तीतस 3 - थुलुङ राईजो़पा खारी बोमु 1 आरे बोमु थो़रलु़पामिमलाई मिम्बेडामी: साखामचो़ नुङ सरकारी डोक्पु मु़चु़मिमकु ल्वाडा बुमु, मेर्मिमका र्वामिमिम थो़मु, मा हाम लोवो जो़पा खारी बोमु लागि झो़म्जो़ल्सिमु। 2 मेर्मिमका सु़लाई वो डक्साका मेजेमिनु़, मा रिबुसी मेकिन्मिनु़। न-थो़मनुङमा दु़म्मिनु़, मा याक्के दु़म्साका खोत्ले मु़चु़मिमनुङ जेमिनु़-दोमिनु़। 3 कोबिलि गुइ वो नेप्ची मान्थिम नुङ र्वाकिमिम मेथो़पा बाइडी। लु-फेले बेला सो़सिक्पा, मेजो़पा नकाम नुङ नसीहोम बिइबाल्ली। नो़ मेनु़पा, नाचु़रनुङमा, मेद्वाला सो़सिक्पा, मा मेद्वाबेपा बाइडी। 4 लावो इकीमा सेल्पा माम्चु़नीका उनी न-थो़म नुङ रिखाम गुइडला रेम्बेम्डी, 5 मा गुइ बिइडिम जो़पा खारीका ने मेएँ, माम्चु़नीकु न-थो़मका सेल्साड्डामी। गुमीका इकीमा छु़लमिम हेप्साड्डामी, मेम्मा उनीमा पेलका लाले त्वारो़म ग्वाक्साका लाले मु़चु़ दु़म्बेसाड्डामी। 6 मेराम उनीमा पेल इकीमा सेल्पा येशू ख्रीष्टलामका माम्चु़नीका गुइडला हापा अम्डी। 7 मेम्साका उनीमा दिदामका उनीमा न-गो होप्माम दु़म्साका हेल्लो वो मेसिपा त्वारो़म ल्वामु न बेपा उनीमा चो़मिम दु़म्सिनु़। 8 ओराम आच्छाङा र्वाक्मा सो़, ओर्मिम सीसि छो़म सीडामी, मेम्साका माम्चु़नीडा थो़रलु़पा खोत्लेका जो़पा खारी छो़म बोमु माल्पा दु़म्मिनु़। ओर्मिम सीसि खोत्लेकाम लागि जो़पा नुङ ख्लो़पा बु। 9 लावो हाम ना हामकु ल्वाडा खाल्बोमु, पाइमाखाकु दुथाम खाल्बोमु नुङ मोशाकु डु़म्लामिम होम्साका दोमुकु दुथाम रिबुसी किन्मुडाम गाना वाङ बाया वो। हेङालोने ओर्मिम ल्वा ने हाम ना हामकाम नुङ नेमताबेट्पा कोङङा सो़। 10 मेदु़बेट्पा मु़चु़लाई कोखेप-नकखेप ङिम्साडा। मेम्मा हाम वो मेबे। 11 आरेप्माम मु़चु़ आच्छाङाकु ल्वाडाम होनो लक्पा, मा उ त्वाकु छु़लमिमकाङा गुलाई मुमा बेडु़ र्वाक्पा गाना चसा। पावलका हुम-दडा र्वाक्ताम ल्वा 12 अर्तिमास लोवो तुखिकस लोवो इमाडा थु़र्मु र्वाक्तोङा लेट्पु। मेर्चिप गोडा कोले इमाडा रोफालो नेकोपोलिस शहरडा गाना इमा चाप्सी दाला गोलाई क्रो़म्ङी। हेङालोने जुनेमका गो मेसिन्डाङा बुमु मुलु़ बेउतोम बु। 13 वकील जेनास नुङ अपोल्लोस लाम्दिचिलो खोत्ले ल्वाडा इमा चाप्सी ख्लो़याची। मेम्मा मेर्चिपलाई हामकाम वो खेरेला मेदु़म्नु़। 14 गुइ थो़रलु़पामिम खोत्लेका जो़पा खारी बोमु माल्पा दु़म्मु बासी। मेम्साका खेरेला दु़म्पा मु़चु़मिमलाई ख्लो़मुमि बासी। मेम्मा गुइ हाम ना हामकाम मेदु़म्सी। 15 गोनुङ बाट्पा खोत्लेका गानालाई सेव र्वाम्डिम बु। गुइलाई रिखाम बेपा थो़रलु़पामिमलाई सेव र्वाङसाक्ङी। माम्चु़नीकु दिदाम गानी खोत्लेनुङ दु़म्नु़। |
© Wycliffe Bible Translators, Inc. All rights reserved.
Wycliffe Bible Translators, Inc.