阿摩司書 1 - 客語聖經 – 現代臺灣客語譯本，新舊約全書客語聖經 – 漢字版

¹ 在烏西雅做猶大王，約華施个孻仔耶羅波安二世做以色列王个期間，大地動前兩年，提哥亞村一個牧羊人 阿摩司看到上帝啟示有關以色列个異象。下背个記載係阿摩司个話。

² 佢講： 上主對錫安像獅仔吼吼滾， 對耶路撒冷像雷公𠾐𠾐滾。 牧場个青草轉黃； 迦密山个樹林枯燥。

上帝愛審判以色列个鄰國 有關敘利亞

³ 上主講：「大馬士革人再三犯罪，𠊎一定愛責罰佢等。佢等像用有鐵齒个打榖機打五榖恁樣，用殘忍个方法攻打基列人。

⁴ 所以𠊎愛放火燒哈薛王个王宮，將便‧哈達王个宮殿燒掉。

⁵ 𠊎愛敲掉大馬士革个城門，消滅住在亞文平原个人民㧯伯‧伊甸个領袖。敘利亞个人民愛被人捉到吉珥。」上主恁樣宣佈了。

有關非利士

⁶ 上主講：「迦薩人再三犯罪，𠊎一定愛責罰佢等。佢等將鄰國个人民捉去，賣給以東人做奴才。

⁷ 所以𠊎愛放火燒迦薩个城牆，將王宮燒掉。

⁸ 𠊎愛消滅住在亞實突个人㧯亞實基倫个領袖。𠊎愛責罰以革倫城；所有留在城肚个非利士人全部會死。」至高个上主恁樣宣佈了。

有關泰爾

⁹ 上主恁樣講：「泰爾人再三犯罪，𠊎一定愛責罰佢等。佢等毋遵守㧯同盟簽个條約，反轉將鄰國个人民賣給以東人做奴才。

¹⁰ 所以𠊎愛放火燒泰爾个城牆，將王宮燒掉。」

有關以東

¹¹ 上主恁樣講：「以東人再三犯罪，𠊎一定愛責罰佢等。佢等全無憐憫个心，用刀劍迫害佢等个親族以色列人。佢等个發譴一直無停；佢等閼到毋肯煞。

¹² 所以𠊎愛放火燒提幔个城市，將波斯拉个王宮燒掉。」

有關亞捫

¹³ 上主講：「亞捫人再三犯罪，𠊎一定愛責罰佢等。為到發展土地，佢等甚至剖開基列地懷胎婦女个肚笥。

¹⁴ 所以𠊎愛放火燒拉巴个城牆，將王宮燒掉。戰爭發生个時，會有相㓾鬥打个聲，像狂風暴雨。

¹⁵ 佢等个國王㧯官長全部會被人捉走。」上主恁樣宣佈了。