列王紀下 1 - 客語聖經 – 現代臺灣客語譯本，新舊約全書客語聖經 – 漢字版

以利亞㧯亞哈謝王

¹ 以色列王亞哈死掉以後，摩押國就反以色列。

² 以色列王亞哈謝對撒馬利亞王宮个陽臺跌下來，著傷盡嚴重。佢派人去求問非利士地區以革倫城个神 — 巴力‧西卜，愛知佢个病會好麼？

³ 總係上主个天使吩咐提斯比人先知以利亞去見亞哈謝王个使者，問佢等：「你等做麼介去求問以革倫个神巴力‧西卜？敢講以色列當中無上帝係麼？

⁴ 你等去㧯王講，上主恁樣講：『你無法度對病床下來；你一定會死！』」 以利亞就照上主个命令去做。

⁵ 使者轉到王該位；王問佢等：「你等做麼介轉來？」

⁶ 佢等講：「𠊎等堵到一個人；佢喊𠊎等轉來㧯王講，上主對你恁樣講：『你做麼介派人去求問以革倫个神巴力‧西卜？敢講以色列當中無上帝係麼？所以你無法度對病床下來；你一定會死！』」

⁷ 王問：「你等堵到个人生到麼介樣仔？」

⁸ 佢等講：「佢著皮毛个衫，又繫等皮帶。」 王大聲講：「佢係提斯比人以利亞！」

⁹ 所以，王派一個軍官帶五十個部下去以利亞該位，看到佢坐在山岡頂，就對佢講：「神人哪，王命令你下來！」

¹⁰ 以利亞應講：「𠊎若係神人，願火對天頂降下來燒死你㧯你五十個部下！」黏時有火對天頂降下來，燒死該軍官㧯佢五十個部下。

¹¹ 王又派另外一個軍官帶五十個部下去；佢對以利亞講：「神人哪，王命令你遽遽下來！」

¹² 以利亞應講：「𠊎若係神人，願火對天頂降下來燒死你㧯你五十個部下！」黏時上帝个火對天頂降下來，燒死該軍官㧯佢五十個部下。

¹³ 王第三擺又派一個軍官帶五十個部下去。該軍官去到該位，跪在以利亞面前，求佢講：「神人哪，請憐憫𠊎㧯你這五十個僕人；救𠊎等个性命！

¹⁴ 已經有兩個軍官㧯佢等个部下全部被天頂來个火燒死囉；總係這下求你可憐𠊎！」

¹⁵ 上主个天使對以利亞講：「你㧯佢共下去，毋使驚佢！」以利亞就㧯該軍官到王該位去，

¹⁶ 對王講：「上主恁樣講：『因為你派人去求問以革倫个神巴力‧西卜，敢講以色列當中無上帝係麼？所以你無法度對病床下來；你一定會死！』」

¹⁷ 照上主通過以利亞所講个，亞哈謝王正經死掉。亞哈謝無孻仔，所以佢个老弟約蘭承接佢做王；該年係猶大王約沙法个孻仔約何蘭在位个第二年。

¹⁸ 亞哈謝其他个事全部記在《以色列列王史》底背。