士師記 1 - 客語聖經 – 現代臺灣客語譯本，新舊約全書客語聖經 – 漢字版

猶大㧯西緬支族捉到亞多尼‧比色

¹ 約書亞過身以後，以色列人求問上主：「𠊎等當中㖠個支族愛先上去攻打迦南人呢？」

² 上主應講：「猶大支族愛先上去。𠊎已經將這垤土地交在佢等手中。」

³ 猶大支族个人對佢等个兄弟西緬支族个人講：「請㧯𠊎等共下到該已經分配給𠊎等个土地，去征服迦南人，然後𠊎等就㧯你等共下到分配給你等个土地去。」

⁴ 所以西緬㧯猶大支族共下去相㓾；上主將迦南人㧯比利洗人交在佢等手中。佢等在比色㓾死一萬人，

⁵ 又在該位堵到亞多尼‧比色，就㧯佢相㓾。

⁶ 亞多尼‧比色逃走；佢等追佢，捉到佢，將佢个手指公㧯腳指公剁掉。

⁷ 亞多尼‧比色講：「識有七十個王被𠊎剁斷手指公㧯腳指公；佢等在𠊎桌仔底下拈人㧹掉个食物。這下上帝照𠊎所做个報應𠊎了。」佢被人帶到耶路撒冷，就死在該位。

猶大支族佔領耶路撒冷㧯希伯崙

⁸ 猶大支族个人攻打耶路撒冷。佢等佔領該城，將城肚个人㓾掉，又放火燒城。

⁹ 接等，佢等攻打住在山區、高原、㧯南部燥地个迦南人。

¹⁰ 佢等也攻打住在希伯崙城个迦南人 (希伯崙以前安到基列‧亞巴)，打贏示篩族、亞希幔族，㧯撻買族个人。

俄陀聶佔領底璧城

¹¹ 猶大支族个人對該位攻打底璧城；該時，底璧安到基列‧西弗。

¹² 猶大支族个人迦勒講：「麼人佔領基列‧西弗，𠊎就將𠊎个妹仔押撒嫁給佢。」

¹³ 迦勒个老弟基納斯个孻仔俄陀聶佔領該城，所以迦勒將妹仔押撒給佢做𡜵娘。

¹⁴ 結婚該日，俄陀聶唆慫押撒去向厥爸討一垤田地。押撒一下驢仔，迦勒就問姖愛麼介；

¹⁵ 姖講：「求你送𠊎一個禮物；因為你俾𠊎安居在燥地，求你也給𠊎泉水。」所以迦勒將上泉水㧯下泉水全部給姖。

猶大㧯便雅憫支族个勝利

¹⁶ 摩西丈人老个後代係基尼人；佢等㧯猶大支族个人共下離開棕樹城 — 耶利哥到亞拉得南片个猶大荒地，住在亞瑪力人 當中。

¹⁷ 猶大支族个人㧯佢等个兄弟西緬支族个人聯合起來，上去打贏住在洗法城个迦南人，將該城全部毀滅，它个名就安到何珥瑪。

¹⁸ 猶大支族个人又佔領 迦薩、亞實基倫、以革倫㧯這兜城周圍个土地。

¹⁹ 上主幫助猶大支族个人，佢等就佔領山區，總係無法度將住在平地个人逐走，因為佢等有鐵戰車。

²⁰ 照摩西个命令，迦勒得到希伯崙；佢將亞衲後代三族个人逐出該城。

²¹ 便雅憫支族个人無將住在耶路撒冷个耶布斯人逐走，所以耶布斯人直到今晡日還㧯便雅憫人共下住在該位。

以法蓮㧯瑪拿西支族佔領伯特利

^22-23 約瑟个後代 — 以法蓮㧯瑪拿西支族个人去攻打伯特利城；這城以前安到路斯。上主幫助佢等。佢等派探仔到城肚去；

²⁴ 探仔看到一個人對城肚出來，就問佢：「請㧯𠊎等講樣般入城，𠊎等毋會傷害你。」

²⁵ 該人就㧯佢等講。所以以法蓮㧯瑪拿西支族个人㓾死城肚所有个人民，只留下該人㧯佢屋下人。

²⁶ 後來，該人到赫人个土地，在該位起一座城，將它安到路斯；這城到這下還係喊這個名。

以色列其他支族無逐走个人民

²⁷ 瑪拿西支族个人無將住在伯‧善、他納、多珥、以伯蓮、米吉多，㧯各城附近村莊个人民逐走；迦南人強強毋肯走，繼續住在該位。

²⁸ 以色列人強盛後，佢等強迫迦南人做苦工，總係無將佢等全部逐走。

²⁹ 以法蓮支族个人無將住在基色城个迦南人逐走，所以迦南人繼續㧯佢等共下住。

³⁰ 西布倫支族个人無將住在基倫㧯拿哈拉城个人民逐走，所以迦南人繼續住在該位，總係做西布倫人个苦工。

³¹ 亞設支族个人無將住在亞柯、西頓、亞黑拉、亞革悉、黑巴、亞弗革、㧯利合个人民逐走。

³² 佢等㧯這兜當地个迦南人共下住，無將佢等逐走。

³³ 拿弗他利支族个人無將住在伯‧示麥㧯伯‧亞納城个人民逐走。佢等㧯當地个迦南人共下住，總係強迫這兜人做苦工。

³⁴ 亞摩利人將但支族个人迫上山區，毋准佢等下到平地來。

³⁵ 亞摩利人繼續住在亞雅崙、沙賓㧯希烈山；總係約瑟个後代 — 以法蓮㧯瑪拿西支族个人征服佢等，強迫佢等做苦工。

³⁶ 亞摩利人个邊界對亞克拉濱路口開始，在西拉北片。