Biblia Todo Logo
Bìoball air-loidhne

- Sanasan -


रेम्‍बेट्‌मिडिम ल्‍वा 8 - थुलुङ राई


येतनोम छाप नुङ धूप बेखोप सो़नाकु सोजाम

1 भेन्‍दाचो़का येतनोम छाप पिम्‍डी, मेम्‍मा आधा घण्‍टा कोकोसम्‍म पाह्रीला वायवाय दु़स्‍ता।

2 मेम्‍मा माम्‍चु़नीकु ङादोडा येम्‍तासिट्‌पा येतले पाह्रीचो़मिम ल्‍वाउतो। मेर्मिमलाई माम्‍चु़नीका येतले भुम ग्‍वाम्‍डी।

3 मेम्‍मा सो़नाकाम धूप चाखोप जेथाक्‍पा कोङमी पाह्रीचो़ रोक्‍ता मा सासेन्‍खोपफार्डा येम्‍स्‍ता। हप गन्‍खोपकु ङादोडा बाट्‍पा सो़नाकु सासेन्‍खोपडला माम्‍चु़नीकु खोत्‍ले मु़चु़मिमका सो़म्‍दीनुङ धूप चामिनु़ र्‍वाक्‍साका गुलाई हापा धूप ग्‍वाम्‍डी।

4 पाह्रीचो़कु ल्‍वालामका मे धूपकु कुइकु माम्‍चु़नीकु मु़चु़मिमकु सो़म्‍दीनुङ गेले माम्‍चु़नीकु ङादोला लस्‍ता।

5 मेम्‍मा पाह्रीचो़का मे धूप चाखोप रङ्‍डु़मा सासेन्‍खोपडला मुका देम्‍बेट्‌डु़, मा सुबुडा घ्रोक्‍तु़। मेम्‍मा बुलु़लु़ बु़डु़, गुडुमाक्‍सी जेस्‍ता, ब्‍ल्‍याक्‍ची ओप्‍डु़ मा सुबुरुक्‍सी लस्‍ता।


ङादोम ब्‍लले भुममिम

6 मेकोतिमा येतले भुमनुङमा येतले पाह्रीचो़मिमका मेराम डु़म्‍मु झो़म्‍सिम्‍डी।

7 कोनोम पाह्रीचो़का उ भुम डु़प्‍डु़। मेम्‍मा मेसिन्‍डा सिसिनुङमा लोसु़ नुङ मु सुबुडा आल्‍स्‍ता। मेम्‍मा सु फ्‍वाकु को फ्‍वा घ्रु़म्‍डी, धक्‍सामिमकु सु फ्‍वाकाम को फ्‍वा घ्रु़म्‍डी मा गिगिम खोत्‍ले जेम घ्रु़म्‍डी।

8 ननोम पाह्रीचो़का उ भुम डु़प्‍डु़ मा मुका घ्रु़पाम बाट्‌पा डोक्‍पु भ्‍र्‍वा होप्‍माम हाम-हुम पाह्रीचो़का दिरिदिनयु़ घ्रोक्‍तु़। दिरिदिनकु सु फ्‍वाकाम को फ्‍वा सिसि दु़स्‍ता।

9 मेम्‍मा दिरिदिनगोयु़ बाट्‌पा सामनुङमामिमकु सु फ्‍वाकु को फ्‍वा सिम्‍डी, मा कुबी-बोक्‍सामिम सु फ्‍वाकु को फ्‍वा छो़रो़प दु़म्‍मिडी।

10 सुनोम पाह्रीचो़का उ भुम डु़प्‍डु़, मा डोक्‍पु सोरलुङ, वाक्‍पा डो़मार होङङा धामुलामका ब्‍लोकुमिम नुङ कु पुन्‍खोपमिमकाम सु फ्‍वाकु को फ्‍वा गोयु़ आल्‍स्‍ता।

11 मेराम सोरलुङकु नङ “खिलि” सो़। कुकाम सु फ्‍वाकु को फ्‍वा खेपा दु़स्‍ता। खेपा दु़स्‍ताम मे कुका हापा मु़चु़मिम सिम्‍डी।

12 ब्‍लनोम पाह्रीचो़का उ भुम डु़प्‍डु़, मा नेम्‍सुङकाम सु फ्‍वाकु को फ्‍वाडला हाम-हुमका ओप्‍डु़। मेम्‍मा ख्‍लो़मुकाम सु फ्‍वाकु को फ्‍वाडला नुङ सोरलुङमिमकाम सु फ्‍वाकु को फ्‍वाडला ओप्‍डु़, मा मेर्मिमकाम सु फ्‍वाकु को फ्‍वा केकेया दु़स्‍ता। नेमकाम सु फ्‍वाकु को फ्‍वा ओल मान्‍थिम दु़स्‍ता मा सिन्‍थाकाम सु फ्‍वाकु को फ्‍वा वो ओल मान्‍थिम दु़स्‍ता।

13 मेम्‍मा गो रेप्‍तो होङङा धामुकु थेतेला हुट्‌पाम बाट्‌पा कोले खिरिजङमाका डोक्‍पु लो़लामका आरे र्‍वाक्‍ताम थो़उतो, “वाङमिम सुले पाह्रीचो़मिमका भुम डु़म्‍मु खाप्‍मिमिम ने हाउरेमा! हाउरेमा! हाउरेमा! सुबुडा बाट्‌पामिम ने।”

© Wycliffe Bible Translators, Inc. All rights reserved.

Wycliffe Bible Translators, Inc.
Lean sinn:



Sanasan