約翰二書 1 - 客語聖經 – 現代臺灣客語譯本，新舊約全書客語聖經 – 漢字版1 𠊎係長老；𠊎寫信仔給你 — 蒙揀選个夫人，也給你个子女： 你等係𠊎誠心所惜个；毋單淨𠊎惜你等，所有認識真理个人也惜你等； 2 因為真理在𠊎等心內，也愛永遠㧯𠊎等同在。 3 阿爸上帝㧯佢个孻仔耶穌基督一定會賜恩典、憐憫、㧯平安給𠊎等，使𠊎等一直生活在真理㧯相惜个底背。 真理㧯相惜 4 𠊎盡歡喜，因為𠊎知在你个子女當中有遵從天頂阿爸个命令、生活在真理底背个人。 5 所以，親愛个夫人，𠊎求你，𠊎等大家愛彼此相惜。𠊎寫給你个，並毋係一條新个命令，還係𠊎等對一開始就領受个。 6 這就係愛：𠊎等應當遵行上帝所有个命令。你等對一開始所聽到个命令就係：你等應當用愛行事做人。 提防錯誤个言論 7 有盡多迷惑人个已經在世界出現；佢等公開否認耶穌基督係成做肉身來个。這種人就係迷惑人个，係敵基督个。 8 你等愛細膩，正毋會失掉𠊎等 所成就个，反轉會得到豐富个報賞。 9 所有毋遵守基督个教訓，又偏走去个，就無屬上帝；遵守教訓个，就屬天頂个阿爸，又屬孻仔。 10 若有人到你等該位去，毋傳這個教訓，就毋好接待佢到你等个屋下去，也毋好對佢請安； 11 因為對佢請安个，就㧯佢所做該兜邪惡个事有份。 結尾个話 12 𠊎還有盡多話愛㧯你等講，總係𠊎想，無愛用筆墨來傳達。𠊎希望親身去探訪你等，當面㧯你等談論，使𠊎等个歡喜得到滿足。 13 你該蒙揀選个姊妹个子女 對你等請安！ |