रोमी 11 - थुलुङ राईइस्राएलीमिमकु छु़ल नुङ माम्चु़नीकु दिदाम 1 मेम्मिमका गो हिलाबेउ, हाम माम्चु़नीका इस्राएलीमिमलाई ङेट्मिडी? हेल्लो वो मेएँ, हेङालोने गो आ त्वाप वो अब्राहामकु चो़-चु़सु़ बेन्यामीनकु दोचो़गोडा गङ्डोम कोङ इस्राएली सो़। 2 माम्चु़नीका ङादो आथामङा छेट्मिडिम उनीमा त्वाकु मु़चु़मिमलाई ङेट्मिडिम मिबु। हाम एलियाकु दुथाम माम्चु़नीकु सिजेमडा र्याक्मा ल्वा चनिम मिबु? इस्राएलीमिमकु कोर्थो़लाम एलियाका आरेसाका र्वाक्ताम बु, 3 “ङाचो़, इनीमा दुथाम जेपामिमलाई मेर्मिमका सेट्मिडी, मा इनीमा सासेन्खोपमिम फाल्मिडी, सामनुङमा बाट्पा ने गो कोले कोङङा मा गोलाई वो मेर्मिमका सेन्मु माल्तोङा बोङिमी।” 4 माम्चु़नीका गुनुङ र्वाम्डी, “बाल नो़प सेव मेसाट्पा गो येत धु़मसङ (७,०००) मु़चु़मिम आमा लागि गेत्तोमिम बु।” 5 आरेसाका दिदामलामका थुसिम्डिम कोङनिम इस्राएली ओम्लो वो बुमी। 6 ओराम ने दिदामलामका दु़स्ताम सो़, मेर्मिमकु जो़पा खारीलाम मेएँ, जो़पा खारी बेसाका मेम दु़म्सावाम माला माम्चु़नीकु दिदाम ङा मेदु़म्सावा। 7 मेम माला मेर्मिमलाई हाम दु़स्ता मा? खोत्ले इस्राएलीमिमका उनी त्वाकु नका माल्मिडिम ल्वा मेडार्मिवा। लावो माम्चु़नीका थुट्मिडिम इस्राएलीमिमका कोङङा मेराम ल्वा डार्मिडी। वाङमिम खोत्ले इस्राएलीमिम लुङ होप्माम न-गोनुङमा दु़म्मिडी। 8 माम्चु़नीकु सिजेमडा र्याक्मा बु, “माम्चु़नीका मेर्मिमलाई हाम वो थेसिथेन्मु मेचापा न ग्वाम्डी। मेम्मा हाम वो मेल्वापा मिक्सी नुङ हाम वो मेथो़पा नोफ्ला ग्वाम्डी मा ओम्लोसम्म वो मेर्मिम मेप्माम ङा बुमी।” 9 मेम्साकाङा दाऊद हपका वो र्वाक्ताम बु, “मेर्मिमकु ग्रुला ने पेर नुङ थेपलुङ दु़म्नु़। मेर्मिमकु ग्रुलाका मेर्मिमगोडा देन्दे रेडु़। 10 मेर्मिमकु मिक्सीका ल्वामु मेचापा बेसाका तुकुम्चिमका हुप्नु़ मा मेर्मिमकु चङ हेल्लो लोवो गुट्नु़म बुनु़।” 11 मेम्मिमका गो र्वाङु, “मेर्मिम बमु मेचापा बेसाका उनी खेल तुम्डिमा ताम्डिम मा?” मेम ने मेएँ, मेर्मिमका थो़रमेलु़मिवामका वाङसामाडाम मु़चु़मिम सेल्सिम्डी। ओराम ल्वामिनु़ मा इस्राएलीमिमका वो नाचु़र बोमिनु़ र्वाक्पा माम्चु़नीकु न बाइडा। 12 इस्राएलीमिमका थो़रमेलु़मिवालो वाङसामा नुङ सु़म्दिसेरडाम खोत्ले मु़चु़मिम सेल्सिम्डी यहूदीमिम खोत्लेका थो़रलु़मिवाम माला ने ओरामडाम वो हापा जि मेल्वामिवा मा? खोत्ले वाङ सामामिमकु सेल्सिसी 13 गानी वाङसामामिमलाई गो ओराम ल्वा र्वाक्तोङा बेउ। गो वाङसामामिमकु थु़र्मा दु़म्ङोडोमका जो़पा-सेला दो़पा खारी बोमुङा छो़म डोक्पु मिम्पु। 