रेम्बेट्मिडिम ल्वा 6 - थुलुङ राईभेन्दाचो़का छापमिम पिम्डिम 1 मे भेन्दाचो़का येतले छापमिमगोडाम कोलेलाई पिम्डिम गो ल्वाउतो। मेम्मा ब्लले सामनुङमामिमगोडाम कोलेका बुलु़लु़ होङङा र्वाक्पा लो़लामका “बिका” र्वाक्ताम गो थो़उतो। 2 मेम्मा कोले बुबुयाम घोडा ल्वाउतो। मेडला हुपानुङ कोले हान-लिन बाइडा, मा मेरामलाई कोङनिमका मुकुट ग्वाक्तु़, मेम्मा घ्ल्वापा दु़म्साका वाङमिमलाई घ्ल्वाप्डा लुक्ता। 3 हाङकोलो मे भेन्दाचो़का ननोम छाप पिम्डी, मे ननोम सामनुङमाका “बिका” र्वाक्ताम गो थो़उतो। 4 मेम्मा कोङमी लालाम घोडा रोक्ता। मु़चु़मिम त्वाप-त्वाप गोडा सेन्बेबोमिनु़ र्वाक्साका मे लालाम घोडाडला हुपामिमलाई सुबुडा क्वाल्बा रेट्पा साखाम ग्वाम्डी। गुलाई कोले डोक्पु कातु़रु़ ग्वाम्डी। 5 मेकोतिमा भेन्दाचो़का सुनोम छाप पिम्डी मा सुनोम सामनुङमामिमका “बिका” र्वाक्ताम गो थो़उतो। गो रेप्तो मा कोले केकेम घोडा बाइडाम ल्वाउतो। मे घोडाडला हुपाकु उ ल्वाडा कोले तराजु जेथाड्डु़म बाइडा। 6 मेम्मा मे ब्लले सामनुङमामिम थेतेलामका होङङा कोङ लो़लामका आरे र्वाक्ताम गो थो़उतो: “को किलो जेप्सेर कोलेमकु खारीकाम, मा सु किलो याछाम कोलेमकु खारीकाम दु़म, लावो तेल नुङ अङ्गूरकु बिलाम ब्लाम-ब्लाम मेबोमु।” 7 भेन्दाचो़का ब्लनोम छाप पिम्डी, मा ब्लनोम सामनुङमामिमका “बिका” र्वाक्ताम गो थो़उतो। 8 ख्लाख्लाया बेपा कोले घोडा ल्वाउतो, मा मेडला हुपाकु नङ सिमुलाम बाइडा, मा खादी मेरामकु चङचङ लाम्दिबाल्ला। मेम्मा सुबुडाम खोत्ले मु़चु़मिमकु ब्ल भागकाम को भाग मु़चु़मिम कातु़रु़का, पोमुकु दु़खाका, लामासामका, नुङ सुबुडा बाट्पा सो़प्दीडाम हादी-बारामिमलामका सेन्मु साखाम मेर्चिपका ल्वाच्ची। 9 मेकोतिमा भेन्दाचो़का ङोनोम छाप पिम्डी, मा सासेन्खोपकु ध्वायु़ मु़चु़मिमकु त्वारो़म ल्वाउतो। माम्चु़नीकु सिजेम जेम्डिमका नुङ येशूकु दुथाम सो़म्डिमका मेर्मिम मु़चु़लाई सेट्मिडिम बाइडा। 10 मेर्मिमका आरे र्वाम्डिमा डोक्पु लो़लामका येम्डी, “खोत्लेडलाम यु़मनुङमा, सेपा नुङ आच्छाङाम ङाचो़, ओ सुबुडा बाट्पा मु़चु़मिमकाम हाम्सिसम्म निया मेबोनी, मा गुकुलाई सेत्तिकिमकु छोक्चो मेहानिमिम?” 11 मेम्मा मेर्मिम खोत्लेलाई माम्चु़नीका बुबुयाम ब्लाङमा ग्वाम्डी, मा माम्चु़नीकु खारी बेपामिम वो मेर्मिम होम्साका मु़चु़मिमका सेसाका ङार्सीडा मेलिथु़मसम्म आथावो लन्थाट्नी र्वाक्साका मेर्मिमलाई र्वाम्डी। 12 भेन्दाचो़का रुनोम छाप पिम्डिम गो ल्वाउतो मा मेसिन्डा कोङ डोक्पु सुबुरुक्पा रोक्ता। नेम्सुङ तुकुम्चिम होप्माम केकेया दु़स्ता मा ख्लो़मु सिसि होप्माम लालाया दु़स्ता। 13 मेम्मा ब्लोजु़का बैससीकु धक्सा रकु़लो चोकोल उ मामिम आल्मिमिम होङङा धामुलाम सोरलुङमिम सुबुडा आल्मिडी। 14 धामु ने भेन्दाकु कोक्ते खाजेम दिल्सीमिम होङङा दाम्स्ता, मेम्मा खोत्ले पोप्चङ नुङ टापुमिम त्वाकु बाखोपलामका वाङथो़ङा लम्डी। 15 मेम्मा सुबुडाम हपमिम, डोक्पु मु़चु़मिम, सेनाकु डोक्पुमिम, खाप्चीचो़, सोनुङमामिम मा भ्रेम्मा खोत्ले डु़ल्चो़मिम नुङ मेडु़ल्चो़मिम बुडखुम गोनो नुङ पोप्चङडाम भ्र्वा गोनो थसिम्डी। 16 मेर्मिमका पोप्चङ नुङ भ्र्वालाई आरे र्वाम्डी, “गुकुडला आल्सा मा हप गन्खोपडा गन्पाका ल्वामुडाम नुङ भेन्दाचो़कु छोक्चोडाम थक्की। 17 हेङालोने माम्चु़नी नुङ भेन्दाचो़काम छोक्चो रेम्बेपा डोक्पुनेम रोक्ताम बु मा ओराम ने सु़का इम्मु चाप्सु़ मा?” |
© Wycliffe Bible Translators, Inc. All rights reserved.
Wycliffe Bible Translators, Inc.