哈巴谷書 1 - 客語聖經 – 現代臺灣客語譯本，新舊約全書客語聖經 – 漢字版

¹ 下背係上主向先知哈巴谷所啟示个信息。

哈巴谷為無公平怪怨

² 上主啊，𠊎愛求你幫助幾久，你正會聽？𠊎愛大聲喊你幾久，你正會救𠊎等離開強暴呢？

³ 你做麼介愛𠊎看到恁罪惡个事？你樣般做得由在這種壞事發生呢？在𠊎面前全部係毀壞、強暴，逐所在攏總係相爭、相打。

⁴ 法律無效，無實行出來；正義一直得毋到伸張。壞人欺負義人，正義受歪曲。

上主个回答

⁵ 上主對佢个子民講：「注意看你等四周圍个國家，你等會當著驚。𠊎愛在你等个時代做一件事，你等聽到个時會毋敢相信。

⁶ 𠊎愛使當兇、殘暴个巴比倫人強盛起來。佢等愛征服世界，佔領別人个土地。

⁷ 佢等威武殘忍、盡得人驚；佢等目中無人，自家个意思當做法律。

⁸ 「佢等个馬比豹仔走較遽，比肚飢个豺狼還較惡。佢等个騎兵對遠方來；佢等猋等來，就像鷂婆衝下來挾食物。

⁹ 「佢等个軍隊威風凜凜向前進，所到个地方，逐儕驚到會死 。佢等捉到个人像沙仔恁多。

¹⁰ 佢等嘲謔君王㧯官長。所有个防備全部擋佢等毋住；佢等起土堆，將城堡攻下來。

¹¹ 佢等像風差恁樣掃過去；這兜罪人將自家个力量準做神明。」

哈巴谷又怪怨上帝

¹² 上主啊，你對太初就係上帝。你係𠊎个上帝，係神聖个，永遠个。上主 — 𠊎个保護者啊，你揀選巴比倫人，使佢等強壯，來責罰𠊎等。

¹³ 總係，你樣般做得由在這兜悖逆、邪惡个人呢？你个目珠當聖潔；你絕對毋會看等罪惡，由在人民做壞事。恁樣，佢等毀滅比自家較公正个人，你做麼介毋講話呢？

¹⁴ 你樣般做得將人民準做海肚个魚，抑係一群無領袖指揮个爬蟲呢？

¹⁵ 巴比倫人用鉤仔鉤人，像釣魚仔共樣；佢等用網仔網人，網到人就歡喜快樂！

¹⁶ 佢等甚至拜佢等个網仔，向網仔獻祭燒香，因為該兜網仔帶給佢等豐富个生活㧯食物。

¹⁷ 敢講愛由在佢等一直將網仔拚淨，㓾萬民，無半點憐憫个心嗎？