箴言 1 - 客語聖經 – 現代臺灣客語譯本，新舊約全書客語聖經 – 漢字版

箴言个價值

¹ 大衛个孻仔，以色列王所羅門个箴言：

² 這兜箴言會俾人認識智慧， 得到教訓，理解格言个意思。

³ 它兜會教人樣般過明智个生活， 樣般做公義、公平㧯正直个人。

⁴ 它兜會俾戇直个人 變做精明， 使後生人有智識，曉得分別是非。

⁵ 有智慧个聽到，就更加有學問， 明理个人聽到，就得到引導，

⁶ 來了解箴言㧯比喻， 來明白智慧人个話㧯鈴仔。

⁷ 敬畏上主係智識个開頭 。 戇檔人 看輕智慧㧯教訓。

勸話後生人

⁸ 孻仔啊 ，愛聽若爸个教訓， 毋好離開若姆个教示；

⁹ 因為它兜像係你所戴盡靚个帽仔， 像係你頸項寶貝个脖鍊。

¹⁰ 孻仔啊，若係有壞人來引誘你， 千萬毋好跈佢等。

¹¹ 若係佢等講： 「共下來去，埋伏㓾過路人， 無論佢係麼人，毋使理由，照打！

¹² 𠊎等愛像陰間將佢等生生吞落去， 完全食掉，就像人跌落深坑肚！

¹³ 𠊎等會得到各種个財寶， 屋肚會裝滿搶來个東西！

¹⁴ 來鬥股噢， 大家共下用一隻錢袋！」

¹⁵ 孻仔啊，毋好㧯佢等共下行， 愛禁止你个腳行佢等个路；

¹⁶ 佢等个腳走等去行邪路， 佢等遽遽想愛害人流血。

¹⁷ 鳥仔看等个時，來設羅網， 這係無採工个；

¹⁸ 總係這兜壞人所設个羅網， 係流自家个血，害自家个命。

¹⁹ 一切貪財个人所堵到个 就係恁樣； 貪財个心搶走个係佢等个命。

智慧个呼聲

²⁰ 智慧 在街巷呼喊， 在大眾場所緊喊，

²¹ 在鬧熱个街頭大聲嘶， 在城門旁邊緊出聲講：

²² 「戇直个人啊， 你等歡喜戇直愛到幾時？ 傲慢人 歡喜傲慢， 戇檔人惱智識愛到幾久？

²³ 你等愛聽𠊎个勸話； 𠊎愛將𠊎个心思對你等顯明， 將𠊎个話教你等明白。

²⁴ 𠊎喊你等，你等毋聽； 𠊎擛你等，你等毋搭；

²⁵ 反轉看輕𠊎一切个勸話， 毋願意接受𠊎个責備。

²⁶ 因為恁樣， 你等堵到災難个時， 𠊎就愛笑你等； 你等驚到愊愊掣， 𠊎也愛嘲謔你等。

²⁷ 著驚像大風臨到你等， 災難像狂風來到， 急難痛苦降下个時， 𠊎還係愛嘲謔你等。

²⁸ 「該時，佢等會求喊𠊎， 總係𠊎無愛應； 佢等會尋𠊎， 總係尋毋到。

²⁹ 佢等惱智識， 也毋識決心敬畏上主；

³⁰ 佢等從來毋聽𠊎个勸話， 反轉看輕𠊎一切个責備。

³¹ 所以，佢等愛食自家所結个果子， 被自家所設个計謀撐到飽飽。

³² 戇直个人因為行歪路喪失生命； 戇檔人因為隨便過日害死自家。

³³ 總係聽從𠊎个，會安全過日； 佢等會享受平安，毋驚災禍。」