雅歌 1 - 客語聖經 – 現代臺灣客語譯本，新舊約全書客語聖經 – 漢字版

¹ 所羅門个詩歌 ，係詩歌中最靚个詩歌。

第一首 (新娘)

² 願佢用佢个嘴唇唚𠊎！ 你个愛情比好酒較香。

³ 你个身體有香膏个香味； 你个名像香膏發出清香， 當然細妹仔全部恁愛慕你。

⁴ 願你牽等𠊎，𠊎等遽遽來去走； 做𠊎个君王，𢱋𠊎入你个間房。 𠊎等愛共下來享受歡喜快樂； 有你个愛情，𠊎較贏享受好酒。 難怪細妹仔全部恁愛慕你！

⁵ 耶路撒冷个細妹仔啊， 𠊎雖然較烏，總係當靚 ， 像基達个烏羊毛帳篷， 像所羅門宮中个布簾。

⁶ 毋好因為𠊎恁烏就看輕𠊎， 係日頭將𠊎曬到恁烏个啊！ 因為𠊎共𡟓个兄弟向𠊎發譴， 䌠𠊎在葡萄園工作， 𠊎連自家个葡萄園 卻無照顧到！

⁷ 𠊎个愛人啊，請㧯𠊎講， 你在㖠位掌羊？ 當晝在㖠位俾羊歇睏？ 𠊎做麼介愛在你同伴个羊群塍， 像揞等面紗个人緊尋你呢？

(新郎)

⁸ 最靚个細妹仔啊， 你若毋知該所在， 跈羊群个腳跡去， 在掌羊个帳篷堘， 俾你个山羊食草。

⁹ 𠊎个情妹啊， 你像埃及王戰車个駿馬恁靚。

¹⁰ 你兩片个面頰卵因為掛耳環非常靚， 頸筋戴等脖鍊也盡靚。

¹¹ 𠊎等來為你打金鍊仔， 為你鑲銀仔个妝飾品。

(新娘)

¹² 𠊎个君王坐席个時， 𠊎个香水發出香味。

¹³ 𠊎个情郎常常靠在𠊎个胸前； 佢就像𠊎帶等一袋沒藥恁香。

¹⁴ 𠊎个情郎像一串鳳仙花， 開在隱‧基底个葡萄園肚。

(新郎)

¹⁵ 𠊎个情妹啊，你實在非常靚！ 你个目珠像月鴿仔恁溫柔。

(新娘)

¹⁶ 情郎啊，你當斯文，當得人惜！ 𠊎等做得用青草來準眠床，

¹⁷ 用香柏樹做屋頂个棟樑， 用松樹準做屋頂个桷仔。