約翰 1 - 客語聖經 – 現代臺灣客語譯本，新舊約全書客語聖經 – 漢字版

生命之道

¹ 太初有道，道㧯上帝同在，道就係上帝。

² 佢在太初㧯上帝同在。

³ 上帝通過佢創造萬有；所有受創造个，無一樣毋係通過佢造个。

⁴ 道就係生命个源頭，這生命將光賜給人類。

⁵ 光照在烏暗中，烏暗從來毋識贏過 光。

⁶ 有一個人，名安到約翰，係上帝所差派个使者。

⁷ 佢來為該光做證，愛使大家聽到佢个道理來信。

⁸ 佢本身毋係該光，係愛為光做證。

⁹ 該光係真光，來到世間光照全人類。

¹⁰ 道在世間，上帝係通過佢創造世界，總係世間人毋識佢。

¹¹ 佢來到自家个地方，自家个人卻毋接受佢。

¹² 總係凡接受佢个，就係信佢个人，佢就賜佢等做上帝子女个權利。

¹³ 這兜人做上帝个子女毋係因為血統關係，像對人个性慾抑係對男人个意思來𫱔个，係對上帝𫱔个。

¹⁴ 道成做肉身，住在𠊎等个當中，充滿恩典㧯真理。𠊎等有看到佢个榮光，這係阿爸獨一个孻仔 正有个榮光。

¹⁵ 約翰為佢做證，喊講：「關係佢，𠊎識講：『佢比𠊎較慢來，總係比𠊎較偉大；因為𠊎吂出世，佢已經存在。』」

¹⁶ 對佢个豐盛，𠊎等全部有領受到恩典，並恩上加恩。

¹⁷ 上帝通過摩西頒佈法律，總係恩典㧯真理係通過耶穌基督來个。

¹⁸ 從來毋識有人看到上帝，只有獨一个孻仔上帝 就係在阿爸懷中个，將佢啟示出來。

施洗約翰个見證

¹⁹ 以下係約翰个見證。當時，猶太人个領袖 對耶路撒冷派兜祭司㧯利未人去見約翰，問佢講：「你係麼人？」

²⁰ 約翰無拒絕回答，反轉坦白㧯佢等講：「𠊎並毋係基督。」

²¹ 佢等就問：「恁樣，你係麼人？係以利亞嗎？」 約翰應講：「𠊎毋係。」 佢等又問：「係該先知嗎？」 佢又應講：「毋係。」

²² 佢等接等講：「請你㧯𠊎等講，你到底係麼人，𠊎等好回覆派𠊎等來个人。你自家講，你係麼人？」

²³ 約翰用先知以賽亞个話回答，講： 「在曠野有人喊講： 『為主修直佢所愛行个道路！』 𠊎就係這個人。」

²⁴ 法利賽人所派來个該兜人

²⁵ 質問約翰講：「你既然毋係基督，毋係以利亞，也毋係該先知，恁樣，你做麼介行洗禮哪？」

²⁶ 約翰應講：「𠊎係用水行洗禮；總係有一個企在你等當中，你等毋識个，

²⁷ 佢比𠊎較慢來，𠊎就係㧯佢脫鞋也無資格。」

²⁸ 這兜事發生在約旦河東片个伯大尼，就係約翰行洗禮个所在。

上帝个羔羊

²⁹ 第二日，約翰看到耶穌對佢行等過來，就講：「看啊，上帝个羔羊，除掉世間人个罪个！

³⁰ 這個人就係𠊎識講个：『佢比𠊎較慢來，總係比𠊎較偉大；因為𠊎還吂出世，佢已經存在。』

³¹ 𠊎並毋識佢；總係𠊎來，用水行洗禮，為到愛俾以色列人認識佢。」

³² 約翰又做證講：「𠊎看到聖靈像月鴿仔對天頂降臨，落在佢个身上。

³³ 𠊎還係毋識佢，總係差𠊎用水行洗禮个上帝㧯𠊎講：『你看到聖靈降臨，落在麼人个身上，這儕就係用聖靈行洗禮个。』

³⁴ 𠊎已經看到了，所以對你等做證，佢就係上帝个孻仔。」

頭一擺選召學生

³⁵ 又過一日，約翰㧯厥兩個學生又企在該位；

³⁶ 佢看到耶穌經過，就講：「看啊，上帝个羔羊！」

³⁷ 該兩個學生一聽到這個話，就去跈耶穌。

³⁸ 耶穌轉身，看到佢等跈等佢，就問講：「你等尋麼介？」 佢等應講：「拉比，你住在㖠位？」 (「拉比」个意思就係「先生」。)

³⁹ 耶穌講：「你等來看！」佢等跈佢去，看到佢住个所在，該日就同佢共下住。 (該時大約係下晝四點鐘。)

⁴⁰ 聽到約翰个話就跈耶穌个兩儕中，有一個係西門‧彼得个老弟安德烈。

⁴¹ 佢先尋到佢个阿哥西門，㧯佢講：「𠊎等已經尋到彌賽亞了。」 (「彌賽亞」个意思就係「基督」。)

⁴² 然後佢就帶西門去見耶穌。 耶穌注目看佢，講：「你係約翰个孻仔西門，總係你會被人喊做磯法。」 (磯法㧯彼得意思共樣，就係「磐石」。)

呼召腓力㧯拿但業

⁴³ 又過一日，耶穌決定去加利利省。佢尋到腓力，對佢講：「來跈𠊎！」

⁴⁴ (腓力係伯賽大人，㧯安德烈並彼得同鄉。)

⁴⁵ 腓力尋到拿但業，㧯佢講：「摩西在法律書中所寫㧯眾先知所記載个該儕，𠊎等已經尋到了。佢就係約瑟个孻仔，拿撒勒人耶穌。」

⁴⁶ 拿但業就對佢講：「拿撒勒敢會出麼介好个嗎？」 腓力講：「你來看！」

⁴⁷ 耶穌看到拿但業對佢行等過來，就講：「看啊，佢係一個真實个以色列人；佢个心中無詭詐！」

⁴⁸ 拿但業問佢講：「你樣會識𠊎？」 耶穌應講：「你在無花果樹下，腓力吂喊你，𠊎已經看到你。」

⁴⁹ 拿但業講：「先生，你係上帝个孻仔；你係以色列个君王！」

⁵⁰ 耶穌講：「因為𠊎㧯你講，𠊎看到你在無花果樹下，你就信係麼？你會看到比這還較大个事情！」

⁵¹ 耶穌又講：「𠊎實在㧯你等講，你等會看到天開，上帝个天使在人子身項上去下來。」