तीतस 2 - थुलुङ राईआच्छाङाकाम सीसि 1 तीतस, गाना ने आच्छाङाकाम सीसि सीडामी। 2 ङावा मु़चु़मिमलाई मिम्साका खारी बेपा, डोक्पु मिम्मुका घ्रेट्पा, त्वापलाई जो़होमका जु़ल्पा दु़म्मु सीडामी। माम्चु़नीडा मेर्मिमका छो़म डोक्पु थो़र बोमिनु़, मा रिखामनुङमा नुङ इम्मु चापा दु़म्मिनु़। 3 मेम्साकाङा ङामी मेसेममिमका वो उनी थो़रलु़सीलाई घ्रेट्पा सेपा बासी-दोसी बोमु सीडामी। वाङमिमलाई डक्साका जेपा, मा छो़म डु़ डुपा मेदु़म्मिनु़। मेम मेबेसाका मेर्मिमका वाङमिमलाई जो़पा ल्वा सीमिनु़। 4 मे ङामी मेसेममिमका स्वालामे मेसेममिमलाई उनी वोचु़ नुङ चो़च्चो़मिमलाई रिखाम बोमु, 5 मा त्वापलाई जो़होमका जु़ल्पा, सेपा न-गोनुङमा दु़म्पा, नेम-किम जो़होमका रेपा, न-थो़मनुङमा नुङ उनी वोचु़कु ल्वाडा बुमु सीमिनु़-चेमिनु़। मेम्साका माम्चु़नीकु सिजेमकु दुथाम सु़का वो मेजो़पा जेमु मेल्वामिनु़। 6 मेम्साकाङा स्वाला मु़चु़मिम वो त्वापलाई जो़होमका जु़ल्पा दु़म्मु लागि उनी सो हन्बेसाडामी। 7 खोत्ले जो़पा खारी बेत्तो मेर्मिमकु ङादोडा रेम्बेपा मु़चु़ गाना दु़म्सा। गाना मेर्मिमलाई सीनामिलो इमा न-गो जो़पा नुङ डोक्पु र्वाला सो़सिक्पा, 8 मा सु़का वो भुर्मु मेचापा आच्छाङाकु सीसि सीडामी। मेम बोनामिमका इकीमा कोर्थो़लाम बक्पामिमका इकीमा दुथाम मेजो़पा जेमु ल्वा हाम वो मेदु़म्मिमका उनी क्रो़म लु़। 9 डु़ल्चो़मिमका वो उनी हपमिमकु ल्वाडा बासाका खोत्ले ल्वाडा उनी हपमिमलाई गेर्सिबेट्निमी। डु़ल्चो़मिम सि कोल्पा मेदु़म्मिनु़। 10 डु़ल्चो़मिमका मेखुम्सामिनु़, लावो छो़म थो़रलु़इमिम दु़म्मु चाम्मिनु़। आरे बेसाका गुइलाई सेल्पा माम्चु़नीकु सीसि जो़पा बु र्वाक्पा मेर्मिमका खोत्ले ल्वाडा रेम्बोमिनु़। 11 हेङालोने खोत्ले मु़चु़मिम सेल्मुमि लागि माम्चु़नीका उनी दिदाम रेम्बेम्डिम बु। 12 मेराम दिदामका गुइलाई माम्चु़नीकु नङ मेकोसिक्पा ल्वामिम नुङ सु़म्दिसेरडाम मेजो़पा नमिम डिन्मु, मा त्वापलाई जो़होमका जु़ल्मु चापा, जो़पा दु़म्पा, मा माम्चु़नीकु लाम्दीडा लाम्दिसाका बुमु सीसा-चेसा। 13 मेम्मा घ्ल्वापा इकीमा माम्चु़नी नुङ गुइलाई सेल्पा येशू ख्रीष्टकु यु़म-झ्वाक्सी रेम्बेसिलो ल्वापा न बिमिम गेर्सी द्वाक्पा थारीकाम लागि लडिमिम बुइ। 14 खोत्ले मेजो़पा ल्वाडाम फ्वामु नुङ सेपा दु़म्साका जो़पा खारी बोमु छो़म माल्पा उनी त्वाकु मु़चु़मिम दु़म्बेन्मु लागि येशू ख्रीष्ट सेन्ला सो़म्सिम्डी। 15 ओर्मिम ल्वा र्वाक्साका थो़रलु़पामिमकु सो हन्बेसाडामी मा गानानुङ बाट्पा साखामका मेर्मिमका ख्लो़ट्मिडिम ल्वाडा भुरामी। मेम्साका गाना र्वानामिम ल्वा खोत्लेका थो़मिनु़। |
© Wycliffe Bible Translators, Inc. All rights reserved.
Wycliffe Bible Translators, Inc.