Matayo 1 - THUR BIBLE PORTIONS

Kwere ka Yecu

¹ Man ënë kwere ka Yecu Kiricito, akwar Daudi, akwar Abraam:

² Abraam önywölö Icaka, Icaka önywölö Jakob, Jakob önywölö Yuda ëka omego mërë,

³ Yuda kï dhakö mërë Tamar önywölö gïnï Perej ëka Jera, Perej önywölö Kejeron, Kejeron önywölö Ram,

⁴ Ram önywölö Aminadab, Aminadab önywölö Nacon, Nacon önywölö Calamon,

⁵ Calamon kï dhakö mërë Raab önywölö gïnï Boaj, Boaj kï dhakö mërë Ruth önywölö gïnï Obed, Obed önywölö Jece,

⁶ ëka Jece önywölö rwoth Daudi. Daudi önywölö Colomon, n'onwongo aya mërë obedo dhakö ka Uria

⁷ Colomon önywölö Rekoboam, Rekoboam önywölö Abija, Abija önywölö Aca,

⁸ Aca önywölö Yekocapat, Yekocapat önywölö Joram, Joram önywölö Ujia,

⁹ Ujia önywölö Yotam, Yotam önywölö Akaj, Akaj önywölö Kejekia,

¹⁰ Kejekia önywölö Manace, Manace önywölö Amon, Amon önywölö Yocia,

¹¹ ëka Yocia önywölö Yekonia ëka omego mërë ï karë n'etero jö Icarael ï lobo Babilon.

¹² Kinge na dong etero jö Icarael ï lobo Babilon: Yekonia önywölö Celatiel, Celatiel önywölö Jerubabel,

¹³ Jerubabel önywölö Abiud, Abiud önywölö Eliakim, Eliakim önywölö Ajor,

¹⁴ Ajor önywölö Jadok, Jadok önywölö Akim, Akim önywölö Eliud,

¹⁵ Eliud önywölö Eleajar, Eleajar önywölö Mathan, Mathan önywölö Jakob,

¹⁶ ëka Jakob önywölö Yocepu cwör Maria, n'önywölö Yecu n'ecwodo nï Kiricito.

¹⁷ Man ënë wang rok apar wie angwën n'ënywölögï kïbëc cakërë kï ï kom Abraam naka othuno ködë ï kom Daudi, apar wie angwën kï kom Daudi naka othuno ï karë n'eterogï ï Babilon, ëka apar wie angwën kï ï karë n'eterogï ï Babilon naka othuno ï kom Meciya.

Nywölö Yecu Kiricito

¹⁸ Man ënë kite n'ënywölö kï Yecu Kiricito: Ï karë na Maria onwongo öcïkërë më nyömërë kï Yocepu, na gïn bara örwatërë kanya acël, enwongo nï Maria öyac kï tëkö ka Tipo Naleng.

¹⁹ Yocepu onwongo obedo dhanö na kite atïr ëka ba ömïtö nï eketh lewic ï kom Maria, ëntö onwongo mïtö nï ëkwër Maria ï müng.

²⁰ Ï karë na Yocepu pod tye ka thamö köp nön kï ï cwinye, malaika ka Rwoth onen bothe ï wang lek ëka okobo nï, “Yocepu akwar Daudi, kür ibed kï lworo më tero Maria më bedo dhaköni, pïën ïc na ën tye ködë ögamö kï tëkö ka Tipo Naleng.

²¹ Ën bino nywölö athïn awobi, ëka in ibino cakö nyïngë Yecu, pïën ën bino larö jögë kï ï kom balgï.”

²² Man kïbëc ötïmërë ëk köp ka Rwoth ocobere na ën okobo kï ï dhö adwarpïny nï:

²³ “Nyakö na bara ongere k'ëcwö bino yac ëka bino nywölö athïn awobi; ebino cakö nyïngë Emmanuel”—na tyën köp mërë nï, “Obanga tye ködwa.”

²⁴ Ï karë na Yocepu ocoo kï ï wang nïnö, ën ötïmö kite na malaika ka Rwoth öcïkö ën ködë ëka otero Maria obedo dhakö mërë.

²⁵ Ëntö Yocepu ba obedo ködë naka ënywölö athïn awobi ëka Yocepu öcakö nyïngë Yecu.