彌迦書 1 - 客語聖經 – 現代臺灣客語譯本，新舊約全書客語聖經 – 漢字版

¹ 在約坦、亞哈斯、希西家做猶大王个期間，上主向摩利沙人彌迦啟示有關撒馬利亞㧯耶路撒冷个事。下背个記載係上主㧯彌迦講个話。

撒馬利亞㧯耶路撒冷个哀歌

² 列國啊，你等全部愛聽！ 世間人哪，你等愛注意聽！ 至高个上主愛告你等； 主愛對天庭做證。

³ 看哪，上主對天庭行出來； 佢愛降臨在地上，腳踏在該兜山頂。

⁴ 群山在佢腳下崩掉，就像蠟被火鎔掉； 巖石變做土石流，親像大水沖入溪肚。

⁵ 這兜事一定會發生，因為以色列人悖逆上帝，得罪佢。麼人應該為以色列个悖逆受責罰呢？首都撒馬利亞應該承擔！麼人應該為猶大拜偶像个罪負責呢？首都耶路撒冷應該負責！

⁶ 所以上主講：「𠊎愛使撒馬利亞成做垃圾堆，成做種葡萄个所在。𠊎愛將姖个城牆㩳落山壢，露出姖个地基。

⁷ 城肚所有个偶像全部會被人敲到碎碎；通過神女所得个財物全部會被人燒掉；𠊎愛使所有个偶像成做廢物。撒馬利亞像娼妓收集這兜偶像準做繁殖个神明，最後它兜會被敵人搶走，帶給別個所在个娼妓去拜。」

⁸ 所以彌迦講：「𠊎愛為這事傷心大噭；𠊎愛赤身露體、打赤腳，行來行去；𠊎愛像野狗出聲，像鴕鳥緊噭。

⁹ 撒馬利亞个著傷醫毋到了；猶大个傷也毋會好了。災難迫近耶路撒冷城門，會到𠊎同胞个家園。」

敵人迫近耶路撒冷

¹⁰ 毋好在迦特宣佈你等已經戰敗；毋好俾敵人看到你等傷心流目汁。伯‧亞弗拉个人民啊，傷心到在地上緊碾！

¹¹ 沙斐个人民啊，你等會受侮辱，赤身露體，流亡到外國去！撒南个人民毋敢出來。你等聽到伯‧以薛个人民傷心大噭个時，就知城肚無避難个所在。

¹² 瑪律个人民非常痛苦，盡希望有辦法解決，因為上主已經將災難帶到耶路撒冷个城門了！

¹³ 拉吉个人民啊，你等愛牽會走个馬仔來拉戰車，準備逃難！因為錫安子民个罪對你開始；以色列个壞行為在你該位全部尋到了。

¹⁴ 所以，猶大个人啊，你等愛告別摩利沙‧迦特城。以色列該兜王絕對毋會對亞革悉得到幫助。

¹⁵ 瑪利沙个人民啊，上主愛將你等交給征服者；以色列个貴族愛走到亞杜蘭山窿避難。

¹⁶ 猶大个人啊，愛剃光頭，為你等所愛个子女悲傷；愛剃到像禿鷹个頭恁光，因為佢等會被人捉到外國去。