約翰三書 1 - 客語聖經 – 現代臺灣客語譯本，新舊約全書客語聖經 – 漢字版

¹ 𠊎係長老；𠊎寫信仔給親愛个該猶 — 𠊎誠心所惜个朋友：

² 親愛个朋友，𠊎祝福你事事順利，身體勇健，像你个靈性共樣恁勇健。

³ 𠊎盡歡喜，因為有兜兄弟來到這位，㧯𠊎講，你對真理盡忠心，凡事遵照真理來行。

⁴ 𠊎最大个歡喜就係：聽到𠊎个眾子女生活在真理个底背。

稱讚該猶

⁵ 親愛个朋友，你恁忠心為到眾兄弟姊妹做事，甚至對外來个兄弟姊妹也係恁樣。

⁶ 佢等識對這所在个教會講起你个愛心。請你照上帝所歡喜个，幫助佢等繼續佢等个旅程。

⁷ 佢等為到基督个緣故出外工作，並無接受吂信个人个幫助。

⁸ 所以，𠊎等基督徒應該愛接待這種人，同佢等共下來為到真理工作。

責備丟特腓

⁹ 𠊎識寫一封信仔給教會；總係，想愛做教會領袖个丟特腓毋搭𠊎所講个話。

¹⁰ 𠊎去个時節，一定愛講起佢所做个事。佢用壞話攻擊𠊎等，譭謗𠊎等！毋單淨恁樣，佢自家毋接待外來个兄弟姊妹，又禁止該兜願意接待个人，甚至愛逐佢等出教會！

褒獎底米特

¹¹ 親愛个朋友，毋好學壞，愛學好。行善个人就屬上帝；作惡个人就無見過上帝。

¹² 大家褒獎底米特。真理為佢做證；𠊎等也為佢做證。你知𠊎等个見證係真實个。

最尾个請安

¹³ 𠊎還有盡多話愛㧯你講，總係𠊎想，無愛用筆墨來寫。

¹⁴ 𠊎希望無幾久會見到你，當面㧯你談論。

¹⁵ 願你平安！ 你个朋友全部對你請安。請代𠊎對各位朋友一儕一儕請安。