14 आरेप्माम जो़पा-सेला दो़पा खारीडा आमा त्वाकु यहूदी सामागोडाममिमका नाचु़र बोमिनु़ मा मेर्मिमगोडाम कोङनिमलाई माम्चु़नीडा ख्लोमु चापुनु़। 15 हेङालोने माम्चु़नीका मेर्मिमलाई ङेट्मिडिलो सु़म्दिसेरडाम हापा मु़चु़मिम उनीमा त्वाकु मु़चु़ दु़म्मिडी माला, माम्चु़नी आथावो मेर्मिमनुङ दु़म्मी माला मेर्मिम ने सिमुलाम बम्गेडिम कोतिम ङा सो़। 16 सो़बेम चामु ङोल्मा फुल किचो़ कोलोङ माम्चु़नीकु नङडा फ्वाकी माला मेराम फुलकु सो़बेम खोत्लेङा माम्चु़नीकु नङडा जु़ल्मा कोतिम ङा दु़म। दक्साकु फ्रु़प सेपा बु माला खोत्ले ग्रेम वो सेपा दु़म। 17 कोङनिम यहूदीमिम जो़पा जैतूनकु दक्सालाम फल्मामा घ्रोक्मा ग्रेम होप्माम बुमी। लावो गानी वाङसामामिम ने सो़ब्दीडाम जैतून होप्माम लोवो जो़पा जैतूनकु ग्रेमडा केप्साका कोले ङा दु़म्निम बु। आथा ने गानी कोलेङा दक्साकु फारलामका यु़म नुङ त्वारो़म ल्वानी। 18 मेर्मिम ग्रेमकु ङादोडा डोक्पु मेलिसिट्नी। डोक्पु लिसिनी माला ओराम ल्वा मिम्नी सो़, फ्रु़पलाई झेट्पा गानी मेएँ, लावो फ्रु़पका गानीलाई झेट्निम बु। 19 “क्रिप्मा ग्रेमडला गो बन्सिमु चापुनु़ र्वाक्साका ङा मे ग्रेममिम क्रिप्मा बाइडा” र्वाक्पा गानी मिम्नी। 20 मेराम ने आच्छाङा सो़, यहूदीमिमका माम्चु़नीडा थो़र मेबेमिवामकाङा ग्रेम फल्साका घ्रोक्मा होङङा मेर्मिम घ्रोला सो़सिम्डी। गानी थो़र बेन्निमका ङा मेसिन्डा बुनी। ओराम ल्वाकु दुथाम गानी इनी नो़ डोक्पु मेबेनी, लावो माम्चु़नीकु ङिम जु़ल्नी। 21 हेङालोने माम्चु़नीका जो़पा जैतूनकु ग्रेम ने फल्मिडी माला गानीलाई वो मेडिनिमी। 22 मेम्मिमका माम्चु़नी न-थो़मनुङमा बुमी मा गुमीका र्वामिमिम होङङा मेबेपामिमलाई देन्दे ग्वामी र्वाक्पा ल्वा जो़होमका मिम्नी। लावो माम्चु़नीकु दिदामगोडा बुनिम बुनी माला गानीडला उनीमा न-थो़म रेम्बोमी मेएँ माला गानी वो क्रिम्ला सो़सिनी। 23 इस्राएलीमिमका माम्चु़नीडा थो़र बेसाका उनीमा छु़ललाम ख्लोसिमी माला ङादोम खोमडाम ग्रेम होप्माम ङा दु़म्मी। हेङालोने माम्चु़नीका आथावो मेर्मिमलाई ङादोम ग्रेम होप्माम ङा दु़म्बेन्मु चाम्मी। 