約珥書 1 - 客語聖經 – 現代臺灣客語譯本，新舊約全書客語聖經 – 漢字版

人民為農作物个損壞悲傷

¹ 下背係上主給比土珥个孻仔約珥个信息。

² 長老 啊，你等愛聽， 猶大个人民啊，愛注意聽！ 你等个時代抑係祖先个時代敢有發生過這種事？

³ 㧯你等个子女講， 好俾佢等㧯佢等个子女講， 世世代代，流傳下去。

⁴ 一群一群个草蜢停在農作物面頂。 大草蜢食賸个，細草蜢來食； 細草蜢食賸个，幼草蜢來食； 幼草蜢食賸个，禾蝦來食。

⁵ 酒醉个人啊，好醒過來噭了！ 好酒个人啊，愛哀傷大噭！ 因為焗新酒个葡萄無半滴了。

⁶ 有一隊草蜢侵犯𠊎等个土地。 牠兜當強大，多到無法度算； 牠兜个牙齒像獅仔个牙齒恁利。

⁷ 牠兜毀壞𠊎等个葡萄樹， 將無花果樹食到光光。 牠兜連樹梗个皮也喫到淨淨， 使樹梗變做白白。

⁸ 你等愛盡噭！ 像細妹仔因為未婚夫死掉著麻衫大噭。

⁹ 聖殿肚毋會再有五榖㧯美酒， 祭司因為無祭物好獻給上主來悲傷。

¹⁰ 田園荒掉， 大地淒涼； 因為五榖毀壞， 全無新酒， 橄欖油也當欠。

¹¹ 耕種人啊，你等會當失望！ 掌葡萄園个啊，你等會大噭！ 因為大麥、小麥， 㧯所有農作物全部毀壞淨淨。

¹² 葡萄樹、無花果樹燥掉； 石榴樹、棕樹、蘋果樹 㧯所有个果樹全部燥掉； 人个喜樂也全部消失了。

¹³ 在祭壇服事个祭司啊， 你等愛著麻衫大噭！ 愛入聖殿歸暗晡噭吱！ 因為毋會再有五榖、美酒好獻給你等个上帝了。

¹⁴ 你等愛宣佈禁食，舉行神聖个聚會！ 愛召集該兜長老㧯猶大所有个人民， 進入上主 — 你等上帝个聖殿， 向上主哀求！

¹⁵ 上主个日仔會到了！ 全能者愛降災難了！ 該日仔係樣般得人驚啊！

¹⁶ 農作物在𠊎等眼前毀壞了； 𠊎等上帝个聖殿無歡喜快樂。

¹⁷ 種子全部在泥塥肚糜掉了， 無榖好囤； 榖倉全部無用掉去了。

¹⁸ 頭牲盡噦盡噭。 牛群衝上衝下， 因為尋無草好食； 羊群也共樣受苦。

¹⁹ 上主啊，𠊎向你哀求， 因為火燒掉野地个草場， 火焰燒淨田園个樹仔。

²⁰ 野獸也向你嘴勺勺； 因為河壩水燥掉， 火將草場燒掉了。