希伯來書 1 - 客語聖經 – 現代臺灣客語譯本，新舊約全書客語聖經 – 漢字版

上帝通過佢个孻仔講話

¹ 在古時代，上帝盡多擺用各種方法，通過眾先知對𠊎等个祖先講話；

² 總係，在這末後个日仔，佢通過佢个孻仔對𠊎等講話。這個孻仔，上帝識通過佢創造宇宙，又設立佢來承受萬有。

³ 佢係上帝个榮耀所發出个光，係上帝本質个真相；佢用佢大能个話托等萬有。佢洗淨人類个罪惡以後，就坐在天頂至大權能者个右片。

上帝个孻仔超越天使

⁴ 這孻仔个地位遠遠超過眾天使，像上帝所賜佢个名比天使个名較尊貴。

⁵ 上帝從來毋識對任何一個天使講過： 你係𠊎个孻仔； 今晡日𠊎做你个阿爸。 佢也毋識對任何一個天使講： 𠊎愛做佢个阿爸； 佢愛做𠊎个孻仔。

⁶ 上帝愛差派佢个長子來世間个時節，佢講： 上帝个眾天使攏總愛拜佢。

⁷ 關係天使，佢講： 上帝使佢个使者成做風， 使佢个奴僕成做火焰。

⁸ 總係，講到孻仔，佢就講： 上帝啊，你个寶座萬代長存！ 你用公平掌權。

⁹ 你歡喜公義，怨恨罪惡； 所以上帝 — 你个上帝選立你， 使你充滿喜樂，贏過同伴。

¹⁰ 佢又講： 主啊，起頭你定大地个根基； 諸天也係你親手創造个。

¹¹ 天地會消滅，總係你永遠長存； 天地會像衫褲爛掉恁樣消失。

¹² 你愛將天地捲起來，像捲外袍， 它兜會像衫褲漸漸歿掉； 總係你永遠毋會改變， 你个壽年無窮無盡。

¹³ 上帝從來毋識對任何一個天使講過： 你坐在𠊎个右片， 等𠊎使你个仇敵伏在你个腳下。

¹⁴ 恁樣，天使係麼介呢？佢等係事奉上帝个靈；上帝派佢等來幫助該兜愛承受救恩个人。