歷代志下 1 - 客語聖經 – 現代臺灣客語譯本，新舊約全書客語聖經 – 漢字版

所羅門王求智慧

¹ 大衛个孻仔所羅門堅固佢對以色列國个統治。上主 — 佢个上帝㧯佢同在，使佢非常強盛。

² 所羅門命令以色列所有指揮千儕㧯百儕个軍官、政府官員、家族族長、㧯所有人民，

³ 全部㧯佢共下去到基遍敬拜个所在，因為在該位有上帝臨到个聖帳篷；這聖帳篷係上主个僕人摩西在曠野造个。

⁴ (上帝个約櫃已經在耶路撒冷；大衛對基列‧耶琳將它請來个時，為它起一座聖帳篷。)

⁵ 戶珥个孫仔、烏利个孻仔比撒列所造个銅祭壇也在基遍，在上主聖帳篷个頭前。所羅門㧯所有人民在該位求問上主。

⁶ 所羅門在聖帳篷頭前敬拜上主，在銅祭壇頂獻一千隻頭牲做燒化祭。

⁷ 該暗晡，上帝向所羅門顯現，問佢：「你愛求𠊎賜給你麼介？」

⁸ 所羅門應上帝講：「你一直用偉大个慈愛款待吾爸大衛，這下又使𠊎承接佢做王。

⁹ 主上帝啊，求你實現你對吾爸大衛所應許个話。你設立𠊎做人民个王，佢等像地上个泥沙恁多，

¹⁰ 求你賜給𠊎聰明智慧，好俾𠊎治理佢等；若無，𠊎樣般有辦法統治你恁多个人民？」

¹¹ 上帝應所羅門講：「這係你个心願。你無求富貴、財寶、名聲，也無求消滅敵人，也無為自家求長壽，只有祈求聰明智慧，使你有辦法統治𠊎个子民，就係𠊎設立你做王統治个人民；

¹² 所以，𠊎愛賜給你聰明智慧。另外，𠊎也愛加添你个財寶、富貴、名聲，超過以前所有个君王，以後也無一個王贏過你。」

所羅門王个武力㧯財富

¹³ 所以，所羅門離開基遍敬拜个所在，對上主聖帳篷面前轉到耶路撒冷，在該位治理以色列。

¹⁴ 所羅門建立一隊有一千四百輛戰車㧯一萬兩千隻戰馬个騎兵隊。佢將一部份安排到耶路撒冷，其他个分駐到逐個城市。

¹⁵ 在佢統治期間，耶路撒冷个金銀像石頭恁多，香柏樹也像高原个桑仔樹恁普遍。

¹⁶ 所羅門个生理人對慕茲黎㧯基利家進口馬仔，

¹⁷ 也對埃及進口戰車。佢等將馬仔㧯戰車轉賣給赫人个王㧯敘利亞人个王：戰車一輛六百隻銀幣；馬仔一隻一百五十隻銀幣。