利未記 1 - 客語聖經 – 現代臺灣客語譯本，新舊約全書客語聖經 – 漢字版

燒化祭个條例

¹ 上主對聖帳篷中喊摩西，吩咐佢

² 向以色列人民宣佈以下个條例。 你等當中若有人獻牲儀給上主，愛獻牛群中个牛，抑係羊群中个羊。

³ 若係佢獻牛做燒化祭，一定愛用無缺點个牛牯，牽牠到聖帳篷門口，上主就會接納。

⁴ 佢愛將手放在頭牲个頭那頂；這燒化祭就受接納，能代佢贖罪。

⁵ 佢愛在上主面前將這隻牛牯㓾死；亞倫族个祭司愛獻牲儀个血，然後將這血洒在聖帳篷門口个祭壇四周圍。

⁶ 接等，該人愛剝牲儀个皮，將肉切做一垤一垤；

⁷ 該兜祭司愛將柴放在祭壇頂，點火，

⁸ 將肉、頭那㧯油全部放在祭壇个柴火頂高來燒。

⁹ 該人一定愛用水將牲儀个腹內㧯後腿洗淨；祭司愛將牲儀全部放在祭壇頂獻做燒化祭。這火祭个香味係上主所歡喜个。

¹⁰ 若係佢獻綿羊抑係山羊做燒化祭，佢一定愛用無缺點个羊牯。

¹¹ 佢愛在祭壇个北片，在上主面前將這隻羊牯㓾掉；亞倫族个祭司愛將牲儀个血洒在祭壇个四周圍。

¹² 該人將肉切做垤以後，祭司愛將肉、頭那㧯油全部放在祭壇个柴火頂高來燒。

¹³ 該人一定愛用水將牲儀个腹內㧯後腿洗淨；祭司愛將牲儀全部放在祭壇頂獻做燒化祭。這火祭个香味係上主所歡喜个。

¹⁴ 若係佢獻鳥仔給上主做燒化祭，佢一定愛用班鳩抑係月鴿仔。

¹⁵ 祭司愛將鳥仔帶到祭壇前，扭斷牠个頭那，將頭那放在壇頂來燒，將鳥仔放在壇堘，俾牠个血流燥。

¹⁶ 該人愛將鳥仔个頦㧯留在底背个東西共下拿掉，㧹在祭壇東片倒灰个地方。

¹⁷ 佢愛拿等鳥仔个兩隻翼胛，將鳥仔扯開，總係毋好扯斷掉；然後祭司愛將牲儀放在祭壇頂、在柴火頂高，獻做燒化祭。這火祭个香味係上主所歡喜个。