Thiap-sat-lò-nì-kâ Chhièn-sû 1 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

¹ Ngài he Pó-lò; ngài thùng Sî-lâ lâu Thì-mô-thai siá sin-é pûn Thiap-sat-lò-nì-kâ kau-fi, chhiu-he su̍k Â-pâ Song-ti lâu Chú Yâ-sû Kî-tuk ke chung sin-thù. Ngien ngì-têu thai-kâ tet-tó ên-tién lâu phìn-ôn!

Thiap-sat-lò-nì-kâ-ngìn ke Sên-fa̍t lâu Sin-sîm

² Ngài-têu yit-chhṳ̍t vi-tó ngì-têu thai-kâ kám-chhia Song-ti, chhai khì-tó chûng sòng-sòng thì-hí ngì-têu,

³ chhai ngài-têu Â-pâ Song-ti ke mien-chhièn, yit-chhṳ̍t ki-ngiam ngì-têu ngióng-pân chiông só sin ke sṳ̍t-hàng chhut-lòi, ngióng-pân yung oi-sîm sîn-khú kûng-chok, yu ngióng-pân kiên-chhṳ̀ tui ngài-têu Chú Yâ-sû Kî-tuk ke phan-mong.

⁴ Hiûng-thi chí-moi â, ngài-têu tî Song-ti thung-siak ngì-têu, kién-sién-liáu ngì-têu.

⁵ Ngài-têu chiông liá fuk-yîm chhòn pûn ngì-têu, m̀-he tân kho fa-ngî, thùng-sṳ̀ ya he kho Sṳn-Lìn ke nèn-li̍t lâu tui fuk-yîm ke khok-sin. Ngì-têu tî, chhai ngì-têu ke-vi ke sṳ̀, ngài-têu ke sên-fa̍t he ngióng-pân; yit-chhiet ke só-cho lûng-chúng he vi-tó ngì-têu ke hó-chhu.

⁶ Ngì-têu yû háu-fap ngài-têu, ya háu-fap Chú; sûi-yèn ngì-têu tù-tó thai khú-nan, hàn-he yung Sṳn-Lìn só-su ke fôn-hí lòi liâng-su chṳ̂n-tho.

⁷ Yîn-vi án-ngiòng, ngì-têu sàng-cho Mâ-khì-tun lâu Â-kâi-â só-yû sin-thù ke mù-fam.

⁸ Chú ke chṳ̂n-tho m̀ tân-chhiang tui ngì-têu ke-vi chhòn-to Mâ-khì-tun lâu Â-kâi-â, ngì-têu tui Song-ti yû sin-sîm ke sêu-sit ya chhòn-to yén-khiûn tak só-chhai; m̀-sṳ́ ngài-têu kâ-kóng má-ke.

⁹ Ke-têu ngìn lûng-chúng án-ngiòng chhòn-kóng: Chhai ngài-têu fóng-mun ngì-têu ke sṳ̀, ngì-têu ngióng-pân chiap-thai ngài-têu; ngì-têu ngióng-pân hi-chhie̍t ngiéu-siong, kûi-hiong Song-ti, lòi sṳ-fung yu sâng yu chṳ̂n ke Song-ti,

¹⁰ thùng-sṳ̀, tén-heu Kì ke Lai-é tui thiên-táng kong-lìm. Liá-ke Lai-é he Song-ti sṳ́ kì tui sí fu̍k-fa̍t ke Yâ-sû; kì kiu ngài-têu thot-lì chiông-lòi voi lìm-to ke Song-ti ke thai fat-khién.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan