Tizaret 8 - Awal n Messineɣ s Tamahaq

Yeǧmeḍ Noḥ essendoq

¹ Ezzar yesmekta Yaḷḷah Noḥ d ǎxxuten emdan wi ds eddéwnén dɣ essendoq. Yesheḍ aḍu fol ǎmǎḍal ezzar eglen aman sollan sollan.

² Aman wid efalnén édér n ǎmǎḍal d win aǧenna ergelen. Aǧenna yessosem.

³ Eglen aman sollan sollan fol ǎmǎḍal. Eresen aman ḍeffer téméḍé n ahel d semmoset temerwén.

⁴ Ahel wan meraw d essa dɣ tallit tan essahet, yeres essendoq fol tidreɣén tin Araraṭ.

⁵ Eqqimen aman errasen arweh ar tallit tan merawet. Ahel wa yezzaren dɣ tallit taɣ, ǎmunnet tidreɣén.

⁶ As okeyen ekkoẓet temerwén n ahel yora Noḥ eṭṭaga ta yekna fol essendoq.

⁷ Yessegla ǎɣaleǧ. Igal itaqqel-d a ekken aman toɣaren fol ǎmǎḍal.

⁸ Ezzar yessegla Noḥ tedǎbért baš éd yessen aman eresen fol ǎmǎḍal méɣ animér.

⁹ Beššan wr tosé id tejjen édét aman ellant arweh, teqqel-d essendoq ɣor Noḥ. Yeẓẓel ǎfus yermes tt, yezzogeh tt ɣors dɣ essendoq.

¹⁰ Okeyen essa iheḍan ezzar yesseglet arweh.

¹¹ Teqqel-d tedǎbért s iẓelluwaẓ teṭṭaf dɣ émi ennét afraw n ezzeytun. Yelmed Noḥ as aman eresen.

¹² Yessokey essa iheḍan arweh, ezzar yessegla tedǎbért beššan wr-d teqqél.

¹³ Ahel wa yezzaren dɣ seḍiset temaḍ d iyyen dɣ iwetyan n Noḥ ad yeswa ǎmǎḍal aman. Yora Noḥ asfel n essendoq, yekyed dɣ ténéré, ma ihanney deh ? Ihanney ǎmǎḍal yeqqoren, ǎbas-t ellen aman.

¹⁴ Ahel wan senatet temerwén d essa dɣ tallit tan senatet ǎmǎḍal yeqqor.

¹⁵ Yesséwel Yaḷḷah i Noḥ, yenna has :

¹⁶ « Egmeḍ essendoq, key d hennik d meddank d tiḍulén ennek.

¹⁷ Segmeḍ ǎxxuten wi dk eddéwnén emdan : éheré, iweɣsan d ǎxxuten wi ǎhimemmeretnén d igḍaḍ. Éd ewnekneken, éd ilwin fol ǎmǎḍal.

¹⁸ Yegmeḍ Noḥ essendoq enta d hennis d meddans d tiḍulén ennét.

¹⁹ Egmeḍen ǎxxuten emdan ak iyyen d ennoƹ ennét : éheré, iweɣsan d ǎxxuten wi ǎhimemmeretnén d igḍaḍ, wiyeḍ ḍeffer wiyeḍ.

²⁰ Yekna Noḥ ǎsǎɣres i Amaɣlol. Yeŋɣa iyyen dɣ ak ǎxxu xelalen d ak egǎḍéḍ xelalen yeket tn i Yaḷḷah eqqaden fol témsé.

²¹ Yesreɣ Amaɣlol aḍu wah yeẓéden, yegreẓ as, yeɣbelt ezzar yenna dɣ iman ennét : « Mn dimaɣ ǎbas taggeɣ tilɣant fol ǎmǎḍal dɣ érét n ǎddunet. Tidet as wa fol meḍriyen exlan ulawen nsn. Beššan ǎbas naqqeɣ a yedderen hund awa egeɣ dimaɣ.

²² A yekka illé ǎmǎḍal, a yeŋɣelen d a yeŋŋen, tuksé d esǎméḍ, ǎwélen d tagrest, ahel d éheḍ, wr éd emmendun. »