24 गानी वाङसामा मु़चु़मिम ने सो़ब्दीडाम जैतूनकु दक्सालाम फल्साका रेट्मा मेजो़पा ग्रेम होप्माम सो़। गानी मेराम दक्सा होप्माम मेएँ लोवो ये-दडा ख्लिम्मा जैतूनकु ग्रेमडा बन्सिट्निम बु। इस्राएलीमिम ने त्वाकु ये-दडा ख्लिम्मा जैतूनकु ग्रेम होप्माम सो़। मेम्मिमका ङादो घ्रोक्मा जो़पा ग्रेम ने आथावो रेसाका बडि माला हाङको जो़होमका बन्सावा। खोत्लेडला माम्चु़नीकु दिदाम 25 वा-ल्वाकनी, थक्साका जु़ल्मा कोले ल्वा गानी चन्जो़ल्नी र्वाक्पा आमा न बु। मेराम ल्वा गानी चक्नी माला गानी इनी त्वाकाम लागि डोक्पु मेलिन्सिनी। मेराम थक्मा ल्वा आरेप्माम बु, रोमु बासिक्पा कोति वाङसामामिम ख्रीष्टडा मेरोक्थु़मसम्म इस्राएलीमिमकु न-गो लुङ होप्माम दु़म। 26 मेकोतिमा खोत्ले इस्राएलीमिम सेल्सिमी। माम्चु़नीकु सिजेमडा र्याक्मा बु, “सियोनलाम सेल्पा मु़चु़ रोमी, गुमीका याकूबकु दोचो़लाई मेजो़पा खारीलाम ख्लोमी। 27 मेम्मा गो इनीमा छु़ल हेम्सानिनी, गानीनुङ आमा सो़रख्रेप्सी ओरामङा सो़।” 28 जो़पा-सेलाडा थो़र मेबेमिवामका ङा मेर्मिम माम्चु़नीकु स्वाक्चिमो मु़चु़ दु़म्मिडिम सो़। मेम्मिमका गानीलाई ने जो़पा ङा दु़स्ताम बु। माम्चु़नी उनी त्वाकाङा छेट्मिडिमका मा अब्राहाम, इसहाक, याकूबनुङ याचे जेम्डिमका ओम्लो वो गानीलाई रिखाम बोनिमी। 29 माम्चु़नीका ग्वाम्डिम राप्लावा गुमीका मेख्लोमी, मा येट्मिडिम मु़चु़लाई हेल्लो वो मेङेन्मी। 30 हेङालोने कोबिलि गानी वो माम्चु़नीका र्वामिमिम मेथो़पा बान्नी, लावो इस्राएलीमिम माम्चु़नीका र्वामिमिम मेथो़पा दु़म्मिडिमका गानी उनीमा दिदाम ल्वान्निम बु। 31 गानीडला न-थो़म रेम्बेम्डिमका मेर्मिमका वो न-थो़म ल्वामिनु़ र्वाक्साका मेर्मिम ओम्लो माम्चु़नीका र्वामिमिम मेथो़पा दु़म्मिडिम बु। 32 हेङालोने माम्चु़नीकु दिदाम खोत्लेका ल्वामिनु़ र्वाक्साका गुमीका र्वामिमिम मेथो़पा खोत्लेलाई मेर्मिमकु नसीहोमका पार्जो़ल्मिडी। माम्चु़नीकु यु़म झ्वाक्सी 33 अहो! हेल्लो वो मेल्वाम्मा यु़मखारीनुङमा माम्चु़नी गुइनुङ बुमी, गुमी नेप्चीनुङमा बुमी, मा खोलेम थोक थेट्पा चक्पा वो गुमी ङा बुमी। अहो! उनीमा निया हाङको डोक्पु मा गुमी लाम्दीमिम लाम्दी सु़का छेमु चाप्सु़? 34 “माम्चु़नीकु न सु़का चडु़म बु मा? डे गुमीलाई लु़म्ला बेट्पा सु़ बु?” 35 “सु़का गुमीलाई हाम-हुम ग्वाक्तु़मिम बु, मा ख्लोमु बासिक्पा बेसाका गुमीलाई सु़का ग्वाक्तु़मिम बु मा?” 36 हेङालोने खोत्लेम थोक गुमीकाङा प्रङ्मिडिम, गुमीलामङा बाट्पाम बाट्पा मा उनीमा लागि ङा सो़। हेल्लो लोवो उनीमा यु़म झ्वानु़। आमेन। |
© Wycliffe Bible Translators, Inc. All rights reserved.
Wycliffe Bible Translators, Inc.