Tizaret 5 - Awal n Messineɣ s Tamahaq

IHEYAWEN N ADAM 5.1-11.9

¹ Awah tǎnǎqqést tan Adam d iheyawen ennét : ahel wad yexlek Yaḷḷah Adam yekné yola ds.

² Yexlek tn ǎmosen éy d tunté. Yeǧa sn elbaraka ezzar yeǧa sn isem ales d tǎmǎṭ ahel wa dɣ exleken.

³ As yekreh Adam téméḍé n ǎwetay d keraḍet temerwén yekreh arraw hund enta, yola ds. Igas isem Šet.

⁴ Ḍeffer tiwit n Šet yedder Adam ettamet temaḍ n ǎwetay arweh. Yekreh arrawen wiyeḍ heḍnén d tarrawén.

⁵ Yedder teẓẓahet temaḍ n ǎwetay d keraḍet temerwén ezzar yemmut.

⁶ As yekreh Šet téméḍé n ǎwetay d semmos yekreh arraw isem ennét Enoš.

⁷ Ḍeffer tiwit n Enoš, yedder Šet ettamet temaḍ n ǎwetay d essa. Yekreh arrawen d tarrawén wiyeḍ heḍnén.

⁸ Yedder teẓẓahet temaḍ n ǎwetay d meraw d essin ezzar yemmut.

⁹ As yekreh Enoš teẓẓahet temerwén n ǎwetay yekreh arraw isem ennét Qenan.

¹⁰ Ḍeffer tiwit n Qenan yedder Enoš ettamet temaḍ n ǎwetay d meraw d semmos. Yekreh arrawen d tarrawén heḍnén.

¹¹ Yedder teẓẓahet temaḍ n ǎwetay d semmos ezzar yemmut.

¹² As yekreh Qenan essahet temerwén n ǎwetay yekreh arraw isem ennét Mahlalyel.

¹³ Ḍeffer tiwit n Mahlalyel yedder Qenan ettamet temaḍ n ǎwetay d ekkoẓet temerwén. Yekreh arrawen d tarrawén heḍnén.

¹⁴ Yedder teẓẓahet temaḍ n ǎwetay d meraw ezzar yemmut.

¹⁵ As yekreh Mahlalyel seḍiset temerwén n ǎwetay d semmos yekreh arraw isem ennét Yared.

¹⁶ Ḍeffer tiwit n Yared, yedder Mahlalyel ettamet temaḍ n ǎwetay d keraḍet temerwén. Yekreh arrawen d tarrawén heḍnén.

¹⁷ Yedder ettamet temaḍ n ǎwetay d teẓẓahet temerwén d semmos ezzar yemmut.

¹⁸ As yekreh Yered téméḍé n ǎwetay d seḍiset temerwén d essin yekreh arraw isem ennét Hénok.

¹⁹ Ḍeffer tiwit n Hénok yedder Yered ettamet temaḍ n ǎwetay. Yekreh arrawen d tarrawén heḍnén.

²⁰ Yedder teẓẓahet temaḍ n ǎwetay d seḍiset temerwén d essin ezzar yemmut.

²¹ As yekreh Hénok seḍiset temerwén n ǎwetay d semmos yekreh arraw isem ennét Matušaleḥ.

²² Ḍeffer tiwit n Matušaleḥ, yedder Hénok keraḍet temaḍ n ǎwetay, yelkam i ǎbǎreqqa n Yaḷḷah. Yekreh arrawen d tarrawén heḍnén.

²³ Yedder keraḍet temaḍ n ǎwetay d seḍiset temerwén d semmos.

²⁴ Dɣ tǎmeddort ennét yelkam i ǎbǎreqqa n Yaḷḷah, ad yexrek édét Yaḷḷah yéweyt ɣors.

²⁵ As yekreh Matušaleḥ téméḍé n ǎwetay d ettamet temerwén d essa yekreh arraw isem ennét Lamek.

²⁶ Ḍeffer tiwit n Lamek yedder Matušaleḥ essahet temaḍ n ǎwetay d ettamet temerwén d essin. Yekreh arrawen d tarrawén heḍnén.

²⁷ Yedder teẓẓahet temaḍ n ǎwetay d seḍiset temerwén d teẓẓa ezzar yemmut.

²⁸ As yekreh Lamek téméḍé n ǎwetay d ettamet temerwén d essin yekreh arraw,

²⁹ yeǧas isem Noḥ. Yenna : « Édét waɣ éd haneɣ isesmeḍ fol oḍuh d elxedmet ta teṣṣohét n ǎmǎḍal wa fol iǧa Amaɣlol tilɣant. »

³⁰ Ḍeffer tiwit n Noḥ, yedder Lamek semmoset temaḍ n ǎwetay d teẓẓahet temerwén d semmos. Yekreh arrawen d tarrawén heḍnén.

³¹ Yedder essahet temaḍ n ǎwetay d essahet temerwén d essa ezzar yemmut.

³² Ila Noḥ semmoset temaḍ n ǎwetay as yekreh keraḍ arrawen ismawen nsn Sam, Ḥam d Jafet.