रेम्बेट्मिडिम ल्वा 5 - थुलुङ राईदिल्साका जु़ल्मा खाजेम नुङ भेन्दाचो़ 1 मेम्मा मे हप गन्खोपडा गन्तासिट्पा गुमीलाई गो ल्वाउतोमी। निफिलाम र्याक्मामा येतले छापमिम ओप्साका दिल्साका जु़ल्मा कोले खाजेम उनीमा जो़प ल्वाडा बाइडा। 2 मेम्मा डोक्पु साखामनुङमा कोले पाह्रीचो़ ल्वाउतो। गुका डोक्पु लो़लामका आरे र्वाक्तोङा लेड्डु़, “दिल्साका जु़ल्मा ओराम खाजेमडला ओप्मा छापमिम पिसाका होर्मु घ्रेट्पा सु़ बु?” 3 लावो पाह्रीला, सुबुडा, सुबु गोयु़म खोमडा मेराम खाजेम होर्मु चापा, मेगोनो रेम्मु चापा सु़ वो मेबामिवा। 4 मेराम खाजेम होर्मु लोवो मेगोनो रेम्मु लोवो घ्रेट्पा ने सु़ वो मेबामिवामका गो छो़म हुलाख्राम बेउतो। 5 मेकोतिमा मे ङाउ-डु़म्लाचो़मिमगोडाम कोलेका गोनुङ र्वाक्ता, “मेख्राप्डा! रेप्डा, यहूदाकु दोचो़लाममिम धेन्द्रा, दाऊदकु चो़-चु़सु़का घ्ल्वाम्डिम बु। मे खाजेम नुङ मेरामकु येतले छापमिम होर्मु चापा गुमी बुमी।” 6 मेकोतिमा कोले भेन्दाचो़ गो ल्वाउतो। गुमी कोङनिमका ङादो सेट्मिडिम होङङा बेपा बाम्डी। गुमी मे हप गन्खोपकु थेतेडा, सामनुङमा ब्ललेमिम नुङ ङाउ-डु़म्लाचो़मिमकु थेतेडा बाम्डी। उनीमा येतले रङमिम नुङ येतले मिक्सीमिम बाम्डी, मेर्मिम ने सुबुडा खोत्लेथो़ माम्चु़नीका थु़र्मिडिम माम्चु़नीकु येतले पेलमिम सो़। 7 गुमी बिम्डी मा मे हप गन्खोपडा गन्पाकु जो़प ल्वालामका मे खाजेम रम्डी। 8 गुमीका मेराम दिल्साका जु़ल्मा खाजेम रम्डिलो मे ब्लले सामनुङमामिम नुङ न-ब्लले (२४) ङाउ-डु़म्लाचो़मिम उनीमा ङादोडा कुम्सिम्डी। खोत्लेकु ल्वाडा को कोले कामसोर बाइडा मा धूपका देम्पा सो़नाकु धूप बेखोप सोजाम जेन्थाम्डी। मे धूपका ने माम्चु़नीकु मु़चु़मिमकाम सो़म्दी रेम्बु़। 9 मेर्मिमका आरे र्वाक्तो कोले लाले काम्सो बेम्डी: “दिल्साका जु़ल्मा खाजेम रमु नुङ ओरामकु छापमिम होर्मुका घ्रेट्पा गानी, हेङालोने गानीलाई सेट्निमी मा खोत्ले दोचो़लाम, ल्वा जेपालाम, मु़चु़मिमलाम नुङ नेब्दीलामका माम्चु़नीकाम लागि इनीमा सिसिका मु़चु़मिम भ्रेन्निमी। 10 मेर्मिमलाई हप दु़म्बेट्निमिम बु मा इकीमा माम्चु़नीकु लाले-पाङके बेपा डु़म्लाचो़ दु़म्बेट्निम बु मा मेर्मिमका सुबुडा साखाम थो़मी।” 11 मेम्मा गो रेप्तो, मा मे हप गन्खोप, ब्लले सामनुङमामिम नुङ ङाउ-डु़म्लाचो़मिमकु होनोलाम-आथो़लाम हापा सेर्पा पाह्रीचो़मिमकु लो़लाम थो़उतो। मेर्मिम ङार्मुङा मेझापा हापा सेर्पा बाम्डी। 12 मेर्मिमका डोक्पु लो़लामका आरे र्वाक्साका काम्सो बेम्डिम बाम्डी: “सेट्मिडिम भेन्दाचो़, यु़म, खाप्ची, नेप्ची, सो, डोक्पु बेसी, यु़म-झ्वाक्सी, नुङ नङ कोसी रमुका घ्रेट्पा!” 13 मेम्मा पाह्रीला, सुबुडा, सुबु ध्वायु़ मा दिरिदिनगोयु़ नुङ मेगोडा बाट्पा सामनुङमा खोत्लेका आरे र्वाक्तो काम्सो बेम्डिम बाम्डिम थो़उतो: “मे हप गन्खोपडा गन्पा नुङ भेन्दाचो़काम हेल्लो लोवो नङ कोसिनु़, नङ डोक्पु दु़म्नु़, यु़म झ्वानु़ मा यु़म दु़म्नु़म बुनु़।” 14 मे ब्लले सामनुङमिमका “आमेन” र्वाम्डी। मेम्मा ङाउ-डु़म्लाचो़मिमका कुम्सिम्डिमा भेन्दाचो़ सेव साट्मिडी। |
© Wycliffe Bible Translators, Inc. All rights reserved.
Wycliffe Bible Translators, Inc.