रेम्बेट्मिडिम ल्वा 7 - थुलुङ राईइस्राएलडाम १,४४,००० मु़चु़मिमडला माम्चु़नीकु छाप ओप्मा 1 ओराम चङडा सुबुडा, दिरिदिनडा, धक्सामिमडा लोवो जु फुन्मु मेग्वामु ब्लले पाह्रीचो़मिमका सुबुकु ब्लसुरडा ब्लले जुमिमलाई भोम्थाम्डिम गो ल्वाउतो। 2 मेम्मा हेल्लो लोवो बाट्पाम बाट्पा माम्चु़नीकु छाप रेसाका पूर्वलामका कोङमी पाह्रीचो़ बिक्ताम गो ल्वाउतो। गुका सुबु नुङ दिरिदिन छो़रो़प बोमु माम्चु़नीलाम साखाम ल्वापा ब्लले पाह्रीचो़मिमलाई डोक्पु लो़लामका आरे र्वाक्ता: 3 “इकीमा माम्चु़नीकु खारीचो़मिमकाम उनी कुप्पीडा गुकु छाप मेओप्थु़मसम्म सुबुडा लोवो दिरिदिनडा लोवो धक्सामिमलाई लोवो छो़रो़प मेबेनी।” 4 मेम्मा छाप ओम्ला सो़सिक्पा इस्राएलीमिम खोत्ले दोचो़लाम ङार्साका को-ब्ल सङसङ ब्ल धु़मसङ (१,४४,०००) मु़चु़ बाम्डी र्वाक्पा गो थो़उतो। 5 यहूदाकु दोचो़लाममिम को सङसङ न धु़मसङ (१२,०००) मु़चु़मिमडला मेर्मिमका छाप ओप्मिडी। रुबेनकु दोचो़लाममिम को सङसङ न धु़मसङ मु़चु़मिमडला, गादकु दोचो़लाममिम को सङसङ न धु़मसङ मु़चु़मिमडला, 6 आशेरकु दोचो़लाममिम को सङसङ न धु़मसङ मु़चु़मिमडला, नप्तालीकु दोचो़लाममिम को सङसङ न धु़मसङ मु़चु़मिमडला, मनश्शेकु दोचो़लाममिम को सङसङ न धु़मसङ मु़चु़मिमडला, 7 शिमियोनकु दोचो़लाममिम को सङसङ न धु़मसङ मु़चु़मिमडला, लेवीकु दोचो़लाममिम को सङसङ न धु़मसङ मु़चु़मिमडला, इस्साखारकु दोचो़लाममिम को सङसङ न धु़मसङ मु़चु़मिमडला, 8 जबूलूनकु दोचो़लाममिम को सङसङ न धु़मसङ मु़चु़मिमडला, योसेफकु दोचो़लाममिम को सङसङ न धु़मसङ मु़चु़मिमडला, बेन्यामीनकु दोचो़लाममिम को सङसङ न धु़मसङ मु़चु़मिमडला। बुबुम ब्लाङमा फतासिट्पा छो़म सेर्पा मु़चु़मिम 9 ओराम चङडा ङार्मुङा मेझापा सेर्पा मु़चु़मिम ल्वाउतोमी। मेर्मिम ने खोत्ले नेब्दीलाम, ल्वा जेपालाम, खोत्ले सामा नुङ दोचो़डाम मु़चु़मिम हप गन्खोप नुङ भेन्दाचो़कु ङादोडा येम्तासिट्पा बाम्डी। मेर्मिमका बुबुयाम ब्लाङमा फम्तासिम्डी मा उनीमा ल्वाडा खजुरकु ग्रेममिम जेन्थाम्डी। 10 मेर्मिमका डोक्पु लो़लामका आरे र्वाम्डिमा येम्डी: “हप गन्खोपडा गन्पा माम्चु़नी नुङ भेन्दाचो़का सेल्सामी।” 11 मेम्मा खोत्ले पाह्रीचो़मिम मे हप गन्खोप, ङाउ-डु़म्लाचो़मिम नुङ ब्लले सामनुङमामिमकु होनोलाम-आथो़लाम येम्सिम्डी। मेम्मा मे हप गन्खोपकु ङादोडा कुम्सिम्डिमा आरे र्वाक्तो माम्चु़नीकु सो़रलोले बेम्डी: 12 “आमेन! इकीमा माम्चु़नीकाम हेल्लो लोवो नङ कोसिनु़, यु़म झ्वानु़, नेप्चीनुङमा दु़म्नु़, आलासो़ दु़म्नु़, गुमीङा डोक्पु दु़म्मिनु़म बुमिनु़, उनीमा यु़म दु़म्नु़म बु़नु़ मा सो दु़म्नु़म बु़नु़। आमेन!” 13 मेम्मा ङाउ-डु़म्लाचो़मिमगोडाम कोलेका गोनुङ आरे र्वाक्तामा हिलाबु़डु़, “सु़ ओ बुबुयाम ब्लाङमा फतासिट्पामिम, मा ओर्मिम बालामका रोम्डिम?” 14 गो गुलाई र्वाङडो, “गानीङा चनी।” गुका गोनुङ र्वाक्ता, “ओर्मिम ने उनी थो़मतेर्ला सो़सिक्पामिम सो़, मा ओर्मिमका उनीमा ब्लाङमा भेन्दाचो़कु सिसिका सो़ल्साका बुबुयाम बनेबेम्डिम बु। 15 मेम्मिमका, ‘मेर्मिम माम्चु़नी हप गन्खोप ङादोडा बुमी मा माम्चु़नीकु सो़रनेम गोडा नेम्फु सिन्था मेर्मिमका उनीमा लाले-पाङके बोमी, मा हप गन्खोपडा गन्पा गुमीका मेर्मिमलाई उनी त्वापनुङङा बुमु खोम ग्वामी। 16 मेर्मिम आथा ने हाम्सी वो क्रु़म मेसिमी, कोरा मेसिमी। नेम्सुङका मेर्मिमलाई मेचायु़मी मा मेख्याकु़मी। 17 हेङालोने मे हप गन्खोपकु थेतेडा बाट्पा भेन्दाचो़ मेर्मिमकु रेपा-क्रिपा दु़म्मी, गुमीका मेर्मिमलाई नु़बेट्पा कु पुन्खोपथो़ क्रिमी। मेम्मा माम्चु़नीका मेर्मिमकु मिक्सीडाम खोत्ले प्ल बम्साट्मी’।” |
© Wycliffe Bible Translators, Inc. All rights reserved.
Wycliffe Bible Translators, Inc.