哥林多後書 1 - 客語聖經 – 現代臺灣客語譯本，新舊約全書客語聖經 – 漢字版

¹ 𠊎係保羅；𠊎奉上帝个旨意做基督耶穌个使徒。𠊎㧯𠊎等个兄弟提摩太寫信仔給在哥林多城上帝个教會㧯全亞該亞所有个聖徒。

² 願𠊎等个阿爸上帝㧯主耶穌基督賜恩典、平安給你等。

保羅感謝上帝

³ 頌讚歸給𠊎等主耶穌基督个阿爸上帝！佢係慈愛个天父，也係賜一切安慰个上帝。

⁴ 𠊎等在各種个患難中，佢安慰𠊎等，使𠊎等能用佢賜給𠊎等个安慰去安慰在各種患難中个人。

⁵ 因為𠊎等有份基督个各種苦難，像恁樣，𠊎等也通過基督得到盡多安慰。

⁶ 𠊎等若堵到苦難，係愛使你等得到安慰，得到拯救；𠊎等若得到安慰，係愛使你等得到安慰，同時得到力量來忍受同𠊎等所堵到共樣个苦難。

⁷ 𠊎等確信你等毋會使𠊎等失望；因為𠊎等知，就像你等分擔𠊎等个苦難，你等也會分享𠊎等所得到个安慰。

⁸ 兄弟姊妹啊，𠊎等無愛你等毋知，𠊎等頭擺在亞細亞省所堵到个患難。磧在𠊎等身上个重擔超過人所能負擔个，害𠊎等連生存个希望也無掉去；

⁹ 𠊎等感覺到像已經被人判死刑。因為恁樣，𠊎等知，𠊎等做毋得靠自家，一定愛靠使死人復活个上帝。

^10-11 佢識救𠊎等脫離死亡个危險，將來還愛拯救；只愛你等用祈禱幫助𠊎等，𠊎等確信，將來佢也會拯救𠊎等。恁樣，有幾多人為𠊎等祈禱，就會有幾多人因為𠊎等个蒙恩來感謝上帝。

說明改變計劃个原因

¹² 𠊎等所誇口个，𠊎等个良心所證明个就係：在這世間，特別係對你等，𠊎等係用上帝所賜个單純 㧯誠懇來做人；𠊎等恁樣行係靠上帝个恩典，毋係靠世間人个智慧。

^13-14 𠊎等寫給你等个，係你等所能讀、所能明白个。你等這下對𠊎等有毋了解个所在，𠊎希望你等最後會完全了解。恁樣，在𠊎等个主耶穌再來該日，你等會因為𠊎等來誇口，像𠊎等因為你等誇口一樣。

¹⁵ 𠊎既然有這種个確信，早就計劃愛先去訪問你等，使你等得到加倍个祝福。

¹⁶ 𠊎去馬其頓个時，原來計劃愛先對你等該位經過，然後對馬其頓轉頭，再去你等該位一擺，好俾你等幫助𠊎去猶太。

¹⁷ 𠊎恁樣計劃，麼人能批評𠊎無慎重呢？敢講𠊎恁樣計劃係出於自私，一下講愛，黏時又講無愛，是非不分嗎？

¹⁸ 𠊎指信實个上帝講，對你等講話，𠊎毋識一下講「係」，黏時又講「毋係」。

¹⁹ 因為𠊎、西拉，㧯提摩太傳給你等个，就係上帝个孻仔耶穌基督，佢並毋係「係」又「毋係」个；顛倒，佢就係上帝个「係」。

²⁰ 上帝一切个應許全部在基督个身上成做「係」了。所以，𠊎等通過佢講「阿愐」來榮光上帝。

²¹ 在基督底背使𠊎等㧯你等相共得到堅固，又使𠊎等聖別出來个，就係上帝。

²² 係佢在𠊎等身上揝印，又賜聖靈在𠊎等心內，做佢為𠊎等所準備一切个擔保。

²³ 𠊎求上帝做證；𠊎若講花撩，佢會責罰𠊎！𠊎無去哥林多係寬容你等。

²⁴ 𠊎等毋係愛勉強你等信麼介；顛倒，係愛同你等合作，使你等歡喜，因為你等在信仰上已經企穩。