रोमी 7 - थुलुङ राईडु़म्लाका मु़चु़लाई बन्थामु मेचाप्सु़ 1 वा-ल्वाकनी, गो ओराम ल्वा डु़म्ला थेट्पामिमलाई र्वाक्तोङा बेउ। मु़चु़कु साम बुमिमसम्म कोङङा डु़म्ला दु़महोम बु र्वाक्पा गानी चनिम मिबु मा? 2 डु़म्लाका र्वामिम होम्साका माला लालीकुन्दा बेपा कोङनिम मेसेम उमा वोचु़ बुमिमसम्म उमा ङा दु़म। लावो वोचु़ सिडा माला गु मेरामकाम ङा दु़म्मु बासी र्वाक्पा मेदु़म। 3 मेम्साका उमा वोचु़ बात्तो-बात्तो कोङमीनुङ लस्ता माला गुका नाम्सु़रु़ बु़डु़म दु़म। लावो वोचु़ सिमिम चङडा डु़म्लाका र्वामिम होम्साका गु वाङ दु़म मा कोङमीनुङ लालीकुन्दा बु़डु़ माला गुका नाम्सु़रु़ बु़डु़म मेदु़म। 4 आमा वा-ल्वाकनी, गानी वो ख्रीष्टकु मिरो़मनुङ डु़म्लाकाम लागि सिन्निम बु। मेम्मिमका जो़पा मा-के सिन्बेडिमिम होम्साकाङा माम्चु़नीकु जो़पा खारी बोमु चापा दु़म्मु लागि गुइ ने सिमुलाम बग्गेसाका त्वारो़म ल्वापानुङ कोले दु़म्सी। 5 गुइ कोबिलि इकीमा मिरो़मडाम बादीखाम होम्साका दोस्थाल्ली। मेम्लो डु़म्लाका इकीमा न होम्साका दोमु लागि गुइलाई कोमुमा छु़लथो़ लाम बबेसाका गुइगोडा सिमुलाम रेथाल्लु़। 6 ओम्लो गुइ ख्रीष्टनुङङा सिइडिमका डु़म्लालाम वाङ दु़स्तिम बु। आथा ने गुइ माकेम र्याक्मा डु़म्लाका र्वामिम होम्साका मेएँ, लावो माम्चु़नी-पेललाम लाले त्वारो़म होम्साका लाले-पाङके बिइ। डु़म्ला नुङ छु़ल 7 मेम माला गुइ हाम र्वामु? हाम डु़म्लाका ङा छु़ल रेड्डु़म मा? मेम ने मेएँ, डु़म्लाका ने आमा छु़लमिम रेम्बु़डु़। हेङालोने डु़म्लाका, “गानी रारी बेसी मेनु़” र्वाक्साका मेसो़यु़वाम माला ने रारी बोमु जो़पा ल्वा मेएँ र्वाक्साका गो मेचक्पुवा ङा। 8 छु़लका खाप रेप्डु़मा गोलाई आमा नगोडा खोत्ले खालकाम रारी बेबेट्ङिडी। डु़म्ला मेबायावाम माला ने छु़ल सिडाम कोतिम ङा दु़म। 9 कोबिलि गो डु़म्ला मान्थिङा नु़पा बाङडो लावो डु़म्ला डार्तो मेडे गो छु़ल छेत्तो मा गो ने सिङ्डो। 10 त्वारो़म रेन्मु बासिक्पा डु़म्लाका ने आमा लागि सिमुलाम रेड्डु़ र्वाक्पा ल्वा चक्तो। 11 छु़लका डु़म्लागोडाम ल्वाकु खाप रेप्डु़मा गोलाई लु-फेले बु़डु़। आरेसाका गोलाई डु़म्लालाम सेट्ङिडी। 12 मेमङा लोवो डु़म्ला सेपा बु, मा डु़म्लाका र्वाक्ताम ल्वामिम सेपा नुङ जो़पा बु। 13 मेम माला हाम आरेप्माम जो़पा डु़म्लाका गोलाई सेट्ङिडिम मा? मेरामका ने मेएँ, लावो छु़लका डे गोलाई ने सेट्ङिडिम सो़। छु़ल ने छु़लङा दु़म्नु़ र्वाक्साका छु़लका जो़पा डु़म्लालाम आमा न-गोडा सिमुलाम रेड्डु़। आरेसाका जो़पा डु़म्लाका र्वाक्ताम ल्वालामका छु़ल हेप्माम दु़म आच्छाङा रेम्बु़डु़। 14 डु़म्ला ने माम्चु़नी-पेलका ग्वाक्साड्डामिम जो़पा ल्वा र्वाक्साका गुइ चडिम बु। लावो गो ने आमा न-गो होम्साका दोपा छु़लका र्वामिम थो़पा मा डु़ल्चो़ होङङा छु़लडा भ्रेन्सिङडोम मु़चु़ सो़। 15 गो हाम बेत्तोङा बेउ मेराम त्वाकाङा मेचक्पु। हेङालोने गो हाम बोमु न बेउ मेराम ङा मेबेउ। लावो उहेम खारी घ्राम्सिङु मेरामङा बेउ। 16 आरेसाका गो बोमु न मेबेउमिम खारी बेउतो माला गो डु़म्ला जो़पाङा बु र्वाङु। 17 मेम्मिमका ओम्लो बेउतोम छु़ल गो बेउतोम मेएँ, आमा नगोडा बाट्पा छु़लका बु़डु़म सो़। 18 आमा न-गोडा जो़पा ल्वा मिबु र्वाक्साका गो चक्पु, हेङालोने जो़पा खारी बोमु न बेउ लोवो गो बोमु मेचापु। 19 गो जो़पा खारी बोमु न बेउ लोवो मेचापु, लावो गो बोमु न मेबेउमिम मेजो़पा खारी ङा बेउहोम बुङु। 20 गो बोमु न मेबेउमिम खारी ङा बेउ माला मेराम खारी ने गो बेउमिम मेएँ, लावो आमा नगोडा बाट्पा छु़लका बु़डु़म सो़। 21 मेम्मिमका जो़पा खारी बोमु न बेत्तो-बेत्तोङा वो मेजो़पा खारी गोनुङङा दु़म। गोनुङङा दु़म्पा मेराम ल्वाकाङा आमा त्वारो़मडा खारी बु़डु़म गो लु़लेट्पु। 22 आमा न-गो ने माम्चु़नीलाममिम डु़म्लाडा गेर्सी द्वा। 23 लावो आमा अंगमिमडा कोङमी ल्वाकु यु़मका आमा न-गोडा बाट्पा यु़मनुङ क्वाल्बा बु़। मेम्मा नगोडा बाट्पा ओराम छु़लनुङमा यु़मका गोलाई बन्थाङी। 24 गो हाङको नाम्नाम्चो़ मु़चु़, ओराम सिमुलाम रेट्पा मिरो़मलाम गोलाई सु़का सेल्मु चाम्ङी? 25 येशू ख्रीष्ट इकीमा ङाचो़लामका ङा माम्चु़नीलाई आला दु़म्नु़। मेम्मिमका गो आमा त्वाकु नका ने माम्चु़नीकु डु़म्लाकाम लाले पाङके बेउ, लावो आमा छु़ललाममिम बासी दोसी होम्साका आथावो गो दोङुम बुङु। |
© Wycliffe Bible Translators, Inc. All rights reserved.
Wycliffe Bible Translators, Inc.