馬太 1 - 客語聖經 – 現代臺灣客語譯本，新舊約全書客語聖經 – 漢字版

耶穌基督个家譜

¹ 耶穌基督係大衛个後代，大衛係亞伯拉罕个後代。 耶穌个家譜係恁樣：

² 亞伯拉罕𫱔以撒，以撒𫱔雅各，雅各𫱔猶大㧯佢个兄弟。

³ 猶大同塔瑪𫱔法勒斯㧯謝拉，法勒斯𫱔希斯崙，希斯崙𫱔亞蘭，

⁴ 亞蘭𫱔亞米拿達，亞米拿達𫱔拿順，拿順𫱔撒門，

⁵ 撒門同喇合𫱔波阿斯，波阿斯同路得𫱔俄備得，俄備得𫱔耶西，

⁶ 耶西𫱔大衛王。 大衛同烏利亞个𡜵娘𫱔所羅門，

⁷ 所羅門𫱔羅波安，羅波安𫱔亞比雅，亞比雅𫱔亞撒，

⁸ 亞撒𫱔約沙法，約沙法𫱔約何蘭，約何蘭𫱔烏西雅，

⁹ 烏西雅𫱔約坦，約坦𫱔亞哈斯，亞哈斯𫱔希西家，

¹⁰ 希西家𫱔瑪拿西，瑪拿西𫱔亞們，亞們𫱔約西亞。

¹¹ 以色列族被人捉去巴比倫个期間，約西亞𫱔約雅斤㧯佢个兄弟。

¹² 被人捉到巴比倫後，約雅斤𫱔撒拉鐵，撒拉鐵𫱔所羅巴伯，

¹³ 所羅巴伯𫱔亞比玉，亞比玉𫱔以利亞敬，以利亞敬𫱔亞所，

¹⁴ 亞所𫱔撒督，撒督𫱔亞金，亞金𫱔以律，

¹⁵ 以律𫱔以利亞撒，以利亞撒𫱔馬但，馬但𫱔雅各，

¹⁶ 雅各𫱔約瑟，就係馬利亞个老公。該稱做基督个耶穌係對馬利亞出世个。

¹⁷ 恁樣算起來，對亞伯拉罕到大衛一共有十四代，對大衛到以色列人被人捉到巴比倫也係十四代，對被人捉个時到基督个出世也係十四代。

耶穌基督个出世

¹⁸ 耶穌基督出世个經過係恁樣：佢个阿姆馬利亞已經㧯約瑟定親，總係在結婚以前，馬利亞就對聖靈懷胎。

¹⁹ 姖个未婚夫約瑟做人正直，總係又無愛公開羞辱姖，想愛祕密解除婚約。

²⁰ 佢當考慮這事个時節，主个天使在夢中對佢顯現，講：「大衛个後代約瑟，毋使驚，做你討馬利亞做𡜵娘，因為姖係對聖靈懷胎个。

²¹ 姖會𫱔一個孻仔，你愛將佢个名安到耶穌，因為佢愛拯救自家个子民脫離佢等个罪。」

²² 這一切事个發生係愛應驗主通過先知所講个話：

²³ 有童貞女會懷胎𫱔孻仔， 佢个名愛喊做以馬內利。 (「以馬內利」个意思就係「上帝㧯𠊎等同在。」)

²⁴ 約瑟醒過來，就照主个天使所吩咐个去做，㧯馬利亞結婚；

²⁵ 總係在姖𫱔孻仔以前，無㧯姖同房。細人仔出世，約瑟就將佢个名安到耶穌。