रोमी 4 - थुलुङ राईथो़रलामका जो़पा न-गोकाम दु़म्पा अब्राहाम 1 मेम माला इकीमा यहूदीमिमकाम ङाउ-खुउ अब्राहामकु दुथाम गुइ हाम र्वामु? गुका हाम ल्वास्तु़? थो़रलामका गु माम्चु़नीकु ङादोडा जो़पा न-गोकाम दु़स्ता। 2 आच्छाङा अब्राहामका त्वाका बु़डु़म खारी मुमा मान्थिम दु़स्तालो डोक्पु लिम्सिमु चाप्सु़वा। लावो माम्चु़नीकु ङादोडा ने मेएँ। 3 हेङालोने माम्चु़नीकु सिजेमडा र्याक्मा बु, “अब्राहामका माम्चु़नीडा थो़र बु़डु़। मेराम थो़रलामङा माम्चु़नीका गुलाई जो़पा न-गोकाम दु़म्बेट्मिडी।” 4 खारी बेपा मु़चु़का खारी बु़डु़मकु खउलुङ ल्वासु़। लावो मेराम ने गुका ल्वामु बासिक्पा खउलुङ सो़, मेडेङा ग्वाक्मा मेएँ। 5 कोङनिम मु़चु़का बु़डु़म डु़म्ला रु़दु़मका मेएँ, लावो मुमाचो़लाई मुमा मान्थिम बनेबेपा माम्चु़नीडा थो़र बु़ माला गुलाई माम्चु़नीका उनीमा त्वाकु ङादोडा मुमा मान्थिम दु़म्बेन्मी। आरेसाका माम्चु़नीका मु़चु़मिमलाई थो़रलामका मुमा मान्थिम नुङ जो़पा न-गोकाम दु़म्बेन्मी। 6 हप दाऊदका वो डु़म्ला रु़दु़मलाम मेएँ, लावो माम्चु़नीकु ङादोडा जो़पा न-गोकाम दु़म्साका जि ल्वापा मु़चु़मिमकु दुथाम आरे र्वाक्ताम बु, 7 “मेर्मिम ने आलाकाम सो़, उहेमकु छु़ल हेम्सिम्डिम बु मा उहेमकु छु़ल ख्रेम्स्ताम बु। 8 मेराम मु़चु़ आलाकाम सो़ उहेमकु छु़ल माम्चु़नीका हेल्लो वो नडा मेकुर्मी।” 9 ओराम जि-वा ने खिरिरि क्रिपामिमकाम कोङङा मेएँ, लावो खिरिरि मेक्रिपामिमकाम लागि वो सो़। अब्राहाम ने थो़रलु़सीलामका ङा माम्चु़नीकु ङादोडा जो़पा न-गोकाम दु़स्ताम बाइडा र्वाक्तो गेड्डिम बु। 10 आरेप्माम हेल्लो दु़स्ता? गुका यहूदी डु़म्ला होम्साका खिरिरि क्रिम्डु़म चङडा डे ङादो डे? खिरिरि क्रिम्सी दु़म्मु ङादोङा अब्राहामका थो़र बु़डु़। खिरिरि क्रिम्मु ङादोङा माम्चु़नीका गुलाई जो़पा न-गोकाम दु़म्बेट्मिडी। 11 मेम्मिमका खिरिरि क्रिप्सी ने उमा थो़रलाम माम्चु़नीका जो़पा न-गोकाम दु़म्बेट्मिडिम छेखोप रेम्बेट्मिडिम सो़। आरेसाका अब्राहामका खिरिरि मेक्रिपा लोवो माम्चु़नीडा ने थो़रलु़साका जो़पा न-गोकाम दु़म्पा वाङसामामिमकाम ङाउ-खुउ दु़स्ता। 12 आरेसाकाङा यहूदीमिमका खिरिरि क्रिप्मिडिमका कोङङा मेएँ, लावो अब्राहामका थो़र बु़डु़म होम्साकाङा मेर्मिमका वो थो़र बेम्डिमका गु खिरिरि क्रिपामिमकाम वो ङाउ-खुउ दु़स्ताम सो़। माम्चु़नीका याचे जेम्डिम ल्वा थो़रलामका कोङङा डार्सी 13 अब्राहाम नुङ उमा चो़-चु़सु़मिमका सु़म्दिसेरडाम दो़दो़वा ल्वामी र्वाक्साका याचेजम्डिम ल्वा ने डु़म्लाका र्वाक्ताम होङङा बेसाका मेएँ, लावो थो़रलु़सीलाम जो़पा न-गोका दु़म्साका रोक्ताम सो़। 14 डु़म्ला होम्साका दोपामिमका दो़दो़वा ल्वापा माला ने थो़र ने हाम ना हामकाम दु़म्सावा मा माम्चु़नीका याचे जेम्डिम ल्वा वो हाम ना हामकाम दु़म्सावा। 15 डु़म्लाका र्वामिम मेथो़पामिमडला माम्चु़नीका छोक्चो हान्मी, मा डु़म्ला मेबायावाम माला ने छु़ल वो मेगक्सावा। 16 माम्चु़नीका याचेजेम्डिम ल्वा ने थो़रलाम ल्वासिक्पामिमका ओराम माम्चु़नीकु दिदामलाम रो। ओरामका डु़म्ला होम्साका दोपा अब्राहामकु खोत्ले चो़-चु़सु़मिमकाम लागि कोङङा मेएँ, लावो अब्राहाम होम्साका थो़रलु़पा मु़चु़मिमका वो आच्छाङा ल्वामी। हेङालोने थो़रलु़पामिमकु ङाउ-खुउ ने अब्राहाम सो़। 17 माम्चु़नीकु सिजेमडा आरेसाका र्याक्मा बु, “गो गानालाई हापा सामामिमकु पाप दु़म्बेट्निम बु।” सिपामिमका त्वारो़म ल्वापा मा मेबाट्पा थोकलामका वो बाट्पा दु़म्बेन्मु लागि येट्पा माम्चु़नीडा अब्राहामका थो़र बु़डु़म बाइडा। 18 चो़-मा दु़म्मी र्वाक्साका मिम्डु़म ङा मेबायावाम थारीका वो अब्राहामका हापा सामामिमकु पाप दु़म्ङु र्वाक्साका नगोडा लथाड्डु़म बाइडा। माम्चु़नीका गुलाई आरे र्वाम्डिम बाइडा, “इमा चो़-चु़सु़मिम सोरलुङ होङङा हापा दु़म्मी।” 19 अब्राहाम को सङ थ लिन्मु खाप्डु़म बाइडा। लावो गुलाई उमा ङावा दु नुङ सारा बुङ मान्थिम बाइडा लोवो गुका थो़रलु़मु मेडिरु़वा। 20 माम्चु़नीका याचे जेम्डिम ल्वाडा गुका नगोडा हाम वो मेमुर्सिक्साका छो़म थो़र बु़डु़ मा माम्चु़नीकु नङ कोस्तु़। 21 हेङालोने माम्चु़नीका याचे जेम्डिम ल्वा आच्छाङा गुमीका बोमी र्वाक्साका चडु़म बाइडा। 22 आरेसाका अब्राहामका थो़र बु़डु़मका माम्चु़नीकु ङादोडा गु जो़पा न-गोकाम रेम्बेसिड्डा। 23 जो़पा न-गोकाम रेम्बेसिड्डा र्वाक्साका ओराम सिजेम उमा लागि कोङङा र्यासिड्डाम मेएँ, 24 लावो इकीमा लागि वो र्यासिड्डाम सो़। उहेमका इकीमा ङाचो़ येशू ख्रीष्टलाई सिमुलाम फक्खेट्पा माम्चु़नीडा थो़र बेम्डिम बु। ओराम थो़रलामका ङा गुइ वो माम्चु़नीकु ङादोडा जो़पा न-गोकाम रेम्बेसिड्डिम बु। 25 येशू इकीमा छु़लकाम लागि चेन्ला सो़सिम्डी मा गुइलाई मुमा मान्थिम दु़म्बेन्मु लागि गुमीलाई माम्चु़नीका आथावो सिमुलाम फम्खेट्मिडी। |
© Wycliffe Bible Translators, Inc. All rights reserved.
Wycliffe Bible Translators, Inc.