûng yin-kôi oi ngióng-pân hàng-sṳ. Liá-ke kâ-thìn chhiu-he yún-sên Song-ti ke kau-fi, he chṳ̂n-lî ke sa̍k-chhû lâu kî-chhú.

¹⁶ Thai-kâ kûng-ngin, ngài-têu sin-ngióng ke o-pi he ngióng-pân kô-chhṳ̂m: Kì yung ngìn ke ngiuk-sṳ̂n hién-hien, pûn Sṳn-Lìn chṳn-mìn vì ngi, pûn chung thiên-sṳ́ khon-kien, pûn ngìn chhòn to van-pâng, pûn sṳ-kiên-ngìn siông-sin, su-chiap ngi̍p yùng-yeu.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan