रोमी 3 - थुलुङ राईमाम्चु़नी थो़रलु़इमिम बुमी 1 मेम माला यहूदी दु़म्मिडिलो मेर्मिमलाई हाम जो़पा दु़स्ता मा? खिरिरि क्रिप्सीगोडाम डोक्पु ल्वा हाम बु? 2 मेर्मिमकाम लागि जो़पा दु़स्ताम ल्वामिम ने हापाङा बु। खोत्लेडाम ङादो माम्चु़नीका यहूदीमिमलाई उनी त्वाकु सिजेम ग्वाम्डी। 3 लावो मेर्मिमगोडाम कोङनिमका माम्चु़नीकु सिजेमडा थो़र मेलु़मिवा र्वाक्साका हाम माम्चु़नी वो थो़र मेलु़इमिम बुमी मा? 4 आरेप्माम हेल्लो वो मेदु़म, मु़चु़मिम लिमाचो़ दु़म्मी लोवो माम्चु़नी आच्छाङाकाम बुमी। माम्चु़नीकु सिजेमडा र्याक्मा बु, “गानी जेन्निम ल्वा आच्छाङा सो़ र्वाक्साका मु़चु़मिमका र्वामी, मा निया दु़म्मिम थारीका गानी घ्ल्वानी।” 5 लावो गुइ बिमिम मेजो़पा खारीका माम्चु़नीलाई जो़पा ल्वासी माला गुइ हाम र्वामु मा? हाम माम्चु़नी गुइनुङ भुर्मु मेजो़पा मा? कोङनिम मु़चु़का आरेप्माम मिम्मी। 6 माम्चु़नीका देन्दे ग्वामु र्वाक्मा मेजो़पा ल्वा हेल्लो वो मेएँ। मेम माला ने माम्चु़नीका सु़म्दिसेरडाम मु़चु़मिमकु निया हेसाका बोमु चाम्मी मा? 7 आमा लिमा ल्वाका माम्चु़नीकु आच्छाङाकाम सिजेम खोत्लेका डोक्पु मिम्मी माला हेङा गो छु़लचो़ र्वाला सो़सिङु मा? 8 हाम हुम जो़पा दु़म्नु़ र्वाक्साका गुइ छु़ल बिइ र्वाक्साका र्वाक्ति ए। कोङनिमका गुइलाई आरेप्माम मुमा बेसामी। आरेप्माम मुमा बेट्पा मु़चु़मिमलाई उनी सि होम्साका देन्दे ल्वामी। गुइ खोत्ले मु़चु़मिम छु़लचो़ 9 मेम माला गुइ यहूदीमिम वाङमिमडाम जो़पा बुइ मा? मेम ने मेएँ, हेङालोने यहूदी नुङ वाङसामा खोत्लेङा छु़लका हुप्डु़मिम बु र्वाक्साका ङादोङा गो रेम्बोमु दु़म्तोम बु। 10 ओराम ल्वा माम्चु़नीकु सिजेमडा वो र्याक्मा बु, “माम्चु़नीकु ङादोडा सु़ वो जो़पा मेबुमी, कोले वो मेबुमी। 11 माम्चु़नीकु दुथाम थेसीथेट्पा मु़चु़ सु़ वो मेबुमी, मा माम्चु़नीलाई माल्पा वो मेबुमी। 12 खोत्लेका लाम्दी ख्लो़ट्मिडिम बु, मेर्मिम हाम ना हामकाम दु़म्मिडिम बु, जो़पा खारी बेपा सु़ वो मेबुमी, कोले वो मेबुमी।” 13 “मेर्मिमकु ल्वा ने सु़लु़मलाम लुक्पा मुर होप्माम बु, मेर्मिमकाम त्वाकु लेमकाङा लिमा थेट्डु़म बु।” “मेर्मिमकु जेसी ब्लोकु ङे होप्माम बु।” 14 “मेर्मिमकु सिलामका वाइतो नुङ मेजो़पा ल्वा कोङङा लुहोम बु।” 15 “मेर्मिम मु़चु़ सेन्मु ने लाम बम्सिमी। 16 मेर्मिम बान्ते बान्ते लमी मेनोङा ख्लाम्बे कोङङा बोम्बाल्मी। 17 मेर्मिमका न-गो भ्रसिबेट्पा लाम्दी ने चम्डिम ङा मिबु।” 18 “मेर्मिमका माम्चु़नीकाम ङिम वो मेजु़ल्मी।” 19 डु़म्लागोडाम ल्वा ने डु़म्लाका र्वामिम थो़पा मु़चु़मिमकाम लागि र्वाक्साका गुइ चडिम बु। मेम्मिमका खोत्ले मु़चु़मिमकु सि ड्यासी मा सु़म्दिसेरडाम मु़चु़मिमलाई माम्चु़नीकु ङादोडा येम्सिबेन्मी। 20 डु़म्ला होम्साका दोपा मु़चु़ सु़ वो माम्चु़नीकु ङादोडा जो़पा मेदु़म, हेङालोने डु़म्लाका ने मु़चु़का बेम्डिम छु़ल रेम्बु़। थो़रलामका जो़पा न-गोकाम दु़म्मु 21 लावो ओम्लो डु़म्ला मान्थिङा माम्चु़नीका मु़चु़मिमलाई जो़पा न-गोकाम दु़म्बेट्मिडिम बु र्वाक्साका गुमीका रेम्बेम्डी। ओराम ल्वाङा डु़म्ला नुङ माम्चु़नीलाम जेपामिमका वो सो़म्डिम बु। 22 आरेसाका माम्चु़नीका येशू ख्रीष्टडला थो़र बेपा खोत्ले मु़चु़मिमलाई जो़पा न-गोकाम दु़म्बेन्मी। हेङालोने गुमीका सु़लाई वो चोमिक्सी मेबोमी। 23 खोत्ले मु़चु़मिमका छु़ल बेम्डिमका माम्चु़नीकु यु़म-झ्वाक्सीलामका होनोवा दु़म्मिडिम बु। 24 लावो माम्चु़नी न-थो़मनुङमा बुमी मा उनीमा दिदामलामका मु़चु़मिमलाई ख्रीष्ट येशूडा मुमा मान्थिम नुङ जो़पा न-गोकाम दु़म्बेट्मिडी। हेङालोने खोत्ले मु़चु़का ल्वामु बासिक्पा देन्दे येशू ख्रीष्ट उनी त्वाका ल्वाम्डिमा छु़ललाम वाङ बेसाड्डामिम बु। 25 माम्चु़नीका इकीमा छु़ल हेम्मु लागि येशू ख्रीष्टलाई सासेट्मिडिमा उनीमा सिसि हाट्मिडी र्वाक्साका थो़रलु़पा मु़चु़मिमकु छु़ल हेप्साड्मिडिम बु। माम्चु़नीका ओराम खारी बेम्डिमा गुमी जो़पा न-गोकाम बुमी र्वाक्पा ल्वा रेम्बेम्डिम बु। हेङालोने माम्चु़नीका ख्रीष्ट रोमु ङादो उनी छोक्चो इम्मिडी मा मु़चु़मिमका बेम्डिम छु़लकु देन्दे मेग्वाक्मिवा। 26 माम्चु़नीका मु़चु़मिमकु छु़ल हेप्साका उनी त्वाप जो़पा न-गोकाम बुमी, मा येशूडा थो़रलु़पामिमलाई जो़पा न-गोकाम दु़म्बेन्मी र्वाक्पा ल्वा ओम्लोम थारीका वो रेम्बोमी। 27 मेम माला उहेम ल्वाकु दुथाम गुइ डोक्पु लिसिमु? डोक्पु लिसिक्पा ने ल्वा ङा मिबु। गुइ डु़म्ला होम्साका दोसीमिमका? मेम ने मेएँ, लावो येशूडा थो़र लु़इमिमका कोङङा सो़। 28 मेम्मिमका डु़म्ला होम्साका दोसाका मेएँ, लावो थो़रलु़साका ङा माम्चु़नीकु ङादोडा जो़पा न-गोकाम दु़म्मु चाप्सी र्वाक्साका गुइ च। 29 हाम माम्चु़नी यहूदीमिमकाम कोङङा मा? वाङसामामिमकाम माम्चु़नी मेएँ मा? गुमी वाङसामामिमकाम वो माम्चु़नी सो़। 30 हेङालोने माम्चु़नी कोले ङा बुमी। गुमीका खिरिरि क्रिपा यहूदी लोवो, खिरिरि मेक्रिपा वाङसामा लोवो, खोत्लेलाई मेर्मिमकु थो़रलु़सीलाम उनीमा ङादोडा जो़पा न-गोकाम दु़म्बेन्मी। 31 थो़रलामका माम्चु़नीकु ङादोडा जो़पा न-गोकाम दु़म्सी माला हाम माम्चु़नीकु डु़म्ला ने हाम ना हामकाम दु़म मा? मेम ने मेएँ, लावो आच्छाङा उनीमा डु़म्ला होम्साका डे दोसीहोम बुइमिम दु़म। |
© Wycliffe Bible Translators, Inc. All rights reserved.
Wycliffe Bible Translators, Inc.