Tizaret 46 - Awal n Messineɣ s Tamahaq

Yekka Yaƹqub Maṣar

¹ Yegla Yaƹqub enta d tela ennét temda. As yeweḍ taɣremt n Bersabeƹ, iǧa takuté i Messineɣ n tis Isḥaq.

² Éheḍ wéndɣ yesséwel as Messineɣ. Yeɣre : « Yaƹqub ! Yaƹqub ! » Yenna has Yaƹqub : « Nk deh. »

³ Yenna has Messineɣ : « Nk Messineɣ, Amaɣlol n tik, wr teksoḍed éd tas-d Maṣar, éd key ekfeɣ iheyawen ǎǧǧotnén, déndɣ ad éd umasen ellamet mǎqqeret.

⁴ Nk a dk éd idawen a hin tawḍed, arreɣ key-d daɣ ǎkal-ennek. Ɣor tǎmettant ennek, Yusef iman ennét a hak éd yehrin téṭṭawén ».

⁵ Yefel Yaƹqub Bersabeƹ. Egent meddans dɣ elkerwiletén tin Ferƹaon, enta d téḍéḍén-nsn d meddansn.

⁶ Emhelen éheré nsn d awa elen imda dɣ Kenƹan, eweḍen-in Maṣar hund awén.

⁷ Awéndɣ a iǧa Yaƹqub ad yaweḍ Maṣar enta d ǎddunet ennét emdan.

Ǎddunet n Yaƹqub

^8-15 Awah ǎddunet win Yaƹqub wi osenen Maṣar : meddans d iheyawen-ennét. Awaɣ arrawen wi yekreh Yaƹqub dɣ Léya dɣ ǎkal wan Fadan-Aram : Ruben, wa mǎqqeren dɣ meddans n Yaƹqub. arrawen n Ruben Hénok, Falu, Heṣron d Kermi. Šimƹun, meddans Yemuel, Yamin, Ohad, Yakin, Sohar d Šaul, waɣ ehreyen térewt tǎmǎṭ n Kenƹaniten. Léwi, meddans, Jeršon, Qehat d Merari. Yehuda, meddans Šila, Fareṣ d Zerah. Ila essin eba tn dɣ ǎkal n Kenƹan, Ɣer d Onan. Rurés n Yahuda wan essin s isem ennét Fares ila essin meddans, Hesron d Hamul. Isakar, meddans Tola, Fuwa, Yub d Šimron. Zabulon, meddans Sared, Elon d Yaleel. Ila Yaƹqub dɣ Léya aked tunté teǧat isem Dina. Entenéḍ d meddansn ǎmosen keraḍet temerwén d karaḍ.

^16-18 Yekreh Yaƹqub arrawen aked dɣ Zilfa, taklit ta yekfa Laban i yellés Léya, nɣwih : Jad d meddans Sefyun, Haji, Šuni, Esbon, Eri, Arodi d Areli. Ašir d meddan-s Yemna, Išwa, Išwi d Beriƹa, d tǎmeḍrayt nsn Sera. Beriƹa ila essin meddans Heber d Malkiel. Awén meddans d iheyawen n Yaƹqub d Zilfa. Ǎmosen meraw d seḍis.

¹⁹ Rašél, hennis Yaƹqub, tekfe essin arrawen : Yusef d Benyamin.

²⁰ Dɣ Maṣar Yusef yekreh essin arrawen dɣ hennis Asnat, welt Foti-fereƹ ǎmǎrabu n aɣrem wan On, isem nsn Mensi d Efraym.

²¹ Benyamin yekreh meraw arrawen : Béla, Baker, Ašbil, Jira, Naƹman, Ehi, Roš, Mufim, Hufim d Ard.

²² Awah meddans d iheyawen n Yaƹqub d Rašél, ǎmosen meraw d ekkoẓ.

^23-25 Yekreh Yaƹqub arrawen aked dɣ Bilha, taklit ta yekfa Laban i yellés Rašél, nɣwih : Dan d rurés Hušim. Neftali d meddans Yasiel, Juni, Yeser d Šilem. Awén meddans d iheyawen n Yaƹqub d Bilha. Ǎmosen essa.

²⁶ Ǎddunet win Yaƹqub wi ekkenen Maṣar ǎmosen seḍiset temerwén d seḍis. Otanet folsn tiḍulén ennét (téḍéḍén n meddans).

²⁷ Windɣ d arrawen win Yusef wi ewenén dɣ Maṣar, eqqalen essahet temerwén.

Yaƹqub dɣ Maṣar

²⁸ Yezmahel Yaƹqub Yehuda éd has yelleɣet i Yusef émér wa hin eyaweḍ Jasen. As deroɣ ewaḍen Yaƹqub d innet Jasen,

²⁹ yezwejjed Yusef elkerwila-ennét, yegla éd dsn imhiyyet. As yeney tis, yeṭṭef-t dɣ ifassen ennét, yeslef as fol eẓer a-d iǧa eket.

³⁰ Yenna has Yaƹqub : « dimaɣ addobeɣ éd emmeteɣ, édét teddared. Enmeneynet téṭṭawén tinnu d tinnek dɣ tameddortin ».

³¹ Yenna Yusef i ayet-mas d ǎddunet win tis emdan : « éd egleɣ éd elleɣuɣ i Ferƹaon tisit nwn déɣ, kewenéḍ wis kelad tezzaɣem ǎmǎḍal n Kenƹan.

³² Éd has enneɣ in tamosem imeḍanen, teḍḍanem éheré, teweyem-d éheré nwn we ǧezzulen d wa heǧren d awa tlem imda.

³³ As kewen yeɣra Ferƹaon, yessesten kewen d elxedmet-nwn,

³⁴ ennét as tamosem imeḍanen, teḍḍanem éheré wa fol meḍriyem ar dimaɣ hund abbaten nwn emdan. Dédih éd kewen yey éd tezzeɣem ǎmǎḍal wa yoǧǧeǧen n Jasen, édét elmesriten ekyaḍen ǎddunet wi eḍḍanen éheré wa ǧezzulen .