雅各書 1 - 客語聖經 – 現代臺灣客語譯本，新舊約全書客語聖經 – 漢字版

¹ 𠊎係雅各，上帝㧯主耶穌基督个僕人；𠊎向分散在全世界上帝个子民 請安。

信心㧯智慧

² 𠊎个兄弟姊妹啊，你等堵到各種个試煉，應該看做係歡喜个事，

³ 因為知，你等个信心經過考驗就會生出忍耐。

⁴ 你等愛忍耐到底，正能達到十全十美，無欠缺个地步。

⁵ 你等中間若有人缺少智慧，佢就應當求上帝；佢會將智慧賜給佢，因為上帝樂意豐豐富富賜給每一個人。

⁶ 總係，你等愛憑信心求，毋好有一些疑狐；因為疑狐个人像被風吹來吹去个海浪一樣。

^7-8 恁樣个人三心兩意，在佢一切所行个事上無定無著；這種人毋使想愛對主該位得到麼介。

窮苦㧯富足

⁹ 窮苦个兄弟姊妹得到高升，應該歡喜；

¹⁰ 有錢人受降卑也愛歡喜；因為佢會像野花一樣謝掉去。

¹¹ 日頭出來，熱風一吹，草就枯燥，花也謝掉，所有个靚就無掉去。有錢人在事業上無閒直掣，也會像恁樣謝掉去。

考驗㧯試探

¹² 堵到試煉忍耐到底个人係有福氣个；因為通過考驗以後，佢會領受到上帝所應許給該兜敬愛佢个人生命个冕旒。

¹³ 人受試探个時節，做毋得講：「𠊎係受上帝个試探！」因為上帝毋被邪惡試探，佢也毋會試探人。

¹⁴ 每一個人受試探，係被佢自家个慾望牽等走，被它騙走去。

¹⁵ 慾望懷胎以後，就𫱔出罪惡；罪惡一長成，就生出死亡。

¹⁶ 𠊎親愛个兄弟姊妹啊，毋好被人騙走去！

¹⁷ 一切美善㧯完全个恩賜全部係對頂高，對天頂个阿爸來个；佢係一切光个創造者，毋會改變，也無轉動个影。

¹⁸ 佢照自家个旨意，通過真理个話賜生命給𠊎等，使𠊎等在佢所造个萬物中親像初熟个果子。

聽道㧯行道

¹⁹ 𠊎親愛个兄弟姊妹啊，你等愛知噢！每一個人愛遽遽聽，毋好恁遽開嘴，也毋好恁遽發譴；

²⁰ 因為人个發譴不能達成上帝公義个目的。

²¹ 所以，你等愛除掉一切个壞習慣㧯邪惡个行為，用溫柔个心來接受上帝種在你等心中个真道，就係能拯救你等个真道。

²² 總係，你等毋好騙自家，恅到聽道就罅；顛倒，你等一定愛行道。

²³ 若有人聽了道理無去行，就像一個人照鏡仔看自家个面貌，

²⁴ 看了就行開，黏時就毋記得自家个樣像。

²⁵ 總係，詳細查看該完全又使人得到自由个教示，並謹守个人，毋係聽了就毋記得，反轉實實在在去行，這種人在佢所行个事上一定會蒙福。

²⁶ 若有人自認係虔誠个人，總係無約束自家个舌乸，就係騙自家；佢个虔誠無半點價值。

²⁷ 在阿爸上帝看來，純潔無垃圾个虔誠就係：照顧在患難中个孤兒㧯寡婦；同時保守自家莫染到世界个污穢。