रेम्बेट्मिडिम ल्वा 9 - थुलुङ राईङिमलु़पा रु़मिम 1 मेम्मा ङोनोम पाह्रीचो़का उ भुम डु़प्डु़, मा धामुलामका सुबुडा कोले सोरलुङ आल्स्ताम गो ल्वाउतो। कोङनिमका मेराम सोरलुङलाई छो़म घ्लु़म्पा पोलु़म कु चाबी ग्वाम्डी। 2 मेराम सोरलुङका छो़म घ्लु़म्पा पोलु़म होल्लु़ मा डोक्पु मु वाक्पालामका कुइकु लुमिम होङङा ओरामलामका कुइकु गेड्डा। ओ छो़म घ्लु़म्पा पोलु़मलाम गेट्पा कुइकुका नेम्सुङ नुङ धामु केकेया दु़स्ता। 3 मेराम कुइकुलामका सुबुडला रु़मिम लुम्डी मा सुबुडाम दावाखाममिमका केपा होङका यु़म मेर्मिमका रम्डिम बाइडा। 4 सुबुडाम जेम, बोट, धक्सालाई हाम वो मेबेनी लावो उहेम मु़चु़मिमकाम कुप्पीडा माम्चु़नीकु छाप मिबु मेर्मिमलाई कोङङा दु़खा ग्वाक्नी र्वाक्पा ल्वा मेर्मिमका रम्डी। 5 मेर्मिम मु़चु़मिमलाई सेन्थामु ने मेएँ लावो ङो मुनामसम्म मेर्मिमकु थो़मतेर्साक्पा साखाम मे रु़मिमका रम्डी। दावाखामका मु़चु़ केप्डु़लो इम्मु मेझापा नो़मिम होप्माम नो़सी मेर्मिमका ल्वाम्डी। 6 मेम बिलि मु़चु़मिमका सिमु माल्मी लावो मेल्वामी। मेर्मिमका सिमु न बोमी लावो साम मेब्याले। 7 मे रु़मिम क्वाल्बा बोमु लागि झो़म्सिबेन्थाट्मा घोडामिम होप्माम बाम्डी। मेर्मिमका उनी बुइडला सो़नाकु मुकुट होप्माम खुम्तासिम्डी, मा मेर्मिमकु ङाली मु़चु़कु ङाली होप्माम बाइडा। 8 मेर्मिमकु सेम मेसेमकु सेम होप्माम बाइडा, मा मेर्मिमकु लि धेन्द्राकु लि होप्माम बाइडा। 9 मेर्मिमका उनी धक्चीडा सेलकु धक्चीख्रेम होप्माम ल्वासिक्पा बेम्सिम्डिम बाइडा। मेम्मा मेर्मिमकाम लाप्तेरकु तु़प्ली ने क्वाल्बा बेप्डा ओन्पा हापा घोडामिमका थु़न्मिमिम रथमिमकाम होप्मामङा बाइडा। 10 मेर्मिमकु मेर ने दावाखामका केपा होप्मामङा बाइडा। मु़चु़मिमलाई ङो मुनामसम्म दु़खा ग्वाक्पा यु़म मेर्मिमकु मेरडा बाइडा। 11 घ्लु़म्पा पोलु़मचो़ ने मेर्मिमकु हप बाइडा, मेरामकु नङ हिब्रू ल्वाडा ‘एबाड्डोन’ मा ग्रीक ल्वाडा ‘अप्पोलियोन’ सो़। 12 कोनोम ङिमलु़पा हेम्स्ता। आथावो ङिमलु़पा नले थारी रोक्तोङा बोची। 13 मेम्मा रुनोम पाह्रीचो़का उ भुम डु़प्डु़, मा माम्चु़नीकु ङादोडा बाट्पा सो़नाकु सासेन्खोपडाम ब्लले रङमिमका जेम्डिम कोङ लो़लाम थो़उतो। 14 भुमनुङमा रुनोम पाह्रीचो़लाई आरे र्वाक्मा गो थो़उतो, “यूफ्रेटिस नङकाम डोक्पु ब्लोकुडा बट्मा ब्लले पाह्रीचो़मिम फ्रोनी।” 15 मेम्मा सु फ्वाकाम को फ्वा मु़चु़मिम सेन्मु मेराम थारी, मेराम नेम, मेराम मुनाम मा मेराम थकाम लागि झो़म्सिबेन्जो़ल्मा ब्लले पाह्रीचो़मिम डिट्मिडी। 16 घोडाडला हुपा सिपाहीमिम न सङसङसङसङ (२०,००,००,०००) बुमी र्वाक्पा गो थो़उतो। 17 आमा मिक्सीलामडा गो ल्वाउतोम घोडामिम नुङ मेडला हुपामिम आरेप्माम बाम्डी: मेर्मिमकु धक्चीख्रेममिम मु होप्माम लालाम, मामासे मणि होप्माम मा गन्धक होप्माम ओम ओमयाम बाइडा। मे घोडामिमकु बुइ धेन्द्रामिमकु बुइ होङङा बेपा बाइडा, मा मेर्मिमकु सिलामका मु, कुइकु नुङ गन्धक लुक्ताम बाइडा। 18 मे घोडामिमकु सिलामका लुक्पा मु, कुइकु नुङ गन्धककु सेट्पा दु़खाका सु फ्वाकु को फ्वा मु़चु़मिम सेड्डु़मी। 19 मे घोडामिमकु यु़म मेर्मिमकु सिड्डा नुङ मेरडा बाइडा। हेङालोने मेर्मिमकु मेर ब्लोमिमकु बुइ होप्माम बाइडा, मा मु़चु़मिमकु थो़म्बोक ख्वाक्पा यु़म मेर्मिमनुङ बाइडा। 20 ओर्मिम सेट्पा दु़खाका मेसेट्मा वाङमिम मु़चु़मिमका आथावो उनी मेजो़पा खारीलाम मेख्लोम्सिट्मिवा। मेर्मिमका मुनाङमिम नुङ मिक्सीका ल्वामु मेचापा, मेथो़पा मा लाम्दिमु मेचापा सो़ना, मतो, बुलु, लुङ नुङ सङकु ङाटालाई सेव सान्मु मेडिट्मिवा। 21 मु़चु़ सेसी, जादु बेसी, वाङमिम मेसेमनुङ अम्सी, मा खुपा खारीलाम मेर्मिम मेख्लोम्सिट्मिवा। |
© Wycliffe Bible Translators, Inc. All rights reserved.
Wycliffe Bible Translators, Inc.